Esther1
1Mami phaw mih dow Persia pren kowi kowh Susa marow kri kowi Ahasuer chowm mang khe chekhai. Aia kruitownah mih Persia pren kowi pren powng uowi mih dow 127 klüng chekhai. Naiawngün pren powng dow India pren sünghi hownia Ethiawpia pren sünghi mowr chekhai.3Aia chowm mang mih sum ning khe aia dow aia kowh maru iukuüa hai aluchowuüa maten vüi chang pe pawi lowk khai. Nami pawi nauang tawi sun kownkow pren powng maten kowi kowh ringkaw uowima mih maru-uüa hai maru iukuüa, now Persia pren hai Media pren kowi kowh siphai aluchowuüa kowi aia hawla khai.4Aia dow nami pawi mih 180 ni mowr thakah khai. Nakhowk khe aia dow aia kowh dawngthawnguan hu mih hai aia kowh mangra kri kraing mih pinsüauüa kowi tüng pe khai.5Nami pawi chur mih auai ni khe aia dow Susa marow kri kowi kowh aiuk asowm bowkbowk vüi plan thak pawi ranit ni khai iawk. Nami leng dow aia kowh bakan talang kowi aia chang pawi khai.6Nami bakan talang dow akawchow mih uaniang hai aruachow mih uaniang hown aia krawi tawngah khai. Naiawngün uaniang tük müa dow asung khakma mih hua hown thawp pe achüng hanow tai hown kowh thawpah mih akli krawi chawp pe khai. Now uaniang dow naiawngün akli kowi akaw hai aruama panow adipükchow mih la hown kowh leng hown krawi tükah khai. Nami talang dow akawma, aringma, asingma hai anumma mih hua asung khakma mih hown phaiah khai, now nami luk kowi dow kuh hai tai hown kowh thawpah mih chowm rah krawi tow pe khai.7Pinsüauüa khamla grep tui mih bia maten dow kuh hown kowh thawpah mih kangowh chekhai. Naiawngün bia dow lowk paw apowm tatu dowi chekhai. Mang dow aia kowh saktuak iung mih natüngla kownkow amatni kowi grep tui ahuma peah khai.8Pinsüauüa dow nowng kham mowr chi kham grep tui büah khai. Tawngplawng kowchow panow pinsüauüa nau mowr chi napeah kown mih anaruüa kowi mangkri tek pe khai.9Nami khin khe masiuüa mang Vasti paw masiuüa hawmh vüi mang Ahasuer kim kowi chang pe pawi lowk khai.10Now pawi chur ni ranit ni mih ni khe dow mang Ahasuer mih kham grep tui kowh pua se piaw khai. Nakhowk khe aia dow anar Mehuman, Biztha, Harbona, Bigtha, Abagtha, Zethar hai Karkas büah kowi hawah khai.11Now mang lukruk krukma hown Vasti kowi nauang pawla kownkow naiawngün nar ranit ia kowi aia tek pe khai. Tawngplawng kowchow panow aia dow maru kawmuüa hai maru iukuüa kowi aia kowh masi lainowmma klangiung mih natüng pe kown nau kowh chekhai.12Now mang kowh naruüa dow Vasti kowi mih mang kowh ana kowtek pe khai. Nachenganchepaw aia dow mang pur kowi kowkowi kown mih mapaw nau dowi chekhai. Naiawng rakowi mang dow nowm nowm kunmarau khai.13Naiawng rakowi mang dow Persia pren hai Media pren kowi kowh prengia pek mih lang kri miuüa hown kowtalawp khai. Naiawngünuüa dow prengia uowima kangowh, now Persia pren kowi kowh ari aiang hai ari arow ün atukma kangowh chekhai. Naiawng rakowi mang dow aia nau changah kown mih lup lawnguan kowi amatni tut-e paw prengia reng chekhai. Naiawngünuüa dow Karsena, Sethar, Admatha, Tarsis, Meres, Marsena hai Memukan büah chekhai.15Amatni kowi mang lüntaah mih, “Masiuüa mang Vasti kowi nauang pawla kownkow ang kowh naruüa kowi ang peah ana chowdiah. Nachenganchepaw Vasti mih ang kowh ana pek chün dowi chekhai. Naiawng mih maru kowi naripah kown mih lawnguan ari aiang kowi tawng iawng chow uowi?” pakhai.16Nakhowk khe mang hai lang kri mih maru iukuüa pur kowi Memukan tek mih, “Masiuüa mang Vasti peah rukrai mih dow mang lowk iachow kowi nadowi; nami dow mangkri kowh maru iukuüa maten kowi hai pren powng kowi kowh maru maten kowi pe rukrai mih chekhai.17Vasti lawnguan dow masiuüa maten pungmadawng kowi nakrawi tauet kown chekhai, now amatni kowh hua kowi khareah se natek kown mih, ‘Aia pur kowi nauang kownkow amasi Vasti kowi mang Ahasuer peah ana mih kowi khowm padow Vasti kowkowi pe dowi mih en tuk dowi bow?’ napa kown chekhai.18Nami masiuüa mang kowh lawnguan tata hanow Persia pren hai Media pren kowi kowh maru iukuüa kowh masi hawmh dow amatni huauüa laiklow nachün kown nadowi bowt. Amatni dow huauüa kowi naring nakaw kown nadowi bowt, now huauüa mih amatni kowh masiuüa kowi nakunmarauah kown towbowt.19“Mangkri, en che nauta hanow en pur kowi mang Vasti katpaw nowng uangla dowi bowt kown mih ana lawt lowk diah. Now nami ana dow katpaw nowng klowi dowi bowt kownkow Persia hai Media pren ari aiang bowih kowi pacham ruiah lah. Now mang Vasti lak-e lang iung mih masiuüa lowk ia kowi pe chowmah mang diah.20En kowh nami ana pek mih en pren kowi kowh arah maten kowi krawi phuang hanow iawngpa mih masiuüa hai ringkaw uowima mih masiuüa mih amatni huauüa kowi naringkaw kown towbowt,” pakhai.21Memukan kowh prengia dow mang hai maru iukuüa mih nauta bowk khai. Naiawng rakowi mang dow Memukan tek iawng chang lup khai.22Aia dow chowlowkkow kim kowi kachakuüa nachowng kim iah kown mih hai kachakuüa tek iawng kimchakuüa nachün kown mih lawnguan aia pren kowi kowh arah towng kowi krawi sak cha khai. Naiawng aia krawi sak cha mih dow arah towng kowi kowh chowlowkkow maru-uüa kowh cha hai chowlowkkow chenchap lai hown chekhai.
The Seed Company