Plan Rui33
Mosi kowh achur prasi
1Mosi dow Thurai maru chekhai. Aia dow kowng dowi tak khe maiawng hai Israeluüa kowi pela prasi khai:2“CHAKRAMANG dow Sinai hungh hownia uang khai,aia dow Seir hungh kowi sat iawng uang lawt khai,aia dow Paran hungh hownia aia maru-uüa luk kowi krawi sawt anowi khai.Aia hown dow athawng aiawng kramamu-uüa uang tawi khai,aia hawmlawm rut kowi dow maih lün pluplup chekhai.3CHAKRAMANG dow aia maru-uüa kowi sakrauah reng,aia dow aia kowh maru-uüa kowi lawngah reng chekhai.Aia maru-uüa dow aia kowh laiklow chün reng,now amatni dow aia kowi chupiiaah reng chekhai.4Mosi dow pe a-i ari aiang khai,nami ari aiang dow Jakawb krungchakuüa vüi asung uowima chekhai.5Israel aluchowuüa hai amatni kowh krungchakuüa dow arasang uang takua talawm khai.Nakhowk khe CHAKRAMANG dow Israel pren mang chowng khai bowt,” pakhai.6Reuben krungchak lawnguan kowi Mosi tek mih,“Reuben dow pacham sing uowi reng lah,aia dow hang pacham kowng lah;nachenganchepaw aia krungchak dow hang pacham prung lah,” pakhai.7Juda krungchak lawnguan kowi Mosi tek mih,
“Aw CHAKRAMANG, Juda awr lüah mih sünta pe diah;aia kowi dow akeng krungchakuüa hown kuaah lawmah diah.Aia kowi dow peah kür diah,aia kowh ransu-uüa kowi en tawi sen pe diah,” pakhai.8Levi krungchak lawnguan kowi Mosi tek mih,
“Levi krungchak dow en kaah sakowm mih nar chekhai,amatni tut-e dow en kowh Thumim hai Urim uowi khai.Masa pami arah kowi amatni kowi dow en chaingah khai,Meriba tuikuam re-e amatni hown dow en tanang khai.9Amatni dow en kowh ana pek chün khai,amatni dow en tow pe mih sangbowk laitawm iawng chang khai.Naiawngün rirow dow amatni tut-e apankrima chekhai;naiawngün dow amatni kowh upa-uüa lak-e asung lang uowi,amatni kowh tainau-uüa hai chauüa lak-e paw asung lang uowi chekhai.10Amatni dow Jakawb kowi en kowh ana pek sangah reng,Israel kowi dow en kowh ari aiang sangah reng chekhai.Amatni dow en pur kowi nam iungma mih maikhük towk reng,en kowh phuchuara luk kowi dow tikah mih uanap chang reng chekhai.11Aw CHAKRAMANG, amatni kowh dawngthawnguan kowi peah prasi diah,amatni changah mih lup srui dow en tawi awmrawm pe diah.Amatni kowh ransu-uüa kowi piakta pe bowk diah,nahanow ransu-uüa dow amatni kowi nauang senah kown nadowi bowt,” pakhai.12Benjamin krungchak lawnguan kowi Mosi tek mih,
“CHAKRAMANG dow Benjamin krungchak kowi sakrauah khai,amatni dow aia tut-e aiungma uowi khai.Amatni kowi dow atungma aia lawngah reng chekhai,amatni pren kowi dow CHAKRAMANG tawi uowila khai,” pakhai.13Josef krungchak lawnguan kowi Mosi tek mih,
“Josef krungchak kowh pren kowi dow CHAKRAMANG pacham peah prasi lah;aia dow kuang hownia uang tui pacham peah lah,aia dow krawng dak hownia paw krawng dawng tui pacham peah lah.14Sat den hanow uih-ak dow aiungma pacham phaw lah,khin towng uih-ak dow aiungma pacham phaw lah.15Alai chowng khe kowh hungh hownia dow luprak aiungma pacham ka lah,Chowngchowng saksakma mih hungma mawngma süng hownia luprak ahuma pacham ka lah.16CHAKRAMANG dow singh plum dawng kowi kowh maih lün pluplup mih kowi uang tatüng khai;nami CHAKRAMANG dow aia kowi pacham peah prasi lah,aia pren kowi dow lusa kowi kowh lang iung mih luprak pacham phaw lah.Maiawngün prasi dow Josef krungchak luk kowi pacham kla lah.Tawngplawng kowchow panow aia dow atainau-uüa pungmadawng kowi aluchow chekhai.17Josef dow chiala iawng akürma chekhai,aia kowh dow chiarowngla kowh iawng anang uowi pre buk;aia kowh nang dow achapa Efraim hai Manase iüah chekhai.Efraim krungchak kowh siphai hawmh dow lakh lakh chekhai,Manase krungchak kowh siphai hawmh dow athawng aiawng chekhai.Naiawngün siphai hawmh hown dow palusama kowi kowh chenchap kowi aia nakrawi senah kown,aia dow prenchur nammowt kowi kowh chenchapuüa kowi pat nasenla bowk kown,” pakhai.18Zebulun hai Isakar krungchak lawnguan kowi Mosi tek mih,
“Zebulun krungchak dow sata kowi kowh kun changra hownia pacham phaw lah,Isakar krungchak dow kim arasang hownia pacham phaw lah.19Amatni dow hungh kowi maru-uüa kowi nahawah kown,now nakowi dow achinawmma mih phuchua nachang büah kown.Tawngplawng kowchow panow amatni dow sata hownia naka dawngthawnguan kown,sephung kowi dupta hüah mih dawngthawnguan naka büah kown,” pakhai.20Gad krungchak lawnguan kowi Mosi tek mih,
“Thurai dow akiow pauowi lah,aia dow Gad krungchak kowi pren sünghi naphia pe kown.Gad krungchak dow ransu-uüa kowi krangsi iawng nahawt chawngah kown,amatni dow amatni kowh ransu-uüa kowi nasenah kown,now ransu-uüa kowi nadita nak büah kown.21Israel chowlowkkow krungchak aluchowuüa dow takua talawm khai,amatni dow arah lang iung mih Gad krungchak kowi khowm pe khai,amatni kowi dow aluchowuüa kak tataing mih arah pe pe khai.Gad krungchak dow CHAKRAMANG kowh ana pek chün khai,amatni dow Israel vüi kowi kowh CHAKRAMANG peah mih rirow paw chün khai,” pakhai.22Dan krungchak lawnguan kowi Mosi tek mih,
“Dan krungchak dow krangsila powrchow iawng chekhai;amatni dow Basan pami arah hownia uang iowr khai,now amatni kowh ransu-uüa kowi uang senah büah khai,” pakhai.23Naptali krungchak lawnguan kowi Mosi tek mih,
“Naptali krungchak luk kowi dow CHAKRAMANG kowh saksing sanara atekma,CHAKRAMANG kowh prasira dow amatni luk kowi atekma chekhai;amatni kowh pren sünghi aphiama chekhai.Nami dow Galili sata hownia mrawkphak pra kowh pren mowr chekhai,” pakhai.24Aser krungchak lawnguan kowi Mosi tek mih,
“Aser krungchak dow akeng krungchakuüa lak-e nalang ka prasi kown,amatni kowi dow amatni kowh tainau-uüa nalang sakrauah kown.Amatni kowh pren kowi dow lainowmma kanrawn sau naphaw kown.Naiawng rakowi aia dow kanrawn sau hown nasau khawk kown.25Amatni kowh marow tapplawt dow akhawtma pauowi lah,marow tapplawt klia dow lawngha hai kri pana lah.Amatni dow akürma pacham phaw lah,amatni sing uowi mowr dow aiungma pacham uowi lah,” pakhai.26“Aw Israeluüa, enni kowh Thurai iawng mih miapaw uowi dowi chekhai,aia dow nauang khowng enni kownkow mukuang kowi kowh uangnim dawng iawng uang reng.27Chowngchowng saksakma mih Thurai dow enni kowh tatung tanimra chekhai,aia kowh achowngma kür hown aia mih lawng enni reng.Enni kowh ransu-uüa kowi aia mih enni pur hownia prütta enni reng,aia tek mih, ‘Naiawngün ransu-uüa kowi piakta büa diah,’ pakhai.28Naiawng rakowi enni Israeluüa dow aiungma nauowi kown,enni Jakawb krungchak tut-e dow phih nauang ting kown nadowi.Enni nauowiah kown mih pren kowi dow kuang hownia uang nauang kown,nahanow luprak hai grep tui sar dow lainowmma naphaw kown.29Aw Israeluüa, enni dow ka prasi mih maru chekhai!Enni dow CHAKRAMANG lawng enni mih chenchap chekhai;enni iawng mih chenchap dow miapaw uowi dowi.Aia mih kawngma iawng towkala enni reng,aia mih saidawng iawng pe awng enni reng chekhai.Ransu-uüa dow kram kowh enni pur kowi nachürla kluk kown.Nachenganchepaw amatni kowi dow enni nanün nathuaah kown,” pakhai.
The Seed Company