1 Samuel22
1Gat marow hownia powt hanow David dow Adulam marow re-e kowh puk kowi kowtapet khai. Nami satang tata hanow ataimowuüa hai a-pa kimchakuüa mih aia tut-e kowkowi khai.2Nami klen kowi kla phih miuüa, nowng sat lowi dowi rakowi kham ngare miuüa hai sak kowi ta-ihra uowi dowi miuüa maten paw David tut-e kowkowi khai. Naiawng hai David tut-e kowtakua talawm mih maru iun dow 400 ia ngia chekhai, now David dow amatni kowh aluchow chowng pe khai.3Nami kung kowi David mih nami hownia Moab pren kowi kowh Mizpe marow kowi kowkowi khai. Now Moab pren mang kowi aia tek pe mih, “Thurai naukrang ang tuk dowi mowr sakrauma hown a-u hai apa iüah kowi en tut-e towla diah snow,” pakhai.4Nami laiklow mang nauta pe hanow aia dow a-u a-pa iüah kowi uang pawla khai, now Moab pren mang tut-e uang towah khai. Akhawtma mih kangchawngra kim kowi David cham tapet mowr amatchi dow Moab pren mang tut-e tawi uowi khai.5Akung kowi Gad pami risi lowk ia tek pe David mih, “Mami akhawtma mih kangchawngra kim kowi hang uowi tham bowt. Judauüa süng kowi kowkowi bowt,” pakhai. Nahanow David mih nami hownia powt now Heret pami kaurawng kowi kowkowi khai.6Now David hai aia kowh maru-uüa kowi khita khowk pami satang akung kowi Sawl ta khai bowt. Nakhowk khe Sawl dow Gibeah marow re-e kowh hungh kowi painglang singh tut re-e chowm phülü khai. Nami khin khe aia dow reh dowkma chekhai, now aia kowh maru iukuüa maten dow aia riaret kowi iowngla rim chekhai.7Aia kowh maru iukuüa kowi Sawl tek pe mih, “Benjamin krungchakuüa low, sünta büa diah. Enni bowkbowk kowi krawng bawn hai grep krum Jese kowh chapa nape enni kown pabow? Enni bowkbowk kowi 1,000 ia siphai luk kowi kowh aluchow chepaw, 100 ia siphai luk kowi kowh aluchow chepaw aia nathawp enni kown pabow?8Naiawng now tawng rakowi chow enni bowkbowk kingküa ang kown mih enni tuk sangkrang khai? Jese kowh chapa hai ang chapa iüah tatow sangbowk laitawm mih enni tek ang dowi chekhai. Nami klen kowi kawmat ang kowh nar David kowi ang chapa tawi pe pe kür mih paw enni tekla ang dowi chekhai. Ang vüi kowi miapaw enni tuak dowi chekhai,” pakhai.9Nami khin khe Edawm prenchak Doeg paw Sawl kowh maru iukuüa ria kowi tawi uowi chekhai. Now Doeg tek mih, “Jese kowh chapa mih Nawb marow kowi kowh Ahitub chapa Ahimelek tut-e kowkowi mih ang khi.10Tawng chow David achang takla kown mih natukla kownkow CHAKRAMANG tut-e Ahimelek awr lünta pe khai. Nami klen kowi chakkham hai Filistin siphai Goliat kowh saidawng paw David kowi aia peah khai,” pakhai.11Nami laiklow tata hanow mang Sawl dow Ahitub kowh chapa uamow Ahimelek kowi hai Nawb marow kowi kowh chang uamow lup mih a-pa kimchakuüa maten kowi nakowhaw kownkow kowchin maru khai. Nahanow Ahimelek hai a-pa kimchakuüa maten dow Sawl tut-e uang khai bowt.12Nakhowk khe Sawl hawt tek pe mih, “Sünta, Ahitub kowh chapa,” pakhai.
Now Ahimelek klangah mih, “Tek bowt mangkri,” pape khai.13Now Sawl tek pe mih, “Nasaita ang kownkow Jese chapa enchi tawngplawng kowchow tuk sangkrang ang khai? Aia kowi dow kawm hai saidawng en peah khai, now aia lawnguan kowi tawng chow Thurai nau changah kown mih paw en awr lünta pe khai. Kawmat mowr pat nowng kingküala ang kownkow hai nanowng pawmla ang kownkow aia kowi en tawi khowngah khai,” pakhai.14Nakhowk khe Ahimelek klangah mih, “Mangkri, en kowh naruüa maten kowi en kowh mawkchow David iawng kaah sakowm mih maru mia chow uowi? Aia dow kawmat paw en kowh chawng mih siphaiuüa kowh aluchow chekhai, now en kimchakuüa pungmadawng kowi kowh ringkawra uowima mih mawkchow chekhai.15Tawng chow achang takla mih natukla kownkow Thurai tut-e David vüi ang awr lünta pe mih dow khaleng akatchow nadowk chekhai. David saita en kown nau mih lawnguan kowi tawngpaw ang tuk dowi chekhai. Naiawng rakowi aw mangkri, ang hai ang kimchakuüa luk kowi hauang tang anging aprek diah,” pape khai.16Nachenganchepaw mang tek pe iawk mih, “Ahimelek, en hai en kimchakuüa maten nakowng ngengche kown takla,” pakhai.17Nami kung kowi mang dow aia riaret kowi kowh uowi mih siphaiuüa kowi tek pe mih, “CHAKRAMANG kowh uamowuüa maten kowi kowkowiah now kowsaita büa diah. Kowbüah dow David prakowi tawi tangi mih maru chekhai. Now David powt mih paw tuk büah chekhai. Tawkchedow naiawngün lawnguan kowi tek ang büah dowi chekhai,” pakhai. Nachenganchepaw mang kowh siphaiuüa dow CHAKRAMANG kowh uamowuüa kowi natang rut kown mih miapaw nauta dowi chekhai.18Naiawng rakowi Edawm prenchak Doeg pami kowi mang tek pe mih, “Naiawng now uamowuüa kowi en phai kowsai bowt,” pakhai. Nami ni khe Doeg dow 85 ia uamow kowi saita khai. Naiawngün uamowuüa dow adipükchow mih la hown kowh ephawd kowrmow khupma kangowh chekhai.19Nami kung kowi Sawl dow uamowuüa kowh uowi rah Nawb marow kowi kowkowiah now nakowi kowh uowi mih maten saita bowk khai. Naiawngün dow masiuüa kachakuüa, ngeuüa hai ingrikchow, now chia, kawrngaramchük hai ruapur uowi mih maten chekhai.20Nakhowk khe Ahimelek kowh chapa Abiathar dow David tut-e kownowng powt khai. Ahimelek kowh pa dow Ahitub chekhai.21Now aia dow CHAKRAMANG kowh uamowuüa kowi Sawl saita bowk mih satang David kowi kowphowng pe khai.22Nami satang tata hanow David tek pe Abiathar mih, “Makha enni kowh marow kowi ang uang khe Edawm prenchak Doeg kowi ang khi hownia aia dow Sawl kowi kowtek pe ngengche kown pami ang ka tuak khai. En kimchakuüa kowng mih dow ang rakowi chekhai.23Ang tut-e tawi uowi towbowt, kaah kram dowi. Nasaita en kown kamrüt miuüa dow ang kowi paw nasaita ang kown kamrüt khai. Nachenganchepaw ang tut-e dow thaulangma en naia uowi kown taih,” pakhai.
Now Ahimelek klangah mih, “Tek bowt mangkri,” pape khai.13Now Sawl tek pe mih, “Nasaita ang kownkow Jese chapa enchi tawngplawng kowchow tuk sangkrang ang khai? Aia kowi dow kawm hai saidawng en peah khai, now aia lawnguan kowi tawng chow Thurai nau changah kown mih paw en awr lünta pe khai. Kawmat mowr pat nowng kingküala ang kownkow hai nanowng pawmla ang kownkow aia kowi en tawi khowngah khai,” pakhai.14Nakhowk khe Ahimelek klangah mih, “Mangkri, en kowh naruüa maten kowi en kowh mawkchow David iawng kaah sakowm mih maru mia chow uowi? Aia dow kawmat paw en kowh chawng mih siphaiuüa kowh aluchow chekhai, now en kimchakuüa pungmadawng kowi kowh ringkawra uowima mih mawkchow chekhai.15Tawng chow achang takla mih natukla kownkow Thurai tut-e David vüi ang awr lünta pe mih dow khaleng akatchow nadowk chekhai. David saita en kown nau mih lawnguan kowi tawngpaw ang tuk dowi chekhai. Naiawng rakowi aw mangkri, ang hai ang kimchakuüa luk kowi hauang tang anging aprek diah,” pape khai.16Nachenganchepaw mang tek pe iawk mih, “Ahimelek, en hai en kimchakuüa maten nakowng ngengche kown takla,” pakhai.17Nami kung kowi mang dow aia riaret kowi kowh uowi mih siphaiuüa kowi tek pe mih, “CHAKRAMANG kowh uamowuüa maten kowi kowkowiah now kowsaita büa diah. Kowbüah dow David prakowi tawi tangi mih maru chekhai. Now David powt mih paw tuk büah chekhai. Tawkchedow naiawngün lawnguan kowi tek ang büah dowi chekhai,” pakhai. Nachenganchepaw mang kowh siphaiuüa dow CHAKRAMANG kowh uamowuüa kowi natang rut kown mih miapaw nauta dowi chekhai.18Naiawng rakowi Edawm prenchak Doeg pami kowi mang tek pe mih, “Naiawng now uamowuüa kowi en phai kowsai bowt,” pakhai. Nami ni khe Doeg dow 85 ia uamow kowi saita khai. Naiawngün uamowuüa dow adipükchow mih la hown kowh ephawd kowrmow khupma kangowh chekhai.19Nami kung kowi Sawl dow uamowuüa kowh uowi rah Nawb marow kowi kowkowiah now nakowi kowh uowi mih maten saita bowk khai. Naiawngün dow masiuüa kachakuüa, ngeuüa hai ingrikchow, now chia, kawrngaramchük hai ruapur uowi mih maten chekhai.20Nakhowk khe Ahimelek kowh chapa Abiathar dow David tut-e kownowng powt khai. Ahimelek kowh pa dow Ahitub chekhai.21Now aia dow CHAKRAMANG kowh uamowuüa kowi Sawl saita bowk mih satang David kowi kowphowng pe khai.22Nami satang tata hanow David tek pe Abiathar mih, “Makha enni kowh marow kowi ang uang khe Edawm prenchak Doeg kowi ang khi hownia aia dow Sawl kowi kowtek pe ngengche kown pami ang ka tuak khai. En kimchakuüa kowng mih dow ang rakowi chekhai.23Ang tut-e tawi uowi towbowt, kaah kram dowi. Nasaita en kown kamrüt miuüa dow ang kowi paw nasaita ang kown kamrüt khai. Nachenganchepaw ang tut-e dow thaulangma en naia uowi kown taih,” pakhai.
The Seed Company