Uown Lawt1
Israeluüa prung mih
1Israel dow achapauüa hown achapauüa kowh kimchak hailawm Aigupta pren kowi kowpowt khai. Israel kowh ming uowi lowk tak mih dow Jakawb chekhai. Naiawngün Jakawb kowh chapauüa ming dow2Reuben, Simiawn, Levi, Juda,3Isakar, Zebulun, Benjamin,4Dan, Naptali, Gad hai Aser büah chekhai.5Josef dow naiawngünuüa dowi rawn Aigupta pren kowi kowrik uowi khai bowt. Jakawb kowh naiawngün krungchakuüa maru iun dow bowkbowk kowi 70 ia chekhai.6Now akung kowi dow Josef hown atainau-uüa hai amatni chowng kowi kowh maru-uüa maten kowng khai bowt.7Nachenganchepaw Israeluüa dow awr prung ngamlam chekhai; amatni dow maru iun uang hu hanow Aigupta pren paprenma kowi krawi tauet büah khai. Amatni dow lainowmma uang kür büah khai, now Aigupta pren kowi atekma uowi büah khai.8Ning kawmma kung kowi dow Aigupta pren kowi mang sar uang uowi khai iawk; nami mang sar dow Josef lawnguan kowi tawngpaw tawi tuk dowi chekhai.9Nami mang tek pe aia maru-uüa mih, “Sünta büa diah, Israeluüa mih a-i lak-e maru iun lang kawm khai bowt, now kür paw a-i lak-e lang kür khai bowt.10Naiawng rakowi chu, amatni kowh maru iun nahula dowi bowt kownkow prengia hown a-i chang lup diah sik. Naiawng nadowi now tasen khe a-i kowh ransu-uüa hown nacham tawi tabawng büah ün tarawng. Now natawi sen a-i hanow akung kowi dow mami pren hownia napowtta a-i tarawng,” pakhai.11Naiawng rakowi mang Faraw dow Israeluüa kowi changah nowng hanow napiakta pe sak kown mih kamrüt khai bowt. Aia hai aia kowh maru iukuüa dow Israeluüa luk kowi tow pe aluchow ne khai, now Israeluüa kowi akratma mih lup pe changah büah khai. Amatni dow nanungla Faraw kowh cha kownkow Israeluüa kowi pe thawpah marow pre buk khai. Nami marow ming dow Pithawm hai Rameses chekhai.12Nachenganchepaw Israeluüa kowi dow changah nowng ngamlam maru iun uang lang hu ngamlam chekhai. Amatni dow pren kowi krawi tauet ngamlam chekhai. Naiawng rakowi Aigupta prenchakuüa mih Israeluüa kowi lainowmma kramah khai.13Amatni dow Israeluüa kowi akratma mih nar lup lang pe changah ngamlam khai.14Amatni dow laih kowi kowh akeng mih lup maten hailawm amia müa thundi hown sakka kam hai ipbawn thawp ün Israeluüa kowi pe changah khai. Naiawngün nar lup pe changah mih khin khe Aigupta maru-uüa mih Israeluüa kowi lainowmma changah anowng apowng khai. Naiawng rakowi Israeluüa kowh chownglawng dow lainowmma kawmkrat khai.15Israel masiuüa hawmh kowh dow Siphawra hai Puai pape mih penchow kimuowi sara uowi pre ia chekhai. Nami sara pre ia kowi Aigupta mang tek pe mih,16“Hebrai masiuüa uowi kim mih khin khe enchi cham chang sara now müah iüah kaneu diah. Chah che kachakuüa chekhai hanow bawmta iüa diah, now masiuüa chekhai hanow pe singah iüah taih,” pape khai.17Nachenganchepaw nami pen sara pre ia dow Thurai kowi ringkaw mih maru chekhai. Naiawng rakowi amatchi dow Aigupta mang kowh ana iawng chang dowi kowi kachakuüa chah kowi paw bawmla iüah dowi chekhai.18Nami khin khe nami pen sara pre ia kowi mang hawah now tek pe mih, “Tawngplawng kowchow naiawng mih lup enchi tuk chang khai? Tawngplawng kowchow kachakuüa chah kowi enchi bawmla dowi?” pape khai.19Nakhowk khe Faraw kowi pen sara pre ia tek pe mih, “Hebrai masiuüa dow Aigupta masiuüa iawng nadowi. Hebrai masiuüa hawmh dow kimuowi iama chekhai; amatni dow pen sara kowting dowi rawn rik taklen reng chekhai,” pakhai.20Nami pen sara pre ia dow Thurai kowi ringkaw mih maru chekhai. Naiawng rakowi Thurai mih nami pen sara pre ia kowi peah iungra khai. Thurai mih amatchi kowi paw pe kaah chah khai bowt; amatchi kowh chauüa kowi paw krungchak ahuma pe phawah khai. Israeluüa kowh dow maru iun uang hu ngamlam chekhai, now amatni dow uang kür ngamlam büah khai.22Now akung kowi dow aia maru-uüa luk kowi Faraw lawt ana khai. Faraw tek pe mih, “Israeluüa pungmadawng kowi kachakuüa chah che uang dia khai hanow nami chah kowi dow Nail aw kowi nakowkuakta kown. Nachenganchepaw masiuüa chah maten kowi dow nape singah kown,” pape khai.The Seed Company