Matthew15
1Jêh hư̆n, đơ băl Pha-ri-si jêh iên khua tơ ti pơp bhiên băh Yê-ru-sa-lem trôh ta Yang Yê-su, hên ngơi:2“Pơp mhŏ băl ƀing kna me di mhŏ tih grăp pơp krĕh mưng băl khua u rañ di? Bơ yơng băl hên so rao ti mông sa ƀăñ.”3Ƀê̆ dăh jai boh pơp ngơi, Khua Yang ngơi ta hên: “Pơp mhŏ pu me mhŏ tih pơp bhiên Yang Trôk di yơng băh pơp krĕh mưng pu me di?4Bơ yơng Yang Trôk jêh tơ tă, klăh iêu: ‘Ăn mpŭ ta mei bap kuôn di,’ jêh iên ‘Nêh tơm păh rak bap mdăh mei, ăn lăm khư̆t nêh hư̆n.’5Ƀê̆ dăh pu me ngơi: ‘Nêh tơm ngơi ta bap mdăh mei kăn: “Djăp mta pơp băh pơp brêh kuôn dơi ĕh lăm tŭ dơn ta mei bap hư̆n jêng pơp mhŏ yang myơr ta Yang Trôk ru,”’6nêh hư̆n jrăng so hôm wêh mhŏ bruă găl ta mei bap kăn ôh. Kơt iên, pu me jêh ndrŏh lat pơp ngơi Yang Trôk di yơng băh pơp krĕh mưng pu me.7Wơ băl pra mhŏ găl! Ê-sai jêh têh luôr geh ngăn ta pu me, klăh iêu:8‘Uôn lan ho kôh mpŭ ăñ ta băr yuôi tuôi piêt,ƀê̆ dăh nuih nhăm băl ĕh jêng wăč ngăn băh Ăñ.9Ƀê̆ dăh hên kôh mpŭ Ăñ ta pơp dăh dan,jai tơ ti pơp bhiên jêng grăp pơp bhiên kuôn nêh di.’”10Jêh hư̆n jai jêh kuôl uôn lan trôh, Khua Yang ngơi ta hên: “Ăn iêt jêh iên wơng:11So mau ju mta pơp mư̆t mŏng dơk dơi lăm ƀơ̆ ju nau nêh, ƀê̆ dăh jêng pơp băh dơk ĕh lôh ta ling, pơp ho lăm ƀơ̆ nêh hư̆n.”12Jêh hư̆n, jai jêh trôh mơñ, băl ƀing kna ngơi ta Khua Yang: “Khua gư̆t ya đơ băl Pha-ri-si hên gư̆t mưč hên jai jêh tŏng pơp ngơi hư̆n lăh?”13Ƀê̆ dăh jai boh dơk, Khua Yang ngơi: “Grăp tơm jhi Bap tŏng trôk ăñ ji so tăm nai jrăng dŏk trôh rĕh.14Khiêp hên di! Hên jêng băl lăm truông tiêh măt. Ƀê̆ dăh ndă nêh tiêh têk lăm nêh tiêh, mông hư̆n lĕ bar jrăng lăč mŏng ƀăng.”15Mông hư̆n jai boh dơk, Pê-trôih ngơi ta Khua Yang: “Dăn lơ lang ta băl hi pơp hơ hôr hư̆n.”16Ƀê̆ dăh Khua Yang ngơi: “Tăl trôh ta mông ho, pu me ăt ñăm wơng ya lăh?17Pu me ñăm wơng ya grăp pơp mư̆t mŏng dơk hư̆n jrăng jư̆r mŏng ndư̆l jêh hư̆n ĕh du ta ling mŏng hih tôh djăh tŏ lăh?18Ƀê̆ dăh grăp pơp ĕh lôh băh dơk jêng pơp băh nuih nhăm tŏ, jêh iên ĕh lăm ƀơ̆ ñơ̆ nai.19Bơ yơng băh nuih nhăm ĕh lôh grăp pơp mĭn tih djŏh, lăm khư̆t nêh, dŏng tư̆r, čhơng tăt, tŭng tlĕ, têh huôk jêh iên grăp pơp ngơi mgao.20Hư̆n jêng grăp pơp lăm ƀơ̆ nêh, bơ sa ta ti ñăm rao pơp hư̆n so lăm ƀơ̆ kuôn nêh ƀă.”21Jêh hư̆n jai jêh du băh iên, Yang Yê-su du iêu nhar teh băl Ti-rơ jêh iên Si-đôn sô̆.22Jêh iên dlăng tŏ, ju nau u ur nêh Ka-na-an, jai jêh sak băh wăl hư̆n trôh, de ôr tĕh dơk, klăh iêu: “Wơ Yang, Kuôn mtao Đa-wit, dăn đač un ăñ! Kuôn ur ăñ geh yang djŏh mư̆t kjham ngăn.”23Ƀê̆ dăh Khua Yang so wêh ngơi ta de ju mta pơp ôh. Jai jêh sak mơñ Khua Yang, băl ƀing kna dăn Khua Yang, klăh iêu: “Dăn khua ăn de du lat, bơ yơng de hui hai ôr ta kơi băl băn.”24Bơ mông boh dơk, Khua Yang ngơi: “Ăñ so dơi trôh ta o, ndă so geh yơng băh pôl biêp suô̆ nga băl I-sra-el di.”25Ƀê̆ dăh jêh sak mơñ, de hư̆n čuôn krŭng ta măt Khua Yang, de ngơi: “Wơ Yang, dăn đru dŏng ăñ.”26Mông hư̆n, jai boh dơk, Khua Yang ngơi: “Sŏk ƀăñ ŏh kuôn di jêh iên čĕ ta sau kuôn jêng so găl.”27Ƀê̆ dăh de hư̆n ngơi: “Wơ Yang, geh kơt iên, čuôm gu grăp sau kuôn dơi sa đơ ƀăñ djăh ĕh lăč băh jhưng khua ĕh di gu.”28Mông hư̆n, no di boh pơp hư̆n, Yang Yê-su ngơi ta de: “Nar o wơ nêh u ur, pơp đăo e di ram ngăn. Bruă jrăng dơi ñjêng ta e hui si pơp e khơñ.” Jêh iên kuôn ur de di dơi băh dŏng băh mông hư̆n.29Jai jêh du băh wăl hư̆n, Yang Yê-su sak hui dak sĭ Ga-li-lê, jêh iên jai jêh čơng tŏng yôk, Khua Yang gŭk ta iên.30Jêh hư̆n pôl uôn lan ŏk sak čơng băk Khua Yang, mau ŏk nêh wiên, nêh tiêh, nêh djhup dư̆r, nêh mblo, jêh iên ŏk nêh dơ dêh ju băk hên. Nai ăn đơ băl hư̆n ta jŏng Khua Yang jêh iên Khua Yang lăm băh hên,31tăl, pôl uôn lan tŏng hơ̆ hă jai hên so nêh mblo dơi ngơi, nêh djhup dư̆r dơi prăl kjăp, nêh wiên dơi sak jêh iên nêh tiêh dơi so, jêh hư̆n hên nơ nei Yang Trôk băl I-sra-el di.32Mông hư̆n, jai jêh kuôl băl ƀing kna Yang di ta iên, Yang Yê-su ngơi: “Ăñ tlŏng đač ta uôn lan, bơ yơng hên gŭk băk ăñ pei nar ru ƀê̆ dăh so mau pơp no di sa ôh. Ăñ so khơñ hên du ndư̆l gai, ơn hên jrăng wiên nguôt păt truông.”33Băl ƀing kna ngơi ta Khua Yang: “Mŏng tač ndrăñ ho u băh sŏk ŏk ƀăñ klăh iên no di băl hi ăn ta uôn lan ŏk klăh iêu sa hơm?”34Yang Yê-su ngơi ta hên: “Pu me mau ŏk klŏ ƀăñ?” Jêh hư̆n hên tơih: “Pŏh klŏ, jêh iên bar pei lăm ka kuôn nê̆.”35Jêh iên jai jêh ăn ta uôn lan gŭk mŏng teh sô̆,36Khua Yang ñôt pŏh klŏ ƀăñ wăt ta bar pei lăm ka hư̆n, jêh iên jai jêh lăh găl, Khua Yang phič ƀăñ jao ta băl ƀing kna, jêh hư̆n băl ƀing kna tŏng phă ta băl uôn lan.37Uôn lan hên sa gơ gu jêh iên dơi hơm. Hên dôñ pŏh bai bêng lĕ mơt ƀăñ khăñ nai sa.38Mông hư̆n, nŏh nêh sa jêng puôn bau nêh tlơ tlau, so ngơp u ur ta kuôn sei.39Jai jêh ăn uôn lan du, Khua Yang mư̆t mŏng plŭng jêh iên sak trôh wăl Ma-ga-đan.
FAR EAST BROADCASTING COMPANY