Plan Rui27
Ebal hungh kowi nathawp phuchuara kown mih
1Israel lawngtang aluchowuüa hown taiua iowngah hanow maru kawmuüa kowi Mosi tek pe mih, “Ani kowh ang pe enni mih ana pek maten dow enni nachünah kown.2Enni dow napown Jawrdan aw kown chowbowt. Now CHAKRAMANG enni pipu-uüa kowh Thurai kham enni mih pren kowi enni nakowkup kown chowbowt. Nakowi dow iawn tui, kuai tui hai tawng chap paw akhawr uowi dowi chekhai. Nakowi enni kowting mih ni khe dow Ebal hungh kowi aiuk aiukma mih hua enni nachowk sangrum kown, now naiawngün hua luk kowi dow enni namia pe thundi kown. Nami kung kowi dow naiawngün hua luk kowi maiawngün ari aiang maten mih enni naruiah kown.5Now nami hungh kowi dow CHAKRAMANG enni kowh Thurai vüi hua hown enni nathawp phuchuara lowk kown. Tawkche naiawngün hua dow enni kowh rutchün khawkleng hown enni naia bawpah kown nadowi.6CHAKRAMANG enni kowh Thurai vüi kowi kowh nami phuchuara dow hua hown enni nathawpah kown. Tawkchedow naiawngün hua mih enni nabawpah kown nadowi. Nami phuchuara luk kowi dow CHAKRAMANG enni kowh Thurai vüi tikah mih uanap pawi enni nachang pe kown.7Now nami re-e dow taking tasangra uanap pawi paw enni nachangla kown. Nami uanap pawi kowi kowh chakkham dow enni nacha nakham hanow CHAKRAMANG pur kowi enni napiaw kown.8Enni chowkah mih hua luk kowi dow maiawngün ari aiang laiklow maten mih achimma enni naruiah kown,” pakhai.9Nami kung kowi uamowuüa hown taiua iowngah hanow Mosi tek pe Israeluüa mih, “Aw Israeluüa, ririmma sünta büa diah. Ani dow CHAKRAMANG enni kowh Thurai aiamat kowh maru enni chowng khai bowt.10Naiawng rakowi aia tek mih srui enni nachün kown. Ani kowh ang pe enni mih ana pek hai rirow maten dow enni nachünah ngengche kown,” pakhai.11Nami ni khe maru kawmuüa kowi Mosi peah ana mih,12“Enni pown Jawrdan aw kung kowi Simiawn krungchakuüa, Levi krungchakuüa, Juda krungchakuüa, Isakar krungchakuüa, Josef krungchakuüa hai Benjamin krungchakuüa dow Gerizim hungh kowi nakowiowng kown. Now naiawngün maru-uüa kowi dow CHAKRAMANG kowh prasi lai naphuang pe kown.13Now Reuben krungchakuüa, Gad krungchakuüa, Aser krungchakuüa, Zebulun krungchakuüa, Dan krungchakuüa hai Naptali krungchakuüa dow Ebal hungh kowi nakowiowng kown. Now naiawngün maru-uüa kowi dow CHAKRAMANG kowh piati lai naphuang pe kown.14“Nami khin khe Leviuüa dow hek se mami laiklow mih Israeluüa maten pur kowi natek kown.15“Amatni natek kown mih, ‘Thawp arup mih hai kukpa chup rup mih maru dow pacham ka piati lah. Singh hown thawpah mih chepaw, hua hown thawpah mih chepaw, lowra mih uanh hown thawpah mih chepaw naiawngün arup dow uanh thawp sarauüa thawpah mih chowtaih. Naiawngün arup dow CHAKRAMANG suiah mih chekhai,’ napa büah kown. Nakhowk khe maru kawmuüa mih, ‘Amen,’ pahai natek kown.16“‘U-pa kowi ringkaw dowi mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.17“‘Kowmatia klowkchakuüa kowh rihi matra krawi sütsowi mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.18“‘Mik duma mih kowi tiama tawima mih prakowi pawla mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.19“‘Prenlang maru-uüa kowi, saratchow chauüa kowi, mamaimowuüa kowi chet pe tara nowm dowi mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.20“‘U-uai hown kowh taphua taiua mih maru dow pacham ka piati lah. Tawngplawng kowchow panow naiawng mih maru dow a-pa kowi ringkaw dowi mih chekhai,’ napa büah kown. Nakhowk khe maru kawmuüa mih, ‘Amen,’ pahai natek kown.21“‘Tawncher hown kowh taphua taiua mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.22“‘Pa-uai hown kowh chama chepaw, u-uai hown kowh chama chepaw kowmatia tuamow hown kowh taphua taiua mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.23“‘Api hown kowh taphua taiua mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.24“‘Kukpa sai maru mih dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.25“‘Angak uowi dowi mih maru kowi saita kownkow paw bümsua mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown.26“‘Mami ari aiang laiklow chün kown nau dowi mih maru dow pacham ka piati lah,’ napa büah kown. Nakhowk khe maru kawmuüa mih, ‘Amen,’ pahai natek kown,” pakhai.The Seed Company