2 Samuel10
1Nami kung kowi Amawnuüa kowh mang Nahas dow kowng khai bowt. Now achapa Hanun dow aia takcha kowi ta chowm mang khai.2David tek mih, “Hanun kowh pa Nahas ang luk kowi kaah sakowmma uowi iawng achapa Hanun luk kowi paw kaah sakowmma ang nauowi pe kown,” pakhai. Naiawng rakowi Hanun kowh pa kowng mih lawnguan kowi nakowtawi tek pe sakklamra laiklow kownkow David mih aia kowh maru iukuüa kowi kowchin pe pre sum ia khai. Nahanow David kowh maru iukuüa dow Amawnuüa pren kowi kowkowi khai bowt.3Nachenganchepaw nakhowk khe mang Hanun kowi Amawnuüa kowh aluchowuüa uang tek pe mih, “En pa kowi ringkawah rakowi nauang tek en sakklamra laiklow kownkow naiawngün maru-uüa kowi David uang chinah mih pabow en ka tuak? Naiawngünuüa kowi David uang chinah mih dow a-i kowh marow krawi kumüla hanow akung kowi uang ta sen a-i kownkow chowbowt,” pakhai.4Naiawng rakowi Hanun dow David kowh maru-uüa kowi hawt khümah khai. Now amatni kowi dow papra chowchi khaita pe mawmpawi khai, now kowrmow athawngma mih paw kelang mowr chi kepta pe bowk khai. Mang Hanun dow naiawng amatni kowi peah rukrai hanow chinta khai bowt.5Nakhowk khe amatni dow kim kowi kowmang kown mih lainowmma rukrai khai bowt. Naiawngün lawnguan dow David kowi maru kowtek pe khai. Now David dow naiawngün maru hown nauang takrum kownkow kowchin pe maru pre sum ia khai. Nakhowk khe David krawi tek pe mih, “Enni kowh mawmpawi adawngma awr awm dowi mowr Jeriko marow kowi uowi büah diah towbowt. Nami kung kowi phai uang mang büah iang,” pakhai.6Now Amawnuüa dow amatni kowi lainowmma David kunmarauah mih tuk khai bowt. Naiawng rakowi Amawnuüa dow amatni tatawn taret mih pren hownia cham nga siphaiuüa khai. Naiawngün siphaiuüa dow Bet-Rehawb hai Zoba pami arah hownia khawk hown kowh mang mih Siriauüa 20,000 ia, Maka pren mang hai aia kowh siphaiuüa 1,000 ia, now Tawb pren hownia kowh siphaiuüa 12,000 ia chekhai.7Nami satang tata hanow David dow Amawnuüa kowi nakowsenah kownkow Joab hai aia kowh siphaiuüa maten kowi kowchinah khai.8Amawnuüa kowh siphai hawmh dow natasen kownkow uang lawt hanow marow tapplawt kowi uang uowi büah khai. Now Zoba hai Rehawb pami arah hownia kowh Aram siphaiuüa, Tawb hai Maka pren hownia kowh siphaiuüa mih natasen kownkow dowm kowi uowi büah khai.9Now Joab dow aia pur prakowi hai kung prakowi Siria siphaiuüa uowi mih khita khai. Naiawng rakowi aia dow aia siphaiuüa kowi ruiah sangrum hanow Siria siphaiuüa kowi nasenah kownkow towah khai.10Now akeng mih siphaiuüa kowi dow ataimow Abisai rut kowi ap pe khai. Now amatni kowi dow Amawnuüa kowi nasenah kownkow towah khai.11Joab tek pe ataimow mih, “Siriauüa che ang lak-e lang kür khai hanow en nauang khowng ang kown takla. Now Amawnuüa che en lak-e lang kür khai hanow ang nauang khowng en kown taih.12Sakkraingma hown a-i uowi diah sik! Now a-i kowh maru-uüa vüi hai a-i kowh Thurai kowh marow maten vüi sakkraingma hown a-i dowk tasen diah sik. CHAKRAMANG mih aia tut-e iung iawng naia changla kownkow ang nachup a-i Thurai kown taih,” pakhai.13Now Joab dow aia kowh siphaiuüa hown Siriauüa kowi nakowsenah kownkow tarü khai bowt. Nakhowk khe Siriauüa dow amatni pur hownia powt khai.14Naiawng Siriauüa powt mih khita hanow Amawnuüa paw Abisai pur hownia powt khai, now amatni dow marow kowi kowkup khai. Naiawng rakowi Joab dow Amawnuüa hown tasenla dowi kowi Jerusalem marow kowi plan khai.15Siriauüa dow Israeluüa kowi nowng dowi bowt mih tuk hanow arasang takua talawm büah khai.16Now mang Hadadezer dow Iufratis aw paipra pown kowi kowh uowi mih Siriauüa kowi nauang hawla kownkow kowchin maru khai. Nahanow Siriauüa dow Helam marow kowi uang büah khai. Now uang hawla mih maru-uüa luk kowi chang aluchow mih dow Hadadezer kowh siphai aluchow Sobak chekhai.17Nami satang tata kung kowi David mih Israel siphaiuüa maten kowi kuaah lawmah hanow haipown Jawrdan aw khai, now Helam marow kowi kowkowi büah khai. Now Siriauüa dow David hai aia kowh siphaiuüa kowi nakowsenah kownkow siphaiuüa kowi towah khai, now amatni dow kowbüah kowi senah khai.18Nachenganchepaw Siriauüa dow Israeluüa pur hownia plan powt khai iawk. Nakhowk khe David mih amatni kowh kawrnga kari te mih maru 700 ia kowi hai kawrnga kowi kowh chowm mih 40,000 ia kowi saita khai. Now amatni kowh siphai aluchow Sobak kowi paw nakowi aia saita khai.19Now amatni dow Israeluüa tut-e sum mih chowbowt pami Hadadezer nimkrüa kowi kowh uowi mih manguüa tuk khai bowt. Naiawng rakowi amatni dow Israeluüa hown taking tasangra laikham tatow büah khai bowt. Nahanow amatni dow Israeluüa kowh nar chowng khai bowt. Nami hownia bowt now Siriauüa dow Amawnuüa kowi natawi khowngah kown mih kram khai bowt.
The Seed Company