Revelation10
1Jêh hư̆n, ăñ so ju nau nêh myang prăl ktang dơ dêh jư̆r băh trôk tê̆, kăn guôm săk ta ñuôi tŭk, mau briêng kŭng kăng tŏng bôk kăn, môh măt nêh myang hư̆n klăh di măt nar, jŏng nêh hư̆n klăh di jrŏng iñ,2jêh iên jai kăn ñôt mŏng ti kăn pôt ră kuôn nê̆ jêh nai pŏk luôr. Nêh myang hư̆n ăn jŏng ma kăn tŏng dak sĭ, jêh iên jŏng kiêu kăn tŏng hang tê̆,3jêh hư̆n kăn ôr tĕh ju dŏ klăh di tla mhư̆r nggriñ. Jai nêh myang hư̆n ôr tĕh, hư̆n mau pŏh dŏ tăr nĕh nggôr đhăm ju băk ta dơk ngơi ĕh.4Jai pŏh dŏ dơk tăr nĕh nggôr, hư̆n ăñ rŏng čih pơp hư̆n, mông hư̆n ăñ tŏng dơk ngơi băh trôk, klăh iêu: “Ăn tăm pŏng têl ghă tŏng lĕ mơt pơp ngơi yơng băh pŏh dŏ tăr nĕh nggôr, hư̆n yơh ei ru čih ĕh mŏng ră.”5Jêh hư̆n nêh myang, jêng nêh ăñ so kăn dŏk tŏng dak sĭ jêh iên tŏng teh, kăn yơr ti ma kăn tŏng trôk6jêh hư̆n kăn kăt săk ta năn Mtao brêh tăl trôh răn ƀăn, hui hai, jêng Mtao rih ñjêng trôk wăt ta djăp mta pơp tŏng trôk, teh wăt ta djăp mta pơp mŏng teh, jêh iên dak sĭ wăt ta djăp mta pơp mŏng dak sĭ, klăh iêu: “So hôm lŏ wêh nggrăn ôh.7Ƀê̆ dăh mŏng grăp nar mau dơk ngơi nêh myang tal pŏh, jai mông mơñ nêh myang hư̆n ôh kei, mông hư̆n pơp yuôm ndăp Yang Trôk di jrăng ñjêng nư̆m nơn, ndrơm klăh di pơp jêh Khua Yang têh sơm pơp găl hư̆n ta băl dư̆k ndra Yang di jêng băl têh luôr.”8Jêh hư̆n dơk jêh ăñ tŏng băh trôk ĕh lŏ ngơi ta ăñ, klăh iêu: “Ăn sak, sŏk pôt ră ku êt jêh nai pŏk mŏng ti nêh myang jai dŏk tŏng dak sĭ jêh iên tŏng teh tŏ.”9Jêh hư̆n ăñ sak trôh ta nêh myang, ăñ ngơi ta nêh myang hư̆n ndơp pôt ră ku êt hư̆n ta ăñ. Nêh myang hư̆n ngơi ta ăñ: “Ăn sŏk jêh iên sa ĕh gơñ, jêh hư̆n ĕh jrăng lăm tăng mŏng khŭng me, ƀê̆ dăh mŏng dơk me, ĕh jrăng ngôt klăh di dak wei.”10Ăñ sŏk pôt ră ku êt hư̆n băh ti nêh myang jêh iên sa ĕh, ĕh gŭk mŏng dơk ăñ ngôt klăh dak wei, ƀê̆ dăh jêh ăñ sa ĕh, mŏng khŭng ăñ ĕh ñjêng tăng.11Jêh hư̆n mau ŏk dơk nai ngơi ta ăñ: “Ăn me wêh ngơi pơp têh luôr ju dŏ hư̆t yơng ta ŏk uôn lan, ŏk čar, grăp dơk ngơi jêh iên grăp mtao.”
FAR EAST BROADCASTING COMPANY