Lai Ching7
1Asung khakma mih paingbawng lak-e ming iung nang iung lang iung,now uang dia mih ni lak-e kowng mih ni lang iung chekhai.2Pawi kim kowi cham tawi mih lak-e uowila uiting uangtak mih kim kowi tawi mih lang iung.Tawngplawng kowchow panow pani dowi now pani dow nakowng bowk kown mih chowtaih.Naiawng rakowi bowkbowk nakowng kown mih sak kowi natowah bowk kown takla.3Apiaw apama uowi mih lak-e akawm akratma hown uowi mih lang iung.Tawngplawng kowchow panow akawm akratma powm iawng uowi chepawsak lak kowi apiaw apama nowngia uowi chekhai.4Chanlaima mih maru dow kowng kown mih lawnguan kowi ahuma tuak reng.Tawkche bualama mih maru dow naka khin iung kown mih krowngchow taih tuak reng.5Bualama miuüa kowh meng sünta mih tawngpaw mrawk dowi,nami lak-e dow chanlai miuüa kowh nang klow sünta mih lang iung.6Chuh mung sawp dow maih kowi pawk prakrak kam now lüa mit reng,nami iawng bualama miuüa kowh ren dow lüa rim reng.Nami paw tawngpaw auan uowi dowi chekhai.7Nowng chang powng chang lup dow chanlaima mih maru kowi bualama changah reng,bümsua dow aiungma mih maru kowi sürlawkma changah reng.8Lowra mih lup auown lak-e achur lang iung,now bawrira lak-e kunma thawngma mih lang iung.9Kunmaraura dow bualama miuüa sak kowi kowh uowi mih chowtaih.Naiawng rakowi en kowh sak kowi alenma hangkow pe kunmarauah diah.10“Tawngplawng kowchow kawmat kowh chowng lak-e alai kowh chowng lang iung khai?” pami hang krawi lünta diah.Tawngplawng kowchow panow naiawng krawi lünta mih dow chanlaima mih maru kowh lup nadowi chekhai.11Chanlaira dow dawngthawnguan iawng aiungma mih chap chekhai.Nami dow sing uowi mih maru-uüa vüi aiungma chekhai.12Chanlaira dow tangka pawisa iawng maru kowi pe thaulangra reng.Tawkche chanlaira dow nowng pe singra rakowi lang iung chekhai.13Thurai kowh lup dow hawt pawah kaneu diah,aia khawnta mih dow miapaw nowng teng dowi bowt chekhai.14Piaw khin khe piawah diah.Tawkchedow lusa maru vüi Thurai tow pe piaw khin mih iawng,akrat pusara khin paw Thurai towla chekhai pami tuakah diah.Chownglawng kowi aiungma mih khin hai angakma mih khin hawt pawah bowk diah.Tawngplawng kowchow panow chownglawng kowi tawng chow naown kown mih tukah dowi chekhai.15Ang kowh mami auan uowi dowi mih chownglawng kowi ang khi bowk chekhai.Anowmma mih maru dow aia kowh anowm rakowi tapiak reng,now maru ngak dow aia kowh angak rakowi ning kawmma singla khai.16Naiawng rakowi aiungma hai chanlaima nauowi kown mih hangkow kamrüt diah,naiawng uowi kown kamrüt lai now kowmatia kowi tapiak mih chekhai.17Tawkche angakma hai abualama paw hang uowi diah,naiawng uowi hanow akhin nadowi tak khe akowng natakla tarawng.18Naiawng rakowi nami lawnguan kowi pe ching kaneu diah.Thurai kowi ringkaw mih maru dow aiung paw angak paw achütma chang dowi chekhai.19Marow lowk kowi kruitown mih hamüt ia nowng chang aiung mih lak-echanlaira dow chanlaima mih maru lowk ia kowi lang nowng chang pe iungra chekhai.20Lusa kowi dow chang lup ngak dowi mih miapaw uowi dowi,atungma hing changta lup iung hüah mih miapaw uowi dowi chekhai.21Maru tek mih srui kowi hang cham pe param diah,cham pe param lai now en kowh nar pe en piati mih en nata tarawng.22Tawngplawng kowchow panow en sak kowi en tuk towbowt,en matia paw maru kowi cham pe piati mih ahuma khowk chekhai.23Naiawngün ang kowh chanlaira hown ang chaingah kowh ang tek mih,“Chanlaima mih maru ang phaw ngengche kown,” pakhai.Tawkche nami dow ang hownia alakma chekhai.24Chownglawng kowh auan mia chow nowng tuk?Nami dow lainowmma büp khai; miapaw nowng tukah dowi chekhai.25Lowra sia natuk kown mih ang sangkrang khai,lowra mih auan natukla kownkow ang kowh chanlaira hown ang krawi cham khai.Tawng rakowi chow angakma hai bualama mih maru uowi?Nami lawnguan kowi tuk kown mih ang sangkrang khai.26Masiuüa ngak dow kowng lak-e paw nga mih ang tuk khai;aia kowh sakraura ka mih dow leng kowi tasowk mih iawng natasowk kown,now aia dawiah mih maru dow lawngha leng kowi tatawm mih iawng naown kown.Maru ngakuüa dow nami masiuüa rut kowi natasowk hai natatawm kown.Tawkche Thurai sak-ih iawng uowi mih maru dow aia rut hownia naplai kown.27Prengia pek mih tek mih, “Chownglawng kowh auan natukla kownkow ang kamrüt khai,now naiawng ang chang mih khin khe masiuüa lawnguan kowi ditchowchi ditchowchi ang krawi tuk khai.28Akeng mih lawnguan kowi natuk kownkow ang krawi cham ngamlam khai.Nachenganchepaw ang krawi ka cham dowi chekhai.Tawkche athawng ia maru pungmadawng kowi achinawmma mih kachakuüa dow ang khi lowk ia.Nachenganchepaw nami pungmadawng kowi masiuüa tarapdow lowk ia paw ang khi dowi chekhai.29Mami chowtaih ang tuk khai:Lusa maru kowi Thurai thawpah mih dow achinawmma nauowi kown mih chowdiah.Tawkche lusa maru mih amatni kowh tiama kowi mang bowk chekhai,” pakhai.
The Seed Company