O Yohanes17
1O Yesus 'ogeena wotemo'a de o diwangie womatawagade de wotemo, <<Aba, neena ma oraha yaadono'au. Ho nadiaou la Ngoi 'ani Ngoa'a 'Ihilamo'o, la Ngoi ma todiai Ngona'a Aba Nihilamo'o.2Aba Ngona no'ula'au o 'uaha Ngoino, mangale To'ipareta o nyawa moi-moi la to'i'ula o wowango 'ahiado-adoni'a o nyawa'a moi-moi nage ngona no'ula'au Ngoino.3Neenanau ma wowango 'ahiado-adoni'a, geenala o nyawa-nyawa nina'o Aba Ngona Jou ma Dutu nage nomatengo-tengo'a ge notiai, de Ngoi ma 'Ina'o o Yesus Kristus nage Aba Noihulo-hulo'o o dunia'a neena.4Ngoi todiaio'au Ngona'a nihilamo'o o dunia ma de'uo'a neena, ma nge'omo taduanga 'ai 'arajaanga nage Ngona no'ula'au Ngoino.5Aba! Nodiaiou 'Ihilamo'o Ngoi neena Ani biono'a, harage 'a ma hilahi Ngoi de de Ngona nage o dunia ma 'aidadiwahi ena.6Ngoi to'arajaanga ho o nyawa-nyawa o dunia'a neena nage ngona Aba no'ula'au ngoino, nina'o'au Ngona Aba. Ona geena to ngona Aba, de ngona no'i'ula'au Ngoino. Ona yodinii'i'o'au to ngona ani demo.7Ma oraha neena ona yana'o'au na'o moi-moi nage Aba noula'au ngoio'a, geena ma titi ngonano Aba.8Hababu tohingahuo'au ona'a moi-moi Ani demo-demo nage noi'ula-'ulano; de ona yadawongo'au. Ona 'igou-goungu yana'o na'o Ngoi toboa ngonano Aba de ona yonga'u na'o Ngonau nage noihulo-hulo'o.9Aba oraha neena Tohaubayanga mangale ona. Ngoi tohaubayanga o nyawa'awa o dunia'a, ma duga 'a o nyawa-nyawa nage Aba ngona no'ulaau ngoino, hababu ona geena to ngona Aba.10Moi-moi Tongoi 'Ai nyawa geena ma Ngona Ani nyawa; de ona moi-moi nage to Ngona Aba geena ma to Ngoi. Ma nge'omo ona ho Ngoi 'ihilamo'o.11Ma oraha neena Ngoi toboa ngona'a Aba. Ngoi aha 'atomanoawau o dunia'a; ma ona o dunia'ahi. Aba noofi-ofi! Tanu no'igoana ona de to Ngona ani Ronga ma 'uaha, geenala nage ngona Aba noi'ula'au, la ona idadi 'a moi harage ngona Aba de ngoi 'a moi.12Ma oraha ngoi 'a de de onahi, ngoi to'igoanao'au ona de to ngona 'ani Ronga ma 'uaha. Geenala de o Ronga nage ngona Aba no'ulano ngoino. Ngoi to'igoano'au ona, 'a moio ma 'ayoihangua, duga 'a una nage halingou woihanga; la de geena, idadi o'iau naga ge 'ihitulihu'u o Bo'u 'Ibe-berehi'u.13Ma oraha neena ngoi toboa ngona'a Aba. Moi-moi neena tohidemo ma oraha ngoi 'a o dunia'ahi; la o garago nage Ngoio'a ona ma idadi yamao.14Ngoi tohingahuo'au ona'a to ngona Aba 'ani demo, de o dunia ma nyawa yo'ibuhulu ona'a, hababu ona 'a o dunianowa. 'Aimatero de ngoi, ngoi ma 'a o dunianowa.15Ngoi 'atogaaho'uwa No'iehe o dunia'a neena, ma Ngoi Togaaho'o la No'igoana o To'ata ma Oanino.16Harage de Ngoioli neena 'atorimoiwa de o dunia ma nyawa, ona ma yorimoiwa de o dunia ma nyawa.17No'idiai ona geena 'a to ngonau Aba, ma nge'omo o do-doto'o iti-tiai. Ani demo Aba, geenau o do-doto'o iti-tiai.18Harage Ngona Aba noihulo'o'au o duniano, 'Ogenali ma ona to'ihulo'o o dunia'a.19Ma ngale ona, Ngoi tomahigiama ma hoata 'ai wowango idadi 'a to Ngonau Aba, la ona ma idadi yomahigiama ma hoata manga wowango idadi 'a to Ngonau Aba, ma nge'omo 'Ani do-doto'o iti-tiai.20Ngoi to'idahaubayanga duga 'a onawa neena. Ma Ngoi ma to'idahaubayanga o nyawa-nyawa nage aha yonga'u ngoino de to ona manga ha'ihi.21Ngoi togaaho'o Aba, la ona moi-moi yorimoi, harage ngona de de ngoi porimoi, de ngoi de de ngona. Tanu ona idadi 'a moi de de Ngone la moi-moi o dunia ma nyawa yonga'u na'o Ngonau Aba nage Noihulo'o Ngoi.22Ngoi to'ula'au o 'uaha duru 'ilamo'o ona'a, nage Ngona noi'ula'au Ngoino 'Ani 'uaha 'ilamo-lamo'o, la ona idadi yorimoi, harage Ngoneli ma porimoi;23Ngoi de de ona 'a moi de Ngona Aba de Ngoi 'a moi; la ona ma gou-goungu 'a moi. Ho marai o dunia ma nyawa aha yana'o na'o Ngoi neena Ngona noihulo'ino, de ngona Aba no'ihibohono ona harage de Ngoino.24Aba, ngoi tomau o nyawa nage ngona no'ula'au ngoino, ona de de ngoi 'ia'a naga tai'a, la ona yama'e 'ai 'uaha 'ilamo-lamo'o nage Ngona Aba noi'ulano, hababu ngona noihibohono'au 'a ma oraha o dunia ma 'aidadiwahi.25Aba nage noowa-owa! O dunia ma nyawa 'anina'owa Ngona, ma ngoi tonina'o; de 'ai ni-nii'i noona yana'o'au na'o ngonau Aba noihulo-hulo'o.26Ngoi todiaio'au ona Nina'o igou-goungu, Aba; de ngoi aha 'atomatogumuau todiai 'ogeena, la ani dora ngoino nage to'i'ula'au ona'a, tatapu to ona manga hininga'a de ngoi de de ona miorimoi.>>
The Seed Company