Uown Lawt32
Kuh hown kowh chia chah rup
1Hungh hownia Mosi uang dowm dowi mih kra lai bowt rakowi maru kawmuüa mih Arawn ria kowi tapat lut uang takua talawm khai. Nami maru kawmuüa tek pe Arawn mih, “Aigupta pren hownia kowh uang lawtla a-i mih Mosi tawng chow cham own mih a-i tuk dowi. Naiawng rakowi a-i vüi thawp a-i thuraiuüa diah. Naiawngün thuraiuüa mih natüng a-i tiama hanow nakruila a-i kown towbowt,” pakhai.2Nakhowk khe Arawn tek pe mih, “Enni kowh masi hai chauüa tut-e kowh kuh ramseng klüpah now ang tut-e uang pawla büa diah,” pape khai.3Nahanow maru maten amatni masi hai chauüa kowh ramseng klüpah hanow Arawn tut-e uang pawla büah khai.4Now maru kawmuüa uang pawla pe mih kuh pawah hanow Arawn mih maih kowi chawrah khai, now sawnla chia chah rup khai.Nami chia chah rup khita now Israeluüa tatek mih, “Tainau-uüa low, mami chowbowt a-i kowh thurai; Aigupta pren hownia kowh uang lawtla a-i mih thurai mami chowbowt,” pabüah khai.5Nami khita hanow Arawn mih nami chia chah rup pur kowi thawp phuchuara lowk khai. Now maru kawmuüa kowi aia tek pe mih, “CHAKRAMANG kowi a-i napeah ringkawra kownkow tharau dow pawi nauowi kown,” pakhai.6Now maru kawmuüa dow auai rau murpa awr rü hanow tikah mih uanap hai taking tasangra uanap pawi chang büah khai. Nami kung kowi dow nacha nakham kownkow chowm büah khai, now cha büah kham hanow taphua taiuala prung se piaw büah khai.7Naiawng rakowi CHAKRAMANG tek pe Mosi mih, “Hungh hownia iu dowm diah. Aigupta pren hownia kowh en uang lawtla mih maru-uüa piak bowk khowk.8Amatni dow ang kowh ana pek nuata khai bowt. Amatni dow amatni vüi thawp chia chah rup tüng khowk. Nami chia chah rup kowi dow krawng kowi tabawkah krawm now chupah büah khai, now nami chia chah vüi dow tawncher ün phuchua büah khai bowt. Amatni tatek mih, ‘Tainau-uüa low, mami chowbowt a-i kowh thurai; Aigupta pren hownia kowh uang lawtla a-i mih thurai mami chowbowt,’ pabüah khai.9“Naiawngün maru-uüa kowi ang tuk chowh; amatni dow laiüama mih chenchap chekhai.10Amatni luk kowi ang kunmarau mih dow maih iawng pacham lün pluplup lah. Naiawng rakowi amatni kowi mih ang napiakta kown; hauang hang ang diah. Nami kung kowi en hownia chenchap aiukma ang nathawpah kown,” pakhai.11Nakhowk khe CHAKRAMANG aia kowh Thurai kowi Mosi tek pe mih, “Aw CHAKRAMANG, en kowh kür akraingma mih hai en kowh rut akürma mih hown en kowh maru-uüa kowi Aigupta pren hownia en uang lawtla khai. Tawngplawng kowchow kawmat naiawng khowt pat amatni luk kowi en tuk kunmarauah khai?12‘Mami pren hownia lawtla hanow tiama rawng kowi nakowngta kownkow hai lusa hownia namitta kownkow kowbüah kowi amatni kowh Thurai pawla mih chowlowbow,’ pami laiklow tawngplawng kowchow Aigupta maru-uüa naka tekra kown? Naiawng rakowi sakrauma hown en kowh kunmarau lün pluplup mih prowngta diah, now en kowh maru-uüa luk kowi hauang pawla pe phih diah.13En kowh nar Abraham, Isak hai Israel büah tut-e kowh en khamah mih lai sam tuak madiah. Amatni kowi dow en matia ming hown kham sawi se en tek pe mih, ‘En krungchakuüa kowi kuang dawng kowi kowh krek iawng nowng rüaah dowi mowr ang nathawpah kown, now ang kham en mih pren chowngchowng saksakma vüi ang nape powngah kown,’ pape khai,” pakhai.14Nami laiklow tata now CHAKRAMANG mih leta saktuak khai. Aia dow aia maru-uüa luk kowi nauang pawla pe phih kown pami uang pawla pe dowi chekhai.15Now Mosi dow sangbowk laitawm huapher pre buk mih dowkla now hungh hownia uang iu dowm khai bowt. Sangbowk laitawm huapher kowi dow pre dam trui arui uowi bowk chekhai.16Nami huapher pre buk mih dow CHAKRAMANG thawpah mih chekhai, now nami huapher pre buk kowi kowh arui uowi mih paw aia ruiah mih chekhai.17Josua dow maru kawmuüa kowh hek klow plak klow tata hanow tek pe Mosi mih, “A-i kowh uowi rah kowi tasen klow chabak!” pakhai.18Nakhowk khe Mosi tek pe mih, “Nami dow tasen awng khe kowh how mih klow nadowi; tasen sum khe kowh kar mih klow paw nadowi. Ang ta mih dow meng klow chowtaih,” pape khai.19Now amatni kowh tangbung khup rah ria kowi uang tatawn hanow maru kawmuüa plai sawmlawm mih hai chia chah rup mih Mosi uang khi khai. Nami khita now Mosi mih lainowmma kunmarau khai. Naiawng rakowi aia dow aia rut kowi kowh huapher pre buk mih iu theuta khai, now nami huapher pre buk dow teu khai. Naiawng aia chang mih dow hungh tut kowi chekhai.20Nami chia chah rup dow Mosi dowkah hanow maih kowi nawmta pe khai. Nami maih kam na dow adima changah now tui kowi phiowah khai, now nami tui dow Israeluüa kowi kür hown pe khamah khai.21Arawn kowi Mosi tek pe mih, “Naiawngün maru-uüa tawng chow changta en khai? Tawngplawng kowchow naiawngünuüa kowi naiawng khowt mih angak prakowi en tuk pawla khai?” pakhai.22Now Arawn tek pe mih, “Aw chakramang, hang kunmarau diah. Maiawngün maru-uüa kowh saktuak dow angak prakowi kangowh mih en aiawng tuk towbowt.23Amatni dow ang tut-e uangah now tek ang mih, ‘Aigupta pren hownia kowh uang lawtla a-i mih Mosi tawng chow cham own mih a-i tuk dowi. Naiawng rakowi natüng a-i tiama hanow nakruila a-i kownkow thawp a-i thurai diah,’ pakhai.24Nami ang tata hanow kuh hown kowh tatawng müa uowi mih nauang pawla ang kownkow ang tek pe khai. Now kuh hown kowh tatawng müa uanh uang pawla ang büah hanow naiawngün kuh mih maih kowi ang nawmah khai, now nami chia chah rup dow uang awr phaw khai,” pape khai.25Now maru kawmuüa kowi amatni nau iawng Arawn pe uowiah mih chowbowt pami Mosi tuk khai. Amatni kowi Arawn nowng khet dowi bowt rakowi amatni dow ransu-uüa tut-e chowng rensi kau mih chowbowt padow Mosi ka tuak khai.26Naiawng rakowi tangbung khup rah plawt re-e Mosi iowngah now tek pe mih, “Enni pungmadawng kowi CHAKRAMANG kowi tangila mih nget ang tut-e uang büa diah,” pakhai. Nahanow Levi krungchakuüa nget dow Mosi prakowi kowkowi khai.27Nakhowk khe Levi krungchakuüa kowi Mosi tek pe mih, “CHAKRAMANG Israeluüa kowh Thurai tek mih, ‘Enni bowkbowk kelang kowi uaila saidawng büa diah, now tangbung maten kowi krawi kowi hanow krum mih srui kowi saila diah. Tainau lah, auiua lah, kimping namkhet lah khi mih srui kowi saila diah,’ pakhai,” pape khai.28Now Levi krungchakuüa dow Mosi ana pek iawng chang khai bowt. Naiawng rakowi nami ni dow kachakuüa nget 3,000 ia ngia kowng khai.29Nami kung kowi Levi krungchakuüa kowi Mosi tek pe mih, “CHAKRAMANG dow aia kowh lup enni naia changla kownkow ani mih lang klota enni khai bowt. Tawngplawng kowchow panow kowmatia chauüa hai tainau-uüa kowi khowm padow nasaita kownkow kung prakowi enni sut dowi chekhai. Naiawng rakowi ani mih CHAKRAMANG hownia enni ka prasi khowk,” pakhai.30Now auai ni khe Mosi tek pe maru kawmuüa mih, “Lainowmma enni chang angak khai. Nachenganchepaw enni kowh angak nalawt enni tak chünchü kawmat hungh kowi ang kowpünah hanow CHAKRAMANG tut-e ang kowchang enni lup tak,” pakhai.31Naiawng rakowi CHAKRAMANG tut-e Mosi kowplan kowiah now tek pe mih, “Aw CHAKRAMANG, mami maru-uüa lainowmma changta angak khai bowt. Amatni dow kuh hown kowmatia vüi thawp thurai rup khai.32Nachenganchepaw sakrauma hown amatni kowh angak lawtta pe diah. En che amatni kowh angak lawtta pe dowi kowh chalow now en maru-uüa kowh ming tang bowih hownia ang kowh ming phiawkta diah,” pakhai.33Nachenganchepaw CHAKRAMANG tek pe Mosi mih, “Kingküa ang mih maru-uüa kowh ming chowtaih ang maru-uüa kowh ming tang bowih hownia ang naphiawkta kown.34Sünta, kawmat kowplan hanow maru kawmuüa kowi ang tek en mih arah kowi kowpawla diah. Ang kowh kramamu mih natawi tüng enni tiama kown taih. Chang angak miuüa kowi dow akhin khe ang napeah ripra kown,” pape khai.35Arawn kowi pe thawpah chia chah rup mih rakowi CHAKRAMANG dow maru kawmuüa luk kowi phih kraingma uang chin pe khai.
The Seed Company