O LUKAS2
1Ma oraha geena o Kaisar Agustus wohulo'o, moi-moi o Roma ma pareta'u, manga ronga yatulihi la yo'idoimi.2Neena ma di-dihila'a yadiai, ma oraha o Kirenius wo gubernur o siria ma tona'o'a.3Ho moi-moi o nyawa yolio manga hoani'a, la manga ronga yatulihi.4O geenali de o Yusup wotagi o Nazaret o Galile'a, de o Betlehemi'a o Yudea'a, ma 'oana o Daut womaboa-boa'a; hababu o Yusup geena o Daut awi guti'u.5O Yusup ma wotagi de o ngo Maria ge awi mamane la yatulihi manga ronga, ma oraha geena muna mohiahano.6Ho de ona o Betlehemo'a yai'a, o ngo Maria ami oraha yaadono moma'ualenge.7Muna ami ngoa'a o naulu ami ngoa'a olia'a, ma ngoa'a geena wihihaono de o moha, de winoa'u o aewani ma ngo-ngodomo'a ma ngio'a, hababu 'oiwau o ngi la ona yomanoa.8Ma wutu geena, o aewani yogoa-goana manga duba-duba, o Betlehem ma date'o'a.9Geena'a de itodo'anino o malai'ata imahimaiti onano, de ma daraanga ma Jouno yo'idihiwa'u hoona duru yohawana.10Ma o malai'ata geena itemo, <<Uwa nio hawana! Hababu ngoi toboa, toaha o Habari ma owa ngini'a,11O wange neena o Daut awi Bendaro'a, nia'oana niwihiha-halamata womaboa'au una geena ma Kristus tingini nia Jou.12De ma dudunguu 'onaneda: Maube ngini aha niama'e o ngoa'a ma giau moi, yahaono de o moha, de yaiduha o aewani ma ngo-ngodomo'a ma ngio'a.>>13De itodo'anino o malai'ata ma homoali durue 'a o lepe yatuuluno de wipuji ma Jou ma Dutu itemo 'onane,14<<Powipuji ma Jou ma Dutu da'u Awi ngi I'a'aulie'a!De o tona'a ma de'u o'a, niawowango ihanaanga ngini nage ma Jou awi hingina niadae-daene.>>15Geena'a de ma malai'ata geena yo'imada'au, de ima'ilio'a o horogade, o aewani yogoa-goana ge, yomahi'a duga yotemo, <<Bee'a niaino ngone potagi o Betlehemi'a la pataila'o nage ida-dadi do'anaga, 'aano'a nage ma Jou wateho-tehongo ngoneno.>>16Geena'a ona yotagi, ho yo'ima'e'a o ngo Maria de o Yusup de ma ngoa'a geena, wiiduha o aewani ma ngo-ngodomo'a ma ngio'a.17Ma oraha ona wima'e ma ngoa'a geena, ona yo'ihiade-ade nage o malai'ata yateho-tehongo'au ona'a ma ngale ma ngoa'a geena.18De o nyawa moi-moi geena'a yoihene, o aewani yogoa-goana manga ade-ade, duru yoheranga.19Ma o ngo Maria moi-moi geena 'amapongunu'u, de mohi'adi-ditibanga ami hingina ma doda'a.20O aewani yogoa-goana, yolio'a de wipuji ma Jou ma Dutu, ma ngale o'iau yoiheno'au de yama'e'au itiai harage 'a o malai'ata yateho-tehongo.21De awi wange tuangele, ma ngoa'a geena wihuna de wihironga o Yesus, ma ronga neena o malai'ata ihingahuno ma oraha ma eha 'amihiahawahi.22Ma oraha yaadono o ngewe'a nage yoma'ualengo'au de yomaofi imote'e ma Jou ma Dutu awi behehongo nage ma nabi Musa wohingahu-ngahu, de o Yusuf de o ngo Maria yotagi o Yerusalemi'a. Ma oraha geena ona ma wiaha o Yesus la wihigiama ma hoata ma Jou'a.23Matiti ma Jou awi pareta ma doda'a o Musa wohingahu-ngahu ituliho'au 'onane, <<O ngoa'a ma lia'a o naulu, hilingou yo'ihilapahi ma Jou'a.>>24De ona yo'ula imote'e ma Jou awi pareta, manga huba geena o namo dara o habi moi, e'ola o pombo modidi ma moholehe, harage 'aituliho'au ma Jou awi pareta ma doda'u.25Ma oraha geena o Yerusalemo'a naga womatengo awi ronga o Simeon. Una o nyawa ma owa de wiidomodongo ma Jou ma Dutu'a una wotatamaa ma oraha ma Jou ma Dutu wohihalamata o Israel. Ma Jou ma Dutu awi omaha iofi-ofi wimote'e o Simeoni'a,26De ma Jou ma Dutu awi omaha iofi-ofi wihingahuo'au una'a done 'awohongenua, na'o awii ma'ewahi o halamata ma 'oana, ma Jou wohijaa-jajio'au27Matiti ma Jou ma Dutu awi omaha iofi-ofi wiaha, ho o simeon woohama ma Jou ma Dutu awi Woa'a. Ma oraha geena o Yusup de o ngo Maria wiaha o Yesus 'awoete'ohi, yodiai o 'ianaga moi nage ihulo-hulo'o'au manga agama ma pareta.28Geena'a de o simeon waehe ma ngowa'a geena de witotilino, de aha ma Jou ma Dutu'a wihi ie wotemo,29<<O oraha neena, Jou, Ngona na tiaio'au ani jaji.Ho ngaro'a tohongenou ani gilaongo neena dema dame dema hananga.30Hababu ngoi tama'e'au de aila'o mahirete,wohiha-halamata ngona'a de yaino.31Una nowihulo'inola Wohihalamata o bangiha moi-moi32Harage 'ao daraanga yoodihiwa'u o ba-bangiha ma homoa manga nge'omu'ula yoboa ngonano;geenalah o ginita iaha-aha o horomati ani 'awahao israelo'a ma nyawa'a.>>33O Yusup de o ngo Maria duru yoheranga yoihene o'iau o Simeon wotemo manga ngoa'i'a.34O Simeon wo'ihibara'ati ona'a de miade-ade o ngo maria'a, <<Ma ngowa'a nuuna wiili'o'au ma Jou ma Dutu 'aino'a wo'ihi murutu, e'ola wo'ihi halamata manga lepe o Israelo'a ma nyawa. Una done wodadi o na-na'o ma Jou ma Dutuno, ma done aha wi'adu'ulu o nyawa manga lepe.35De o geenau aha ihupu manga hingina ma doda. Ani hingina aha ihuha harage 'aobe-beoto idoto-doto yatadi ani gate'o>>.36De geena'a moma tengo o nabi mopere'io'au. Ami ronga o ngo Hana, o Fanuel awi ngowa'a ami ahala o Asyero'a. O taunu tumudingi mo-modo'ano.37De neena naga o ngo Hana mobao'au de ami umuru o taunu morituangele de hoata. Ongo Hana 'a ma Jou ma Dutu awi woa'a. O wutu de o wange, muna mohuba ma Jou'a de momadahaubayanga de mopuaha.38Ima'a daene ma oraha o Simeon wiitotilino ma ngowa'a geena, muna moboano de mihiie ma Jou'a, de mohiade-ade ma ngowa'a geena o nyawa-nyawa'a, nage yotatama ma oraha ma Jou wohipidili o Yerusalem.39Iduangino o Yusup de o ngo Maria yadiaio'au moi-moi ma Jou awi pareta, ona yolio o Nazareti'a o Galilea'a.40Ma ngowa'a guuna 'aidogo-dogo woamo'o de wopau. Una duru wobarija, de ma Jou ma Dutu 'awihibohono.41Yohitaunu moi o Yesus awi baluhu yotagi o Yerusalemi'a la, yamote'e manga wange ma amo'o.42Ma oraha o Yesus awi taunu mogio'o de modidi, ona yotagi hara 'abiahali.43Iduangino yanii'i geena ona yolio, ma o Yesus o ngowa'a geena 'ao Yerusalemo'ahi, ma dea de ma eha 'oyana'owa.44Ona yotee bali, o duono wani'o'au. O wange moiou yotagi, aha ona wihali'i manga riado-doti'a, manga ma-manai'a, de yoma'abi-biaha'a ge.45Ma ona awi ma'ewa ho ona yoma'ilio o Yerusalemi'a wihali'oli.46O wange haangenou yohali'i, de aha ona wima'e ma Jou ma Dutu awi woa ma doda'a. Una wogogelu'u wohigihene o agama yodoto-doto'o de yoma'a'ahano.47Ihi gihe-gihene touna awi babaluhu, duru wiheranga matiti awi barija.48Awi baluhu ma yoheranga ma oraha wima'e. Ma eha mitemo una'a <<E walade! 'Ai dadiwa, 'oneena nodiai ngomino, ngoi de ani-dea durue mio dodato'au ho nimihali'i ngona'a!>>49O Yesus wopaluhu, <<Ee Aba, de o ngo Yai, uwa niihali'i Ngoi. Ngini 'iani niana'o, Ngoi neena halingou 'ai Dea awi woa ma doda'a>>50Ma ona 'ayomahina'owa o Yesus awi demo.51De aha o Yesus wolio, yoma'anii'i de awi baluhu o Nazareti'a, de Una duru wo'ihingounu ona'a. Ma moi-moi geena ma eha 'ama pongonu'u ami hingina'a.52De aha o Yesus 'aidogo-dogo woamo'o de wo'umati, de ma Jou 'awihibohono, de o nyawa manga lepe duru wiigo.
The Seed Company