Matthew17
1Pro nar ta kơi, Yang Yê-su ndơm Pê-trôih, wăt ta kăn Ya-kơ jêh iên Yô-han, ŏh kăn, jêh hư̆n Khua Yang ndơm bar nau hên gu no di sak čơng trôh ta ƀơn yôk jua.2Săk jăn Yang di ĕh mlih ta măt hên, jêh iên môh măt Khua Yang trang ang klăh măt nar, bơ ao Khua Yang ñjêng ang dơr klăh di pơp ang.3Jêh hư̆n dlăng tŏ, Mô-ih ta kăn Ê-li nôh ƀlang ta măt hên, jai tŏng ngơi ta Khua Yang.4Mông hư̆n, jai pŏk dơk, Pê-trôih ngơi ta Yang Yê-su: “Wơ Khua Yang, găl ngăn ta băl băn no di gŭk ta o. Ndă khua khơñ, ăñ jrăng lăm ndŏk ta tŭk ho pei mlăm tư̆m — ƀơn ta khua, ƀơn ta Mô-ih jêh iên ƀơn ta Ê-li.”5Mŏng mông jai hôm kăn ngơi, dlăng tŏ hư̆n, ju klŏ ñuôi tŭk ang dơr ĕh guôm hên, jêh iên dlăng ho, mau dơk ngơi băh nuông ñuôi tŭk tŏ, klăh iêu: “Ho jêng Kuôn khăp khơñ Ăñ ji, hư̆n Ăñ brơn nuih ngăn mŏng Kuôn ho. Ăn iêt dơk Kuôn hư̆n.”6Jêh tŏng kơt iên, băl ƀing kna ĕh bông trư̆p măt jêh iên bêng pơp đhir ngit.7Jêh hư̆n Yang Yê-su, jai jêh sak mơñ jêh iên bi tŏng săk hên, jêh hư̆n ngơi: “Ăn dŏk jêh iên ei ru bhŭng.”8Ƀê̆ dăh jai ngơk măt hên iêu tê̆, so hên so nêh dêh čuôm gu ju nau Yang Yê-su.9Jăng jai hên băh yôk tê̆ jư̆r mŏng sô̆, Yang Yê-su tơ tă ta hên, klăh iêu: “Ei ru wêh têh pơp jêh so ta nai tăl trôh mông Kuôn Nêh băh tŭk khư̆t jêh dŏk brêh.”10Băl ƀing kna hư̆n lup Khua Yang, klăh iêu: “Kơt iên pơp mhŏ băl tơ ti pơp bhiên ngơi kăn Ê-li jrăng trôh luôr?”11Mông hư̆n, jai lơ lang, Khua Yang ngơi: “Wăt di lăh Ê-li jrăng trôh jêh iên jrăng lăm ndŏk hư̆t grăp bruă.12Ƀê̆ dăh ăñ ngơi ta pu me klăh iêu Ê-li jêh trôh ru, jêh iên hên so gư̆t năl kăn. Mlih ta iên, hên mhŏ djăp mta pơp hên khơñ ta kăn. Ăt klăh iên ya, Kuôn Nêh mơñ tŭ pơp knap yơng băh hên.”13Mông hư̆n, băl ƀing kna gư̆t wơng ru Khua Yang ngơi ta hên yơng ta kăn Yô-han Ƀap-tit.14Jai jêh trôh ta băl uôn lan, ju nau nêh tlơ tlau sak mơñ Khua Yang, čuôn krŭng ta măt Khua Yang15jêh iên dăn: “Wơ Khua Yang, dăn đač un kuôn tlau ăñ ji, bơ yơng kăn geh ta pơp lu nggŏh săk jêh iên jêh kjham ngăn ru, yơng ĕh krĕh bông mŏng iñ, jêh iên krĕh lăč mŏng dak.16Ăñ jêh sak ndơp kăn trôh ta băl ƀing kna Yang di, ƀê̆ dăh hên so dơi lăm băh ta kăn ôh.”17Mông hư̆n, jai boh pơp, Yang Yê-su ngơi: “Wơ gưl nêh so đăo jêh iên rai lêk, ăñ jrăng gŭk băk pu me ŏk dŏng yau nar? Jrăng gir ăt pu me dŏng ŏk yau? Ăn ndơp kuôn tlau hư̆n trôh o ta ăñ.”18Yang Yê-su ôt ñjăm ĕh, mông hư̆n čak du băh kăn kuôn sei, jêh iên kăn dơi băh dŏng băh mông hư̆n.19Jêh hư̆n, jai jêh tŏng tuôm dêh ta Yang Yê-su, băl ƀing kna lup: “Pơp mhŏ băl hi so dơi prŏh čak hư̆n?”20Jêh hư̆n Khua Yang ngơi ta hên: “Yơng băh pơp đăo djhup dư̆r ŏh mi di. Bơ yơng ngĭn ngăn, ăñ ngơi ta ŏh mi, ndă ŏh mi mau pơp đăo klăh di ju nggăr pai bi, hư̆n ŏh mi jrăng ngơi ta yôk ho: ‘Ăn yĕh băh tŭk ho trôh ta tŭk tŏ,’ hư̆n ĕh jrăng yĕh du, jêh iên jrăng so mau ju mta pơp so dơi ta ŏh mi ôh.”21[Ƀê̆ dăh pôl čak ho so dơi prŏh ndă so knang ta pơp kuôl dăn jêh iên ngăl sa.]22Mông hư̆n, jăng jai hên tŏng ƀư̆n ju tŭk ta Ga-li-lê, Yang Yê-su ngơi ta hên: “Kuôn Nêh mơñ nai jao mŏng ti băl tih,23jêh iên hên jrăng lăm khư̆t Khua Yang, jêh hư̆n mŏng nar tal pei, Khua Yang jrăng wêh dŏk brêh.” Băl ƀing kna ĕh ñjêng bêng pơp nguôt nư̆ng.24Mông hư̆n, jai hên jêh sak trôh uôn Ka-ƀê-na-um, đơ băl rư̆ng jia hih ƀư̆n sak trôh ta Pê-trôih jêh iên lup: “Khua me di so kăn tôh jia hih ƀư̆n lăh?”25Kăn ngơi: “Mau.” Jêh iên mông jêh mư̆t mŏng hih tŏ, Yang Yê-su ngơi dơk ta kăn luôr, klăh iêu: “Si-môn, năn pơp me mĭn hư̆n? Grăp mtao tŏng dôn teh sŏk prăk mdăh rư̆ng jia băh nêh tơm? Băh ŏh kuôn hên mdăh băh nêh ta ling?”26Jai jêh ngơi: “Băh nêh ta ling”, Yang Yê-su ngơi ta kăn: “Kơt iên ŏh kuôn so nai sŏk ôh.27Ƀê̆ dăh no di băl băn so lăm păk bông ta hên, jăng jai sak dak sĭ, ăn me čĕ ndar jêh iên đŏh ka geh luôr bôk. Jai jêh tak dơk ĕh, me jrăng so ju siêk-lơ. Jêh dơi sŏk prăk hư̆n ru, ăn ndơp ta hên trĭp ta nŏh ăñ wăt me.”
FAR EAST BROADCASTING COMPANY