1 Krungchakuüa28
1Mang David dow Israeluüa kowh maru iukuüa kowi Jerusalem marow kowi arasang nauang takua talawm kownkow lawt ana khai. Naiawng rakowi krungchak towng hownia kowh aluchowuüa, mang kowh siphai kowi kowh aluchowuüa, 1,000 ia siphai luk kowi kowh aluchowuüa, 100 ia siphai luk kowi kowh aluchowuüa, mang hai mang chapauüa kowh dawngthawnguan mingkhet miuüa, mang kowh maru iukuüa hai tasen kiakma miuüa mih uang takua talawm khai.2Nakhowk khe awr iowngah hanow amatni kowi David tek pe mih, “Ang tainau-uüa hai ang kowh maru-uüa low, ang laiklow kowi pe ching büa diah. CHAKRAMANG kowh sangbowk laitawm tawkpla towk rah kim anikma ang nathawp lowk kown mih ang nau chowdiah. Sangbowk laitawm tawkpla dow Thurai kowh khawk towk rah iawng chekhai. Nami nathawp kownkow ang kamrüt khowk chowdiah.3Nachenganchepaw Thurai tek ang mih, ‘En dow tasen reng mih maru, now cham sai sak reng chekhai. Naiawng rakowi ang vüi en naia thawp kim kown nadowi,’ pakhai.4“Nachenganchepaw CHAKRAMANG Israeluüa kowh Thurai dow Israeluüa luk kowi chowngchowng saksakma nachowm mang kownkow apa machak hownia lang klo ang khai. Nakruitown Israeluüa kown mih dow Juda krungchakuüa kowi aia kloah khai, now Juda chuprek chaprek hownia dow a-pa krungchak kowi aia kloah khai. Now Israeluüa luk kowi nachowm mang kownkow ang tainau-uüa pungmadawng hownia klo ang mih dow aia awmrawm khai.5CHAKRAMANG mih ahuma pe ang chapa khai. Naiawngün chapauüa pungmadawng hownia CHAKRAMANG kowh pren Israeluüa luk kowi nachowm mang kownkow ang chapa Sawlawmawn kowi aia lang kloah khai.6Aia tek ang mih, ‘Ang kowh kim hai viadawng nathawp kown mih dow en chapa Sawlawmawn chowtaih. Tawngplawng kowchow panow ang chapa nachowng kownkow aia kowi ang lang kloah khai, now ang dow aia kowh pa nachowng kown.7Ang kowh ana pek hai alow pek che kawmat kowh iawng kaneuma aia chün khai hanow aia kowh mang chowm rah dow chowngchowng saksakma ang natow pe kown,’ aia pah ang khai.8“Naiawng rakowi CHAKRAMANG enni kowh Thurai ana pek maten kaneuma nachün kownkow CHAKRAMANG kowh maru Israeluüa hai a-i kowh Thurai pur kowi ang tek enni khai. Nahanow mami klangiungma mih pren kowi enni naka uowi kown, now mami pren dow chowngchowng saksakma mih dawngthawnguan iawng enni krungchakuüa kowi enni naia apla kown towbowt.9“Ang chapa Sawlawmawn, en pa kowh Thurai kowi en tuk kown takla. Sak maiow hown aia kowi chupiia diah. Tawngplawng kowchow panow maru kowh saktuak hai kamrütra dow aia tuk bowk chekhai. Aia kowi che en cham hanow aia kowi mih en naka kown. Tawkche aia kowi en nuata khai hanow aia paw chowngchowng saksakma nanuata en kown.10CHAKRAMANG kowh kim nathawp pe lowk kownkow aia mih lang klo en khai. Naiawng rakowi kaneuma pe ching diah. En mih sakkhawtma uowi diah, now thawp Thurai chup kim diah,” pakhai.11Nami kung kowi David dow tawng iawng chow nathawp Thurai chup kim kown mih akuh Sawlawmawn kowi peah khai: kimpuk, uanh towk rah towk lak, aluk krowng towk lak, alak kowi kowh towklak hai lang chimsai mih arah ün chekhai.12Nami klen kowi CHAKRAMANG kim kowi kowh viadawng, nami riaret kowi kowh towklak ün, uanh nungra towklak ün hai CHAKRAMANG tut-e uang ap-ah mih uanh towk rah towklak ün nathawp kownkow Lümlasai uang tek pe mih akuh maten paw Sawlawmawn kowi aia peah khai.13David dow uamowuüa hai Leviuüa kowh chowlowkkow thumchakuüa kowi amatni kowh lup bak, CHAKRAMANG kim kowi achang takla mih lup maten, CHAKRAMANG kim kowi tawngkengah mih uanh maten lawnguan kowi tek pe khai.14CHAKRAMANG kim chang kowi mün khowt chow kuh hai tai lakke kown mih paw Sawlawmawn kowi aia tek pe khai.15Now kuh hai tai hown kowh maibu towng hai maibu vüi mün khowt chow kuh hai tai lakke kown mih paw aia tek pe Sawlawmawn khai.16Now CHAKRAMANG pur kowi kowh chimsaima mih kawm towk rah pawitang thawp müa kuh hai akeng mih pawitang thawp müa tai mün khowt chow lakke kown mih paw aia tek pe khai.17Now chaknga khowng müa kep, bia hai tuikawng chap ahuma nathawpla kownkow achangma mih kuh mün khowt chow lakke kown mih aia tek pe khai. Now akeng mih bia thawp müa mün khowt chow nalakke tai kown mih paw aia tek pe khai.18Nami klen kowi nam iungma mih maikhük towk müa phuchuara thawp müa mün khowt chow nalakke kuh kown mih paw aia tek pe khai. Now CHAKRAMANG kowh sangbowk laitawm tawkpla luk kowi nataiang hüah kown mih Cherup rup hai kawrnga kari thawp müa kuh achangma mih mün khowt chow lakke mih paw aia tek pe khai.19David tek pe mih, “Maiawngün akuh dow CHAKRAMANG tek ang khe kowh ang ruiah mih chekhai. Akuh kowi uowi iawng naia thawpla kown mih prengia dow aia pe ang khai,” pakhai.20Nami kung kowi David plan tek pe Sawlawmawn mih, “Sakkhawtma hai sakkraingma uowi diah, now chang lup diah. Hang kram diah, now hang sak nen diah. Tawngplawng kowchow panow CHAKRAMANG Thurai, ang kowh Thurai dow en tut-e tawi uowi reng. Aia kowh chup kim en ki thawp dowi mowr aia mih napowtta en kown nadowi, now nanuata en kown nadowi.21Uamowuüa hai Leviuüa kowh chowlowkkow thumchakuüa kowi paw Thurai chup kim lup nachang kownkow rik tekta pe khowk chekhai, now lowra sia kowi achang kiakma mih maru-uüa paw Thurai chup kim lup natawi khowng en kown. Nami klen kowi aluchowuüa hai maru kawmuüa paw en kowh ana pek nachün en kown taih,” pakhai.
The Seed Company