Uown Lawt30
Nam iungma mih maikhük towk müa phuchuara
1“Maikhük towk müa phuchuara dow ri singh hown en nape thawpah lowk kown.2Nami phuchuara dow tali tingnui en nape thawpah kown. Areng klang hai adowng phia dow amuk chi en nape thawpah kown, now akro dow pre muk en nape thawpah kown. Phuchuara aluk prakowi kowh anui towng dow anang iawng achemchow en nape sawnah lowk chi kown. Naiawngün anang tali klüng mih dow phuchuara hown panga sang en nape sawnah kown.3Naiawngün anang hailawm phuchuara dow achangma mih kuh hown nasowah kown. Now auenh tapat lut mih kowi kuh hown nape thawpah bawng kown.4Nami phuchuara dow nacham ia kawtla reng kownkow auenh dak kowi anui re-e akawtlawng sowr müa mapra dam pre buk paipra dam pre buk nachawp pe akli kown takla.5Nami akawtlawng pre buk mih dow ri singh hown en nape huiah kown, now nasow pe kuh kown takla.6Nami phuchuara dow Lang Chimsai mih Arah kra müa uaniang uat hownia uaniang riachow kowi natowah kown; nakowi mih en hown ang nauang takrum reng kown.7“Now rau towng krawi mingkhet maibu mih khin khe nami phuchuara luk kowi mih anam iungma mih maikhük Arawn natowkla reng kown.8Iak prakowi krawi towk maibu mih khin khe paw nami maikhük mih aia natowkla iawk kown. Naiawng hai Arawn kowh krungchakuüa mih chowngchowng saksakma akhin towng ang CHAKRAMANG pur kowi natowk maikhük kown.9Nami phuchuara luk kowi dow ang ana pek iawng thawpah dowi mih maikhük towk müa chap naia towk kown nadowi. Nakowi dow tikah mih uanap, kawmdi uanap hai khamah mih uanap paw naia chang kown nadowi.10Angak lawt lük müa phuchua pawi kowi kowh ngar vi dow maikhük towk müa phuchuara nang tali klüng mih kowi Arawn naplikah kown. Naiawng hai maikhük towk müa phuchuara dow aning kowi pakat chi chowngchowng saksakma uamow lang kri mih nachimsaiah kown. Nami dow ang CHAKRAMANG vüi lang chim lang sai mih phuchuara chekhai,” pakhai.11Nami kung kowi CHAKRAMANG tek pe Mosi mih,12“Israeluüa kowh maru iun rüa mih khin khe amatni kowh asak klan müa nape ang tai kown takla. Amatni che pe khai hanow rüa maru iun rakowi nauang kla kown mih phih amatni luk kowi nauang kla kown nadowi bowt.13Pirmi ning chih mih hownia nami luk kowi kowh kachakuüa maten dow lowk ia kowi tai hamüt gram chi nape ang ngengche kown takla; tai hamüt gram dow taklowp taklangra te kowi kowh akhai müa hown khaiah mih naown kown takla.15Nami dow amatni kowh asak klan müa nape ang kown mih chekhai. Nami dow hamüt gram klen kowi kureng miuüa paw achüt pek takla dowi tham, now ngarai miuüa paw apek nalang e kown nadowi.16Israeluüa hownia kowh napawah kown mih asak klan müa naiawngün tai maten dow taklowp taklangra te lup chang müa kowi natawngah kown. Enni matia takcha kowi kowh naiawngün asak klan müa enni pe mih dow ang CHAKRAMANG natukla enni reng kownkow chekhai,” pakhai.17Nami kung kowi CHAKRAMANG plan tek pe Mosi mih,18“Rut sau khawk sau müa biatum kri hown en nape thawpah lowk kown takla, now nami biatum chowm rah paw kri hown en nape thawpah lowk kown. Nami biatum dow taklowp taklangra te hown phuchuara takra kowi natowah kown, now nami biatum kowi dow natow pe tui kown.19Nami tui hown dow Arawn hai achapauüa nasau rut nasau khawk reng kown.20Taklowp taklangra te lak kowi kowkup kown khe nakowngla dowi kownkow amatni mih nami tui hown nasaula rut khawk reng kown takla. Now maih kowi kowh tikah mih phuchuara kowi kowchang lup mih khin khe paw nakowngla dowi kownkow phuchuara pra kowkowi dowi rawn amatni mih nasaula rut khawk reng kown takla. Nami dow chowngchowng saksakma Arawn hai aia chuprek chaprekuüa vüi ari-arow naown kown,” pakhai.22Nami kung kowi CHAKRAMANG plan tek pe Mosi mih,23“Nathawpla nümnap müa sau kownkow anam iungma mih chap krawi paw sangrum diah. En nakrawi paw kown mih dow ‘mura ’ tanga set, singding pik pre set hown akhuai ngia, nam iung mih pram chap pre set hown akhuai ngia,24‘kasia’ pami singh pik tanga set chekhai. Nami klen kowi kanrawn sau paw sum sen hown akhuai ngia en napawla kown.25Naiawngün nam iungma mih chap dow paingbawng thawp sarauüa kowi amaisang nape rawah now en nape thawpah kown. Nami dow chimsaima mih nümnap müa sau naown kown.26Nami sau dow krawi phawkah hanow en nalang krala uanh kown. En nalang kraah kown mih uanh dow Taklowp taklangra te, sangbowk laitawm tawkpla,27pawitang hai nakowi kowh tawngkengah kown mih uanh maten, maibu towngh hai nami kowi kowh uanh maten, maikhük towk müa phuchuara,28tikah mih uanap chang müa phuchuara hai nakowi kowh uanh maten, now biatum hown biatum chowm müa ün chekhai.29Naiawngün dow naiawng hai en nalang kraah kown, nahanow naiawngün dow lang chim lang sai mih uanh naown kown towbowt. Naiawngün kowi kowh kak mih srui dow chimsaima naown kown takla.30“Arawn hai achapauüa dow nachang ang kowh uamow lup kown chekhai. Naiawng rakowi amatni kowi dow phawk pe sau hanow en nanümnapah kown, now ang vüi en nalang kraah kown.31Now nami sau dow enni vüi chowngchowng saksakma pat chimsaima mih nümnap müa sau naown kown pami Israeluüa kowi tek pe diah.32Nami sau dow chimsaima chekhai; enni paw nami sau dow chimsaima pahai natuakah kown takla. Naiawng rakowi nami sau dow iawngpa mih maru buk kowi hang pacham phawk naklak lah. Nami klen kowi akeng lup kowi natawngah kownkow nami powm iawng mih sau hang pacham thawp lah.33Naiawng mih sau thawp mih maru kowi dow Israel chen hownia nabatta kown takla, now uamow nadowi kowi iawngpa mih maru kowi krawi phawk mih che uowi khai hanow nami maru kowi paw Israel chen hownia nabatta kown takla,” pakhai.34Nami kung kowi CHAKRAMANG plan tek pe Mosi mih, “Anam iungma mih chap, anam iungma mih maikhük towk müa than achangma mih hai akeng mih than en nacham paw kown. Now naiawngün dow anowksang rawah hanow anam iungma mih maikhük towk müa chap en nape thawpah kown.35Naiawngün dow thawp paingbawng miuüa kowi en nape thawpah kown. Now naiawng thawp mih khin khe awisa paw narawla pe kown; nahanow achangma naown kown towbowt, now nami dow achimsaima naown kown towbowt.36Nami maikhük towk müa chap dow pawah ditchow now nadi-ah kown, now taklowp taklangra te kowi kowh sangbowk laitawm tawkpla pur kowi natowah kown. Nakowi mih en hown ang nauang takrum kown. Nami anam iungma mih maikhük towk müa chap dow lainowmma chimsai mih uanh padow enni namüah kown takla.37Mia iawng mih paw kowmatia tawng müa anam iungma mih maikhük towk müa chap hang pacham thawp lah. Nami dow CHAKRAMANG vüi lang kraah mih chekhai padow sak kowi enni natowah reng kown takla.38Paingbawng iawng dow natawngah kownkow naiawng mih chap tawi thawp mih maru che uowi khai hanow nami maru kowi dow Israel chen hownia nabatta kown takla,” pakhai.The Seed Company