O Hu-hulo'o14
1O Ikonium ma bendaro'a ma idadi harage de 'ogeenali. O Paulus de o Barnabas, yoohamoli o Yahudio'a manga do-doomu ma woa'a, de yodoto'oli yohingahu yohira-rahai'a mangale ma Jou ma Dutu awi Habari ma Owa hiadono o Yahudio'a de 'ao Yahudio'awa manga lepe yonga'u o Yesusi'a.2Ma o Yahudio'a nage 'ayonga'u-nga'uwa yohihau-hau'u o Yahudio'awa ma nyawa'a manga hininga ho ona yo'ibuhulu o nyawa nage yonga'u-nga'u o Yesusi'a.3O Paulus de o Barnabas ma daao yomanoa geena'a. De ona yomoini yomaade-ade mangale ma Jou Yesus. Ho ma Jou ma wohimaiti na'o nage yohiha-habari mangale Awi hininga ma owa geena ma goungu; ma nge'omo Wo'i'ula o 'uaha la yodadi yodiai o du-dunguu 'ila-laagomo de o haa-haala 'ihera-heranga.4Duga o nyawa ma bendaro'a goona 'ayoma'adaenuwa munu'a yonii'i o Yahudi ma nyawano nage 'ayonga'u-nga'uwa, de munu'a o hu-hulo'ino goona.5Geena'a de o Yahudio'a de manga balu-baluhu de 'a o Yahudio'awa ma nyawa yorimoi mangale yo'ihangihara de yo'iheleo o hu-hulo'o goona.6Ma o hu-hulo'o goona yomana'o'au, de yotagi yoloa yohi'aie o benda-bendara o Likaonia ma daera'a, geenalah o Listra de o Derbe ma bendari'a, de o daera nage o bendara modidi geena ma hiridate'o'a.7De geena'a yohihabarioli o Habari ma Owa geena.8O Listra ma bendaro'a, womatengo wopa-paluga 'awomaboanohi, ho una 'omaiwahi wotagi hababu awi dou duru 'aimanga'unua.9O nyawa guuna wogogelu'u wohigihene o Paulus wodoto'o. O Paulus wida-dananoho de wama'e na'o o nyawa guuna wonga'u mangale geena idadi wihiai'i.10Geena'a de wotemo waamo-amo'ie, <<Nomagoa'a nomabootie!>> De wopa-paluga guuna 'awogila-gila womagoa'a de wotagi wongi'a ngino.11Wa'utu yolepe-lepe yama'e o Paulus wodiai o geena, de ona yomaorehe de o Likaonia'a manga demo, <<O goma-gomanaga 'iutio'au nanga hidogorona'a yomahibiono o nyawa!>>12Geena'a de o Barnabas una wihironga manga gomanga o Zeus de o Paulus wihironga manga gomanga o Hermes geenala wohidowa-dowanga o gomanga manga ade-ade, hababu 'a una womaade-ade.13Naga de ma ngiio'a o bendara ma bioni'a mangale yohuba o gomanga nage yohironga o Zeus. Ma gomanga wotowo-towo guuna woboa geena'a de waino woaha o hapi ma nau-naulu de o bunga-bunga o bendara ma ngoana ma amo'ino. Una womau womahinii'i de o nyawa yolepe-lepe goona ge yohihuba o huhuba o hu-hulo'i'a goona.14O Barnabas de o Paulus gee yogiiheno'au na'o yomau 'ogeena yodiai, de manga hininga ihuha ho manga baju yaraca-racanga de 'ayomapa-palitana o nyawa yolepe-lepe'a manga hidogorona'a de yotemo,15<<Wae, dodoau ho oneena niodiai? Ngomi neena ma 'a o nyawa biaha harage de ngini! Ngomi neena'a dau miaino geena hababu miohingahu o Habari ma Owa ngini'a la niamada 'o'iau naga gee ma faedaa 'a'oiwa neena, de idadi nionga'u ma Jou ma Dutu'a nage wowango-wango. Una geena ma Jou ma Dutu nage wohida-dadi o diwanga de o dunia, de o ngooto de ma doda'a moi-moi.16Ma hilahi ma Jou ma Dutu 'awo'ihi'damada'a o bangiha moi-moi yowango 'imote'e 'a moi de moi manga mau.17Ma ma Jou ma Dutu tatapu wohimaiti awi owa o nyawa'a moi-moi la ona yana'o Una naga. Una geena wo'ula o beha'a da'u o diwangu'u, de o tona'a ma hasili ge ma orahu'u. Una niwi'ula o 'inomo de nia hininga wohihanaanga.>>18Duga ngaro o hu-hulo'o 'ogeena yotemo, ma hali'i 'ayadadiwa yo'ituumungu o nyawa-nyawa nage yohihuba manga hu-huba ona'a.19Ma o Yahudio'a yamuluo naga o Antiokiano de o Ikonium ma bendarino ma yoboano o Listra'a, yo'ibaja o nyawa yolepe-lepe goona ho yo'idomote'e ona'a. Ona wiheleo o Paulus, geena'a de widodoba'a o bendara ma duduni'a. Ona yotemo bali una wohonengo'au,20ena momongo ma oraha o nyawa yonga'u-nga'u yomahigo'ode wihigilolitino, de womomi'i ho wotagioli woohama ma bendari'a. Ma dewelano de wotagi o Derbe yomatuono de o Barnabas.21O Derbe ma bendaro'a o Paulus de o Barnabas yohingahu o Habari ma Owa geena, de o nyawa manga lepe yonga'u o Yesusi'a. Geena iduangino de yoma'ilio o Listra'a de aha Ikoniumi'a, de o Antiokhia'a nage o Pisidia ma daera'a.22Ma benda-bendaro'a geena ona yohi'uata o nyawa yonga'u-nga'u o Yesusia manga hininga de yo'ihitiari la ona tatapu yonga'u o Yesusi'a. Ona yotemo, <<Ngone halingou 'ihila pohangiharahi aha de poohama ma Jou ma Dutu awi pareta'a.>>23De o jama'ata 'ihinoimi'a o Paulus de o Barnabas yo'igoa'a o jama'ata ma balu-baluhu o ja-jama'ato'a. Ona yomadahaubayanga de yopuaha, yogaaho'o ma Jou Yesusi'a la ma Jou Yesus wo'igoana o jama'ata ma balu-baluhu goona, hababu ona winga'u duga 'a Una'a.24Geena iduangino de o Paulus de o Barnabas yagilolitohi o Pisidia ma daera aha de yomahiadono o Pamfilia ma daera'a.25Geena'a yohihabari ma Jou ma Dutu awi demo o Perga ma bendaro'a, aha de yotagi yohi'ao'o o Atalia ma bendaro'o.26Geena'a de aha yohidetoli o Antiokhia'a nage o Siria ma daera'a. Geena'au ma bendaro'a ma hila ona yo'ihulo'o yadiai manga 'arajaanga de yo'ihigiama ma hoata ma Jou ma Dutu'a la ma Jou ma Dutu awi hininga ma owa tatapu de de ona. Neena naga ona yoma'iliou geena'a hababu manga arajaanga yaduango'au.27Ma oraha yomahiadoni'a geena'a, de yo'iaho'o o jama'ata yomalomu, aha de yohijarita moi-moi nage ma Jou ma Dutu wodiaio'au ma nge'omo ona. De ona ma yohijarita cara'iau ma Jou ma Dutu o nge'omo wo'ula hiadono o nyawa-nyawa 'a o Yahudio'awa ma yonga'u o Yesusi'a.28O Paulus de o Barnabas ma daao yomanoa geena'a ma bendaro'a de o nyawa yonga'u-nga'u.
The Seed Company