2 Manguüa14
1Juda pren kowi Joas chapa Amazia chowm mang mih dow Israel pren kowi Jehoahaz chapa Jehoas chowm mang mih pre ning khe chekhai.2Amazia dow 25 ning khe chowm mang khai. Aia dow 29 ning mowr Jerusalem marow kowi chowmla mang khai. A-u dow Jerusalem marow hownia kowh Jehoadin chekhai.3Aia dow CHAKRAMANG mik kowi aiungma mih lup chang reng chekhai. Nachenganchepaw a-pu David khowt dow lup iung aia chang dowi chekhai. Aia dow a-pa Joas chang iawng rowprowp lup maten changah khai.4Tawkche arah kroma mih kowi kowh chupiiara dow aia krawi piakta dowi chekhai. Naiawngün arah kowi dow maru kawmuüa mih tawncher hown chang phuchua reng chekhai, now nam iungma mih maikhük paw towk reng chekhai.5Aia dow nachowm mang kown mih alow ka hown krowksang a-pa kowi saita mih maru iukuüa maten kowi aia krawi saita bowk khai.6Nachenganchepaw aia dow Mosi rirow bowih kowi kowh arui uowi iawng naiawngün sai maru miuüa kowh chauüa kowi saila dowi chekhai. Tawngplawng kowchow panow Mosi rirow bowih kowi dow maiawng hai CHAKRAMANG kowh ana pek uowi khai, “Chauüa changta angak rakowi u-pa kowi naia kowngta kown nadowi, now u-pa changta angak rakowi chauüa kowi paw naia kowngta kown nadowi. Chang ngak mih maru chowtaih nakowng kown,” pakhai.7Amazia dow Awisa lawngrawi kowi Edawmuüa kowi saita 10,000 ia khai. Now Sela marow paw aia powngta pe khai, now nami marow dow Jawkthel pahai aia klowita pe ming khai. Nami dow kawmat pat Jawkthel marow pahai maru rükah reng tak chekhai.8Akat khe Amazia dow Israel mang Jehoas tut-e kowchin pe satang phowng mih khai. Jehoas kowh pa dow Jehoahaz chekhai, now Jehoahaz kowh pa dow Jeho chekhai. Aia krawi tek pe mih, “Uang madiah, achi tadowk tasen madiah sik,” pakhai.9Nachenganchepaw Israel pren mang dow laiuat hown Juda pren mang kowi krawi plan tek pe mih, “Akat khe Lebanawn hungh kowi kowh chuh mung dow Lebanawn hungh kowi kowh sidar singh kowi krawi phowng pe satang khai. Aia krawi tek pe mih, ‘En kowh chama kowi ang kowh chapa hown pe tachawngah diah,’ pakhai. Tawkche nami hungh kowi kowh kaurawng uaramchak dow nami chuh mung kowi uang thuata nak khai.10Edawmuüa kowi en nowngta khai kowh lainowmma en chang bawri. Enni awng mih kowi sak-ihma hown kim kowi uowi phülü büah. Nadowi now phih nauang ting kown. Nami phih dow en matia hai Judauüa vüi piakra naown kown,” pape khai.11Nachenganchepaw mang Amazia dow mang Jehoas kowh nami laiklow sünta pe dowi chekhai. Naiawng rakowi Israel pren mang Jehoas dow Amazia kowi uang senah khai. Amatchi dow siphai hawmh hown Juda pren kowi kowh Bet-Semes marow kowi tasen iüah khai.12Israeluüa dow Judauüa kowi nowngta khai. Now Judauüa dow chowlowkkow kim prakowi powt büah bowk khai.13Israel pren mang Jehoas dow Juda pren mang Amazia kowi Bet-Semes marow kowi khümah khai. Nami kung kowi dow Jehoas mih Jerusalem marow kowi kowkup khai, now nami marow tap dow Efraim tapplawt hownia Anui tapplawt mowr 400 muk aia krawi piakta pe khai.14Aia dow CHAKRAMANG kim hai mang kim kowi kowh kuh, tai hai akeng mih uanh maten pawla bowk khai. Nami klen kowi maru kowi paw khümla sangrum hanow Samari marow kowi aia plan khai.15Jehoas kowh akeng mih lup lawnguan maten, tasen awng mih lawnguan hai Juda pren mang Amazia hown tasen mih lawnguan dow “Israel Manguüa Lawnguan” pami bowih kowi arui uowi bowk chekhai.16Akung kowi Jehoas dow kowng hanow Samari marow kowi Israel manguüa tadupra kowi maru dupah khai. Aia takcha kowi dow achapa Jeroboam mih ta chowm mang khai.17Juda pren mang Amazia dow Israel pren mang Jehoas kowng kung kowi paw ta sing laitanga ning tak chekhai.18Amazia kowh akeng mih lup lawnguan maten dow, “Juda Manguüa Lawnguan” pami bowih kowi arui uowi bowk chekhai.19Jerusalem marowchakuüa dow mang Amazia kowi kingküaah ne khai. Naiawng rakowi aia dow Lakhis marow kowi cham powt khai. Nachenganchepaw maru kawmuüa dow nakowi kowchin maru hanow aia kowi kowkrawi saita khai.20Now aia kowh uak dow kawrnga luk kowi tangla hanow Jerusalem marow kowi uang pawla khai, now aia kowi dow David marow kowi kowh aia pipu-uüa tadupra kowi maru dupah khai.21Nami kung kowi dow Juda prenchakuüa mih a-pa Amazia takcha achapa Uzia kowi ta pe chowmah mang khai. Nakhowk khe Uzia dow laitaruk ningchow chekhai.22A-pa kowng kung kowi Uzia dow Elat marow ta plan thawp khai iawk, now nami marow dow Judauüa plan ka khai iawk.23Israel pren kowi kowh Samari marow kowi Jehoas chapa Jeroboam chowm mang mih dow Juda pren kowi Joas chapa Amazia chowm mang mih laitanga ning khe chekhai. Aia dow 41 ning mowr Samari marow kowi chowmla mang khai.24Aia dow CHAKRAMANG mik kowi angakma mih lup chang khai. Now Nebat chapa Jeroboam changah mih lup ngak dow aia paw chang khai.25Jehoas chapa Jeroboam dow Hamat marow hownia Sata Kowng mowr mih Israeluüa kowh rihi krawi plan powngta pe khai iawk. Naiawng phaw mih dow Gat-Hepher marow kowi kowh Amitai chapa risi Jona tut-e kowh CHAKRAMANG Israeluüa kowh Thurai laikham iawng chekhai.26Tawngplawng kowchow panow Israeluüa bowkbowk dow uowi nar mih lah, nar nadowi mih lah lainowmma kawm mih CHAKRAMANG khi khai. Amatni kowi dow nakhowngah kown mih miapaw uowi dowi chekhai.27CHAKRAMANG dow Israeluüa kowi asaima namata kown mih nau dowi chekhai. Naiawng rakowi aia dow Jehoas chapa mang Jeroboam kowi tawngah kengah khai, now Jeroboam dow Israeluüa kowi lawngah khai.28Jeroboam kowh akeng mih lup lawnguan maten, tasen awng mih lawnguan, alai kowh Judauüa krüa kowi uowi mih Damaska marow hai Hamat marow Israeluüa vüi tawng iawng chow aia plan kata pe iawk mih lawnguan dow “Israel Manguüa Lawnguan” pami bowih kowi arui uowi bowk chekhai.29Akung kowi Jeroboam dow kowng hanow Israel manguüa kowh tadupra kowi maru dupah khai. Now aia takcha kowi dow achapa Zekaria mih ta chowm mang khai.
The Seed Company