2 Samuel11
1Chungrau khin chur prakowi dow manguüa mih cham tasen reng chekhai. Paning khe dow mang David mih cham tasen kownkow Joab hai aia kowh siphai aluchowuüa hailawm Israel siphaiuüa maten kowi cham chinah khai. Amatni dow Amawnuüa kowi kowsenah khai, now Amawnuüa kowh Rabba marow kri mih umta pe lut büah khai. Nachenganchepaw David dow Jerusalem marow kowi ta uowi khai.2Now akat khe sat kowi prakowi David mih aia mawk rah hownia awr rü hanow aia kowh kimluk kowi kowlen khai. Nami khin khe aia dow kimluk hownia masiuüa lu tui mih khi lowk ia khai. Nami masiuüa dow klangiungma chekhai.3Nami masiuüa lawnguan kowi nakrawi paw satang kownkow David mih kowchin maru lowk ia khai. Now nami maru uang tek pe mih, “Paimi masiuüa ming dow Betseba chekhai. A-pa dow Eliam, now ahua dow Hit chenchap Uria chekhai,” pakhai.4Now nami masiuüa kowi nauang pawla kownkow David mih kowchin maru khai. Now nami masiuüa uang hanow aia kowi dow David hawt phua iuaah khai. (Nami khin khe aia dow uisawng uowi khe kowh asürlawkma mih hownia tachim tasai krowngchow taih tak chekhai). Nami kung kowi aia dow kim kowi mang khai bowt,5now akung kowi dow aia kum nau mih aia tatuk khai bowt. Nahanow nami satang dow David kowi aia uang krawi phowng pe khai.6Nakhowk khe David mih Hit chenchap Uria kowi aia tut-e nauang hawla kownkow Joab tut-e kowchin maru khai. Naiawng rakowi Joab dow Uria kowi David tut-e uang chin pe khai.7Uria uang ting hanow David mih Joab hai aia kowh siphaiuüa satang hown tasen lawnguan aia kowi hawt lüntaah khai.8Nami kung kowi David tek pe Uria mih, “Kim kowi kowmang diah, now sau bawng sau pang hanow tanai diah,” pakhai. Nahanow Uria dow mang kim hownia lawt khai bowt, now aia kowi dow David krawi sa pe awmrawm sung khai.9Nachenganchepaw Uria dow aia kim kowi kowmang dowi chekhai. Aia dow mang kowh kangchawng miuüa hown mang kimplawt re-e tawi müi khai.10Nami laiklow dow David kowi maru kowtek pe khai. Now David tek pe Uria mih, “Tasenra kowi en cham uowi mih akrama khowk nadowi bow? Nachenganchepaw tawngplawng kowchow kim kowi en kowmang dowi?” pakhai.11Uria tek pe David mih, “Sangbowk laitawm tawkpla hown Israel kowh siphai hawmh hai Juda kowh siphai hawmh cham uowi mih dow tangbung kowi chowtaih. Now ang kowh siphai aluchow Joab hai aia kowh maru-uüa cham khup tangbung mih paw dowm kowi chowtaih. Nami kowi tawng iawng chow kim kowi ang nakowmangah kown? Now kowcha kowkham now masi hown tawng iawng chow ang kowtaiua müiah kown? Ang uam kham sawi, naiawng mih lup dow katpaw ang nachang kown nadowi,” pape khai.12Nakhowk khe David tek pe mih, “Ani paw makowi uowi diah towbowt. Tharau khe tasenra kowi ang pe mang en kown towbowt,” pakhai. Naiawng rakowi Uria dow nami ni hai auai ni paw Jerusalem marow kowi uowila khai.13Now David mih aia hown natawi taiua cha iak hawm kownkow Uria kowi hawah khai. Now Uria kowi dow pua pat aia pe khamah arak khai. Tawkchedow nami iak paw Uria mih kim kowi kowmang dowi chekhai. Aia dow David kowh kangchawng miuüa tut-e tawi plan müi khai iawk.14Auai rau dow David mih Joab vüi rui chasak lowk hanow Uria kung krawi sa pe khai.15Nami chasak kowi David krawi rui pe mih, “Tasenra kowi kowh kramra lang uowi mih arah kowi Uria kowi pe rik khüaah diah, now aia kowi dow akung hownia enni napowtta pe kown. Nahanow aia dow ka arau now nakowng kown towbowt,” pakhai.16Naiawng rakowi kowrum marow mih khin khe Joab dow lang kür mih ransu-uüa hown natasen kownkow Uria kowi chinah khai.17Akung kowi marowchakuüa dow uang lawt hanow Joab hai aia kowh siphaiuüa kowi uang senah khai. Nakhowk khe David kowh siphaiuüa mih kowng sangrum khai. Now Hit chenchap Uria paw tawi kowng khai.18Nami kung kowi dow Joab mih tasenra kowi kowh satang maten David kowi nauang phowng pe kownkow kowchin maru khai.19Nami maru kowi Joab krawi tek pe mih, “Tasenra kowi kowh maiawngün satang maten David kowi kowphuang pe diah.20Naiawngün satang en tek pe kung kowi aia dow nakunmarau chepaw naia kown. Now maiawng aia natek en chepaw naia kown, ‘Tasen kownkow tawngplawng kowchow marow hown atawnchow enni kowtuk kowi khai? Tap luk hownia salangba hown naap enni kown mih enni tuk dowi bow?21Thebez pami arah kowi Gideawn kowh chapa Abimelek tawng iawng chow kowng mih enni ka tuak dowi bow? Abimelek kowi dow kawm küa müa hua hown tap luk hownia masiuüa lowk ia mih iu kuakah khai. Nahanow Abimelek dow nakowi hing kowng khai. Naiawng chepaw tawngplawng kowchow tap hown atawnchow enni kowtuk kowi khai?’ napa kown. Naiawng che aia tek en khai hanow Hit chenchap Uria kowng tüng khowk padow en natek pe kown,” pakhai.22Nami maru dow David tut-e kowtowm hanow Joab krawi pe tekah mih laiklow maten David kowi tek pe khai.23Aia tek pe David mih, “Ransu-uüa dow nauang sen anging kownkow marow hownia uang lawt hanow dowm kowi uang büah khai. Nachenganchepaw amatni kowi dow marow tapplawt mowr anging kawikrawiah khai.24Nami khin khe ransu-uüa dow tap luk hownia salangba hown iu ap anging khai. Nahanow en kowh siphaiuüa dow kowng sangrum khai. Now Hit chenchap en kowh nar Uria paw tawi kowng khai bowt,” pakhai.25David tek pe mih, “Joab kowi en kowtek pe kown mih, ‘En mih hangkow sak nga diah. Tawngplawng kowchow panow tasenra kowi dow lowra maru kowng reng chekhai. Marow mih asaima piak pat phai senah ngamlam diah,’ pape diah. Now Joab kowi peah süngürra diah,” pakhai.26Now Uria kowh masi dow ahua kowng mih satang tata hanow uowila uiting uangtak khai.27Uowila uiting uangtak mih khin chur kung kowi dow David mih aia kim kowi Betseba kowi uang pawla khai. Now aia dow Betseba kowi chawngah khai, now amatchi dow ka chapa lowk ia khai. Tawkche naiawng David chang mih CHAKRAMANG dow sak-ih dowi chekhai.
The Seed Company