Matthew18
1Mŏng mông hư̆n, băl ƀing kna sak mơñ Yang Yê-su, hên lup: “Trôh kơi dư̆t nêh tơm ñjêng ram hĭn lĕ mơt mŏng uôn tŏng trôk?”2Jêh hư̆n jai jêh kuôl ju nau kuôn sei dêt trôh ta iên, Khua Yang ăn kuôn sei hư̆n mŏng mbar hên3jêh iên ngơi: “Ngĭn ngăn, ăñ ngơi ta ŏh mi, ndă ŏh mi so mau pơp mlih jêh iên ĕh ñjêng ndrơm băl kuôn sei, hư̆n ngĭn ngăn ŏh mi jrăng so dơi mư̆t mŏng uôn tŏng trôk.4Kơt iên, đơ nêh tơm lăm rôč săk klăh di kuôn sei ho, nêh hư̆n yơh jêng ram hĭn lĕ mơt mŏng uôn tŏng trôk.5Ndă nêh tơm sŏk năn ăñ tŭ drông ju nau kuôn sei ndrơm klăh iêu, hư̆n jêng nêh tŭ drông ăñ.6Ƀê̆ dăh nêh tơm lăm păk bông ta ju nau mŏng băl kuôn sei dêt ho, jêng băl đăo ta năn ăñ, ngăn yơh pơp kmhal ta nêh hư̆n jêng ƀơn păl mau nai thêm ta ƀle hĕ jrăng kăt tŏng ko kăn, jêh hư̆n kăn ĕh jrăng krăm mŏng dak sĭ jru.7Knap mñai ta dôn teh yơng băh grăp pơp ĕh lăm păk bông! Bơ yơng grăp pơp ĕh lăm păk bông jrăng trôh hư̆n jêng pơp so dơi diêr, iên tŭ, knap mñai yơh ta băl pơp păk bông ĕh trôh băh nêh hư̆n!8Gao băh iên, ndă ti mdăh jŏng ŏh mi lăm ndơp ŏh mi păk bông, ăn ndăč lat ĕh jêh iên čĕ wăč băh ŏh mi. Hư̆n jêng pơp găl ta ŏh mi lơi lư̆t ti mdăh lư̆t jŏng jêh iên dơi mư̆t mŏng pơp brêh găl ƀê̆ ta mau nư̆m bar ti mdăh bar jŏng ƀê̆ dăh nai čĕ mŏng war iñ hui hai.9Ndă măt ŏh mi lăm ndơp ŏh mi păk bông, ăn liêk lat ĕh jêh iên čĕ wăč băh ŏh mi. Hư̆n jêng pơp găl ta ŏh mi lơi tiêh ju đăh măt jêh hư̆n mư̆t mŏng pơp brêh, găl ƀê̆ ta hôm bar măt jêh hư̆n nai čĕ mŏng war iñ.10Ăn gư̆t ñjrăng, ŏh mi so dơi mưč ju nau mŏng băl kuôn sei dêt ho. Bơ yơng ăñ ngơi ta ŏh mi klăh iêu grăp băl myang băl ĕh tŏng trôk khăng krĕh so măt Bap ăñ mŏng uôn tŏng trôk.11[Bơ yơng Kuôn Nêh jêh trôh no di lăm tlĕh băl suô̆ nga.]12Pu me mĭn đô̆ nă? Ndă ju nau nêh hư̆n mau ju hiêng kuôn biêp, ƀê̆ dăh ƀơn mŏng pôl biêp hư̆n suô̆ nga, mông hư̆n so lăh jêh lơi sư̆n jăt sư̆n mlăm tŏng yôk jêh iên kăn sak, nêh hư̆n jrăng sak juôi kuôn biêp suô̆ nga hư̆n lăh?13Ndă nêh hư̆n dơi so ĕh, ngĭn ngăn yơh, ăñ ngơi ta ŏh mi klăh iêu nêh hư̆n jrăng čhô̆ brơn ta biêp hư̆n ŏk hĭn ta sư̆n jăt sư̆n mlăm biêp so suô̆ nga.14Iên ya, pơp khơñ ta măt Bap tŏng trôk ŏh mi di so geh jêng lơi ju nau mŏng băl kuôn sei dêt ho mŏng tŭk nga rai.15Gao băh iên, ndă ju nau nêh găp mi ŏh mi di mhŏ tih ta ŏh mi, ăn sak, ăn ƀuăh ñjăm kăn mŏng mbar ŏh mi ta nêh hư̆n gu. Ndă nêh hư̆n iêt dơk ŏh mi, mông hư̆n ŏh mi so nga nêh găp mi ŏh mi di.16Ndă di nêh hư̆n so khơñ iêt dơk, ăn ndơm băk ŏh mi ju nau mdăh bar nau nêh hư̆t, no di lơi băh dơk ngơi bar mdăh pei nau nêh ngơi nư̆k hư̆n kăh pơp ngơi dơi klă.17Ndă di nêh hư̆n so khơñ iêt dơk hên, ăn têh sơm ta pôl ƀrăh. Ƀê̆ dăh ndă nêh hư̆n ăt so khơñ iêt dơk pôl ƀrăh, mông hư̆n yơng ta ŏh mi, nêh hư̆n jrăng ñjêng klăh di uôn lan ta ling jêh iên băl rư̆ng jia.18Ngĭn ngăn, ăñ ngơi ta ŏh mi, ndă ŏh mi kăt djăp mta pơp mŏng teh, pơp hư̆n jrăng kăt tŏng trôk; jêh iên ndă ŏh mi pơk djăp mta pơp mŏng teh, pơp hư̆n jrăng dơi pơk tŏng trôk.19Ju dŏ hư̆t, ngĭn ngăn, ăñ ngơi ta ŏh mi klăh iêu ndă bar nau mŏng ŏh mi mau nuih nhăm ju băk mŏng teh yơng ta djăp mta pơp hên kuôl dăn, pơp hư̆n jrăng dơi lăm ñjêng ta hên yơng băh Bap ăñ ji băh trôk tê̆.20Bơ yơng u tŭk mau bar mdăh pei nau nêh dơi tŏng tlăč ju băk mŏng năn ăñ, hư̆n ăñ jrăng gŭk ta iên mŏng mbar hên.”21Jêh hư̆n, jai jêh sak mơñ, Pê-trôih ngơi ta Khua Yang: “Wơ Yang, ju nau găp mi ăñ jrăng mhŏ tih tăm dăng ta ăñ jêh iên ăñ jrăng ndrŏh tih ta kăn ŏk dŏ? Tăl trôh ta pŏh dŏ ya?”22Yang Yê-su ngơi ta kăn: “Ăñ so ngơi ta me trôh pŏh dŏ, ƀê̆ dăh jêng tăl trôh pŏh jăt ta pŏh dŏ.23Yơng băh pơp ho, uôn tŏng trôk năng ai dơi tŏng ndrơm ta ju nau nêh mhŏ mtao, ƀê̆ dăh nêh hư̆n khơñ ksiêm dlăng ră mơ ar ta băl dư̆k kăn di.24Mông hư̆n, jai mtao dư̆ng tro nuôn, ju nau nêh đuôm nuôn măt bau ta-lư̆ng nai sak ndơp ta mtao.25Ƀê̆ dăh nêh hư̆n so dơi mau ngăn drăp čiu ôh, hư̆n mtao ñư̆p kăn no di blŏ, wăt ur, kuôn jêh iên djăp mta pơp kăn dơi mau, no di čiu nuôn.26Jai jêh ĕh bông trư̆p mŏng sô̆, nêh dư̆k hư̆n čuôn krŭng ta măt mtao, kăn ngơi: ‘Wơ khua, dăn gir găn ta ăñ, jêh hư̆n ăñ jrăng čiu ta me lĕ mơt.’27Mông hư̆n, yơng băh nuih tlŏng đač, khua nêh dư̆k hư̆n phưi lat jêh iên ndrŏh nuôn ta kăn hư̆n.28Ƀê̆ dăh trôh mông du ta ling ru, nêh dư̆k hư̆n tŏng tuôm ju nau mŏng băl mhŏ dư̆k ju băk kăn, jêng nêh đuôm nuôn kăn ju hiêng đơ-niê, jêh iên jai jêh ñư̆p pŏng knai, kăn tlăn ko, kăn ngơi: ‘Me đuôm nuôn ăñ me čiu gơñ.’29Jêh hư̆n, jai jêh čuôn krŭng, nêh mhŏ dư̆k băk kăn kôh dăn ta kăn, klăh iêu: ‘Dăn gir ta ăñ, jêh hư̆n ăñ jrăng čiu hư̆t ta me.’30Ƀê̆ dăh kăn so tŭ ư. Mlih ta iên, jai sak truông, kăn yua nêh nggruôn pŏng knai mŏng war tăl trôh mông pŏng knai čiu nŏh prăk nuôn.31Kơt iên, jai jêh so bruă trôh hư̆n, đơ băl mhŏ dư̆k băk kăn hư̆n ji nuih ngăn. Trôh mông sak mơñ, hên têh sơm nư̆m ta khua hên grăp bruă jêh trôh hư̆n.32Jêh hư̆n, jai jêh yua ndơp kăn dư̆k hư̆n trôh, khua kăn di ngơi ta kăn: ‘Wơ tlau dư̆k djŏh ƀai, ăñ jêh ndrŏh lĕ nuôn hư̆n ta me yơng băh me kôh dăn ăñ.33Bruă yuôm bhăn ya ăn me mhŏ so lăh geh jêng tlŏng đač nêh mhŏ dư̆k băk me, ăt ndrơm klăh ăñ jêh đač ta me, ya lăh?’34Yơng băh bruă lăm hao nuih klăh iên, khua kăn hư̆n jao kăn ta ka han pŭ yat tăl trôh mông kăn čiu lĕ mơt grăp nuôn hôm đuôm.35Bap tŏng trôk ăñ ji ăt jrăng mhŏ ta ŏh mi klăh iên ya, ndă grăp nau nêh mŏng ŏh mi so ndrŏh tih ta găp mi ŏh mi di ĕh lôh băh nuih nhăm tŏ.”
FAR EAST BROADCASTING COMPANY