1 Samuel20
1Nami kung kowi dow David mih Rama marow kowi kowh Naiawt hownia powt now Jonathan tut-e kowkowi khai. Now Jonathan kowi aia tek pe mih, “Tawng chow ang changta khai? Ang kowh atawi ama tawng chow? En pa luk kowi tawng angak chow ang changta khai? Tawngplawng kowchow nasaita ang kownkow en pa tuk kamrüt khai?” pakhai.2Nakhowk khe Jonathan klangah mih, “Mapaw apa kowngta en dowi tham iow! Apa dow tekla ang dowi matchang tawng lup paw chang dowi chekhai. Now tawng rakowi chow nakowngta en kown mih laiklow apa naitta ang kown?” pape khai.3Nachenganchepaw David tek pe Jonathan iawk mih, “En sakrau ang mih achima en pa tuk chekhai. Naiawng rakowi en sak kowi rau lai pakowh aia nasai ang kown mih lawnguan tekla en dowi tham chepaw naia. Tawkchedow masing CHAKRAMANG ming hai en ming lüklaula se ang tek khowk, ang kowh dow nakowng kown mih khin atawnchow towbowt,” pakhai.4Nakhowk khe Jonathan tek pe mih, “Naiawng now en vüi tawng chow ang chang en kown mih tek ang diah. En tek ang iawng ang chang en kown towbowt,” pape khai.5Now David tek pe mih, “Tharau dow Lacher Pawi chowbowt. Nami pawi kowi mangkri hown ang tawi taiua cha chakkham kown mih laiklow uowi. Nachenganchepaw en mih pe powt ang diah. Thowi iak mowr dow dowm kowi ang cham tapet tak.6En pa che chet ang khai hanow en natek pe kown mih, ‘David mih amatni marow Bethlehem kowi nakowkowi dowkchow kownkow ang tut-e uang lü ana khai. Tawngplawng kowchow panow amatni marow kowi aia kowh krungchakuüa mih tawncher hown ningma phuchua pawi chang thüm pe,’ pape diah.7Nakhowk khe aia che, ‘Iung towbowt,’ pakhai hanow nami dow ang vüi iung chekhai. Tawkchedow aia che lainowmma kunmarau khai hanow aia nachang ang angak kownkow aia kamrütta hüah pami tukah diah.8Naiawng rakowi en dow ang kaah sakowm iawng uowi ang diah. Tawngplawng kowchow panow CHAKRAMANG kowi towla saksi khükhü achi dow takham khowk chekhai. Ang che en pa kowi kingküala mih angak ang changta khai hanow en matia ngengche mih sai ang diah; en pa rut kowi ap ang kla dowi,” pakhai.9Now Jonathan tek pe David mih, “Naiawng mapaw hangkow tuak. Nachang en angak kownkow apa kamrüt mih che ang tuk khai hanow ang natek en ngengche kown taih,” pape khai.10Nakhowk khe David tek pe mih, “En pa kunmarau khai hanow mia chow nauang tek ang kown?” pakhai.11Now Jonathan tek pe mih, “Chu, dowm kowi achi kowkowi diah sik,” pakhai. Now amatchi dow dowm kowi kowkowi khai.12Now Jonathan tek pe David mih, “Mami laiklow mih CHAKRAMANG Israeluüa kowh Thurai kowi towla saksi khükhü ang tek khowk. Tharau nadowi now thowirau kowh maiawng khin khe apa hown ang natalawp kown. Nakhowk khe aia che nachang en aiung kown mih laiklow tek khai hanow ang nauang chin en maru now ang tek en sow.13Nachenganchepaw apa che nachang en angak kown mih laiklow tek khai, now nami lawnguan ang tek en dowi hai thaulangma ang pe powt en dowi kowh chalow now CHAKRAMANG mih rip chamang pacham rip ang lah. CHAKRAMANG dow apa tut-e tawi uowi khe kowh iawng en tut-e paw pacham tawi uowi lah.14Ang uowi mowr dow CHAKRAMANG kowh sakraura achur uowi dowi mih iawng en paw sakrau ang diah. CHAKRAMANG mih en kowh ransu-uüa maten kowi chumta en kung kowi ang kowng khai bowt chepaw ang krungchakuüa kowi en kowh achur uowi dowi mih sakraura hown sakraula reng diah. Achi takham mih dow katpaw hang pacham piak lah; en che piakta khai hanow CHAKRAMANG mih pacham rip en lah,” pape khai.17Jonathan dow David kowi aiamat tasakrau iawng sakrauah khai. Naiawng rakowi David paw aia kowi nasakrauah kownkow David kowi pe takhamah khai.18Nami kung kowi David kowi Jonathan tek pe mih, “Tharau dow Lacher Pawi chowbowt. Mangkri hawm chakra kowi en kowh chowm rah akhawma mih khita now en uowi dowi mih dow natuk kown towbowt.19Naiawng rakowi en kowrik tapetah mih dowm kowi thowirau khe alenma kowkowi diah, now nakowi kowh huaklu aiukma mih ria kowi hawt chawng ang diah.20Nakowi mih ang nauangah hanow chaing lakman mih iow ang nachang kown. Nami huaklu ria kowi leba sek sum sek ang nauai ap kown.21Nakhowk khe ang nauai chin ngeuüa chah lowk ia kown. Aia kowi ang natek pe kown mih, ‘Kowkowi now paimi leba sek kowkrawi cham dit,’ ang pape kown. Now aia kowi che, ‘Leba sek nami re-e ni. Kowlüm now uaipawla dit’ pahai ang tek pe khai hanow en mih uaimang towbowt. Tawngpaw kaah kram dowi. Masing CHAKRAMANG ming hown ang tek khowk.22Nachenganchepaw nami ngeuüa kowi che, ‘Leba sek pai kowi tak pai,’ pahai ang tek pe khai hanow en mih powt towbowt. CHAKRAMANG pe powt en mih chowbowt padow ka tuakah towbowt.23Achi takham mih kowi kowh saksi dow chowngchowng saksakma pat CHAKRAMANG chekhai pami sak kowi towah diah,” pape khai.24Nami kung kowi dow David mih dowm kowi kowtapet khai bowt. Now Lacher Pawi uang tauown hanow mang dow nacha chakkham kownkow chang Lacher Pawi reng khe kowh iawng kimbang ria kowi aia kowh chowm rah kowi chowm khai. Nakhowk khe Jonathan dow a-pa hown tatingtang klowk chowm khai, now Abner dow Sawl ria kowi chowm khai. Nachenganchepaw David kowh chowm rah dow akhawma chekhai.26Nami ni dow David uowi dowi chepaw Sawl mih tawngpaw tek dowi chekhai. Tawngplawng kowchow panow tawng chü own kowh tasür talawk kowh naown David uang tawi towm dowi mih padow aia ka tuak khai.27Nachenganchepaw auai ni khe paw David kowh chowm rah dow akhawma rengreng chekhai. Nakhowk khe dow achapa Jonathan kowi Sawl lüntaah mih, “Tawngplawng kowchow Jese kowh chapa David uang tawi cha chakkham dowi? Mani paw uang dowi, ani paw uang dowi kowbow?” pakhai.28Jonathan klangah mih, “Bethlehem marow kowi nakowkowi kownkow David mih ang tut-e lainowmma uang lü ana khai.29Aia tek ang mih, ‘Sakrauma hown Bethlehem marow kowi pe kowi ang diah. Ang kowh krungchakuüa mih marow kowi chang phuchua pawi thüm, now nakowi ang kowtawi uowi ngengche kownkow ang taimowuüa krawi ma ang khai. Naiawng rakowi en che saksing sana ang khai hanow ang taimowuüa hown kowtakrum kownkow pe ang ana diah,’ pakhai. Naiawng rakowi chowbowt aia mih mangkri kowh pawi kowi uang tawi ia towm dowi,” pape khai.30Nami laiklow tata hanow Sawl dow achapa Jonathan luk kowi lainowmma kunmarau khai. Aia tek pe Jonathan mih, “Aw iang chang mih masiuüa kowh iang chah ow! Jese kowh chapa kowi en tawi tangila mih ang tuk dowi pabow? En hai en u luk kowi en uang pawla rukraira mih ang tuk dowi pabow?31Lusa kowi Jese kowh chapa sing uowi mowr dow mapaw en ka chowm mang kown nadowi pami en tuk tak bow? Naiawng rakowi kawmat alenma kowchin maru hanow aia kowi mih ang tut-e uang pawla diah. Aia dow nakowng ngengche kown takla,” pakhai.32Now a-pa kowi Jonathan tek pe mih, “Tawngplawng kowchow aia akowng takla khai? Tawng angak chow aia changta khai?” pape khai.33Nakhowk khe Sawl mih Jonathan kowi nakowngta kownkow reh hown hürah khai. Nami hownia Jonathan dow David kowi nakowngta ngengche kownkow a-pa kamrüt ching pami tuk khai bowt.34Now Jonathan dow kunmarau lai kowh hawm chakra hownia rü now powt khai. Nakow ni dow pawi kowi kowh chakkham mih tawngpaw aia tawi chala dowi chekhai. Naiawng David kowi a-pa changah angak kown pami rakowi aia kowh dow lainowmma sak kowi rau khai.35Now David hown aia kowh laikham uowi iawng Jonathan dow auai rau lawt hanow dowm kowi kowkowi khai bowt. Now ngeuüa chah kowi paw aia pawla lowk ia khai.36Nami ngeuüa chah kowi aia tek pe mih, “Hai iowm madiah, ang haiapah kown mih leba sek kowlüm now uang pawla madiah,” pakhai. Now nami ngeuüa chah haiiowm thüm khe aia dow ngeuüa chah hown alakma haiap leba sek lowk khai.37Now leba sek dowh rah re-e nami ngeuüa chah kowting khe Jonathan tek pe mih, “Leba sek pai kowi tak pai,” pakhai.38Nami kung kowi dow atünma aia tek pe mih, “Alenma haiiowm diah, hangkow tanai,” pakhai. Now nami ngeuüa chah dow lümla leba sek now Jonathan tut-e uang plan khai.39Nachenganchepaw naiawngün auan mih nami ngeuüa chah dow tuk dowi chekhai; Jonathan hai David iüah chowtaih tuk.40Nami kung kowi dow Jonathan mih aia kowh leba hai leba sek nami ngeuüa chah kowi ap pe now tek pe mih, “Maiawngün pawla now marow kowi kowplan towbowt,” pakhai.41Now nami ngeuüa chah mang kung kowi dow David mih mrawkphak pra kowh hua ria hownia uang awr pün khai. Aia dow Jonathan pur kowi uangah now tabawk krawm se Jonathan kowi chupah sum kat khai. Nami kung kowi amatchi dow tanam awm hanow kar iüah khai, nachepaw lang kar mih dow David chekhai.42David kowi Jonathan tek pe mih, “Thaulangma hown powt towbowt. Tawngplawng kowchow panow achi hai achi kowh krungchakuüa chowngchowng saksakma natasakrau kownkow achi takham mih dow CHAKRAMANG saksi chowbowt,” pakhai. Nami kung kowi dow David mih powt khai bowt, now Jonathan paw marow prakowi plan khai bowt.
The Seed Company