Revelation20
1Jêh hư̆n ăñ so ju nau nêh myang jư̆r băh trôk tê̆, kăn ñôt kliêng khuă ƀăng jru so gư̆t dư̆t jêh iên ƀơn sei kliêng đai ram mŏng ti kăn.2Kăn ñư̆p čăp rmêh, hư̆n jêng bêh đưm lak, jêh iên hư̆n jêng yang jhat, mdăh Sa-tan, jêh hư̆n kăn čăp ĕh mŏng ju bau năm.3Kăn čĕ ĕh mŏng ƀăng jru so gư̆t dư̆t, jêh iên kăn čăng ƀăng jêh hư̆n kăn kđăm têl ghă tŏng iên, no di so hôm ĕh wêh mblơm grăp čar ôh tăl trôh lĕ ju bau năm kčăh. Jêh hư̆n, nai jrăng phưi ĕh mŏng ƀê̆ nar.4Jêh hư̆n ăñ so grăp jhưng mtao wăt ta nêh gŭk tŏng iên, jêh iên pơp dơi phat dôih jêh nai jao ta hên, wăt ta ngăt nhuôl đơ nêh nai ndăč bôk bơ yơng hên têh sơm năn Yê-su jêh iên yơng ta pơp Yang Trôk ngơi wăt ta lĕ mơt ngăt băl so kôh mpŭ ta păm bri mdăh rup yang ĕh, ăt so hên dơn têl kđăm ĕh tŏng bôk tliêng mdăh tŏng ti hên ya, hên wêh dŏk brêh jêh iên kĕ kriê ju băk Yang Tŏng Tlĕh trôh ta ju bau năm.5(Đơ băl dŏng iên mŏng băl khư̆t so hôm hên dŏk brêh ôh tăl trôh mông dư̆t ju bau năm.) Hư̆n jêng pơp lŏ wêh brêh tal muôi.6Găl jôn jêh iên ƀrăh ngôr ngăn ta nêh tơm mau ju khăn mŏng pơp wêh dŏk brêh tal muôi! Pơp khư̆t tal bar so hôm mau pơp dơi tŏng lĕ mơt băl hư̆n ôh, ƀê̆ dăh hên jrăng ñjêng khua mhŏ yang Yang Trôk di jêh iên Yang Tŏng Tlĕh di, jêh iên ju băk Khua Yang hên jrăng kĕ kriê mŏng ju bau năm.7Jêh hư̆n trôh mông dư̆t ju bau năm, nai jrăng phưi Sa-tan băh ƀăng jru ĕh sô̆,8jêh hư̆n ĕh jrăng sak mplư grăp čar mŏng puôn đăh teh dih, băl Got jêh iên băl Ma-got, no di tăm ƀư̆n hên mŏng tŭk tăm mblăh. Pôl ka han băl ĕh ŏk klăh di kiêk dak sĭ.9Băl ĕh sak mblăh grăp tŭk mŏng teh dih jêh iên sak êl pôih ka han băl đăo ƀrăh wăt ta uôn ram nhăp găl, jêh iên iñ ĕh lăč băh trôk tê̆ jêh hư̆n hăr sa băl ĕh.10Jêh hư̆n yang jhat, jêng nêh mblơm hên, nai čĕ mŏng war iñ jêh iên lưu huyñ, hư̆n jêng tŭk nai čĕ păm bri wăt ta băl têh luôr huôk ĕh, jêh iên băl ĕh jrăng tŭ pơp knap mñai măng lo nar tăl trôh răn ƀăn, hui hai.11Jêh hư̆n, ăñ so ƀơn jhưng mtao nơ nang ram jêh iên Mtao gŭk tŏng jhưng mtao, trôk ta teh dih ĕh du srôm lĕ mơt băh tŭk mau măt Khua Yang, ƀê̆ dăh so hôm mau tŭk nai thêm ta ĕh.12Jêh hư̆n ăñ so đơ băl khư̆t, dŏng băh ku sei trôh nêh ram, hên dŏk ta măt jhưng mtao, jêh iên grăp păng ră ĕh pŏk, jêh hư̆n mau ră dơ dêh ĕh pŏk ya, hư̆n jêng Ră Pơp Brêh. Nai phat dôih nêh khư̆t hui si djăp pơp jêh čih mŏng grăp ră hư̆n, mkă ta grăp bruă hên mhŏ.13Dak sĭ ĕh sak ndơp nêh tơm khư̆t mŏng dak sĭ, pơp khư̆t jêh iên uôn băl khư̆t sak jao nêh khư̆t mŏng tŭk ĕh, jêh iên grăp nau nêh nai phat dôih hên hui si grăp bruă mhŏ hên di.14Jêh hư̆n pơp khư̆t ta uôn khư̆t nai jrăng čĕ mŏng war iñ. Ho jêng pơp khư̆t tal bar — hư̆n jêng war iñ.15Ndă nêh tơm nai ksiêm dlăng so mau năn mŏng Ră Pơp Brêh, nêh hư̆n nai jrăng čĕ mŏng war iñ.
FAR EAST BROADCASTING COMPANY