Esther3
1Naiawng phaw mih pre sum ning kung kowi mang Ahasuer dow aia kowh maru iukuüa maten luk kowi kowh lang iuk mih arah Haman kowi peah khai. Haman dow Agag krungchak Hamedatha kowh chapa chekhai.2Haman kowi tua kung se nachupah kownkow mang mih aia kowh maru iukuüa maten kowi peah ana khai. Nachenganchepaw Mawrdekai dow kung paw tawi tua dowi, now chup paw tawi chup dowi chekhai.3Nakhowk khe mang kowh maru iukuüa tek pe Mawrdekai mih, “Tawngplawng kowchow mang kowh ana pek en chün dowi?” pakhai.4Nakhowk khe Mawrdekai klangah mih, “Ang dow Jihudi chenchap chekhai. Haman kowi ang ia chup dowi tham,” pakhai. Nachenganchepaw amatni dow Haman kowi nachup kown mih ni towng Mawrdekai kowi tek pe khai. Nachepaw Mawrdekai dow hawt sünta pe dowi chekhai. Naiawng rakowi amatni dow Mawrdekai kowi tawng iawng dow nachangah tak chünchü pakowh Haman kowi kowtek pe büah khai.5Now tua kung se aia kowi Mawrdekai chupah dowi mih tukta hanow Haman dow lainowmma kunmarau khai.6Nachenganchepaw Mawrdekai dow Jihudi chenchap taih pami aia tukta hanow Mawrdekai lowk iachow kowi saita kown mih sak-ih dowi chekhai. Naiawng rakowi aia dow Persia pren kowi kowh Jihudiuüa maten kowi saita kown mih sangkrang khai.7Naiawng rakowi Jihudiuüa kowi nasaita kown mih ni hai la natukla kownkow Ahasuer chowm mang mih laipre ning khe Nisan la kowi aia kowh prengia pek miuüa kowi Haman mih aia pur kowi pe kuakah plang khai. Now naiawng kuak plang khe kowh plang cha mih dow Adar la kowi chekhai.8Nami kung kowi mang Ahasuer kowi Haman tek pe mih, “En pren kowi kowh pren powng maten kowi chenchapuüa pungmadawng kowi krawi tauet mih chenchap uowi lowk. Amatni kowh ari aiang dow akeng chenchapuüa kowh ari aiang hown alangma chekhai, now mang kowh ari aiang paw amatni dow chün dowi chekhai. Naiawng rakowi amatni kowi dow towah sing kown mih mang vüi kowi iung dowi tham.9Naiawng rakowi mangkri, en che nauta khai hanow kowbüah kowi nachumta kownkow lawt ana diah. Nahanow mangkri kowh lup chang müa vüi dawngthawnguan towk rah kowi tai 8,750 mawn ang nauang tow kown,” pakhai.10Nakhowk khe mang mih aia rut kowi kowh mur uowi mih rutbüt klüpah hanow Jihudiuüa kowh ransu Agag krungchak Hamedatha kowh chapa Haman kowi peah khai.11Haman kowi mang tek pe mih, “Tawngpaw tangka apek lakke dowi. Nami chenchap luk kowi en tut-e iung iawng kowchang taih,” pakhai.12Nami kung kowi dow la uown kowi kowh lacher laisum ni mih ni khe Haman mih mang kowh cha rui miuüa kowi hawah khai. Nami cha rui miuüa dow Haman kowh ana pek iawng pren powng maten kowi chowlowkkow chenchap cha hai chowlowkkow chenchap lai hown ruiah khai. Now naiawngün chasak dow pren powng maten kowi kowh kruitown miuüa kowi hai chenchap aluchowuüa kowi nakrawi sa kownkow aia pe ana khai. Naiawngün chasak dow mang Ahasuer ming hown ruiah khai, now mang kowh mur uowi mih rutbüt hown tuk pe mur khai.13Now naiawngün chasak dow mang Ahasuer pren kowi kowh pren powng maten kowi satang phowng miuüa kowi aia krawi pe saah khai. Nami chasak kowi ana pek uowi mih dow Adar la lacher laisum ni mih ni khe Jihudi maten kachakuüa, masiuüa, ngeuüa hai lawngtanguüa kowi asaima nasaita bowk kown mih lawnguan chekhai. Now amatni kowh dawngthawnguan paw narupta pe bowk kown mih chekhai.14Nami ni khe Persia pren kowi kowh maru maten kamrütma hown naia uowila kownkow nami chasak kowi kowh ana pek pren powng maten kowi krawi phuangah khai.15Now mang peta ana hanow satang phowng miuüa dow alenma lawt khai bowt, now nami chasak kowi kowh ana pek dow Susa marow kri kowi paw phuangla pe khai. Nami kung kowi mang hai Haman iüah dow taiua kham grep tui khai. Tawkche Susa marow kri kowi kowh maru-uüa dow nami satang tata hanow lainowmma tuak krat büah khai.
The Seed Company