Matthew1
1Ră čih năn pang yo Yang Tŏng Tlĕh Yê-su di, kuôn so Đa-wit, kuôn so A-bra-ham:2A-bra-ham bă I-săk, I-săk bă Ya-kôp, Ya-kôp bă Yu-đa ta ŏh mi kăn di,3Yu-đa yơng băh Ta-mar bă Pê-rêt ta Sê-răč, Pê-rêt bă Hêt-rôn, Hêt-rôn bă A-ram,4A-ram bă A-mi-na-đap, A-mi-na-đap bă Na-ăč-son, Na-ăč-son bă Săñ-môn,5Săñ-môn yơng băh Ra-hap bă Ƀô-ô, Ƀô-ô yơng băh Ru-tơ bă Ô-ƀêt, Ô-ƀêt bă Ye-sê,6Ye-sê bă mtao Đa-wit, Đa-wit yơng băh ur kăn U-ri di bă Sa-lô-môn,7Sa-lô-môn bă Rô-ƀô-am, Rô-ƀô-am bă A-ƀi-ya, A-ƀi-ya bă A-sa,8A-sa bă Yô-sa-phat, Yô-sa-phat bă Yô-ram, Yô-ram bă Ô-sia.9Ô-sia bă Yô-tam, Yô-tam bă A-ča, A-ča bă Ê-sê-čia,10Ê-sê-čia bă Ma-na-se, Ma-na-se bă A-môn, A-môn bă Yô-sia,11Yô-sia bă Yê-kô-nia wăt ta ŏh mi kăn di mŏng pơp sak mhŏ dư̆k ta Ƀa-ƀi-lôn,12jêh iên ta kơi pơp mhŏ dư̆k ta Ƀa-ƀi-lôn, Yê-kô-nia bă Sa-la-thi-ên, Sa-la-thi-ên bă Sô-rô-ƀa-ƀên,13Sô-rô-ƀa-ƀên bă A-ƀi-ut, A-ƀi-ut bă Ê-li-a-kim, Ê-li-a-kim bă A-sô,14A-sô bă Sa-đôk, Sa-đôk bă A-čim, A-čim bă Ê-li-ut,15Ê-li-ut bă Ê-lê-a-sa, Ê-lê-a-sa bă Ma-than, Ma-than bă Ya-kôp,16Ya-kôp bă Yô-sep, sai de Ma-ri, yơng băh de, Yang Yê-su, Mtao nai năn jêng Yang Tŏng Tlĕh, dơi lai săk.17Kơt iên, lĕ mơt grăp gưl dŏng băh A-bra-ham trôh ta Đa-wit jêng măt puôn gưl nêh, dŏng băh Đa-wit trôh ta nuk mhŏ dư̆k mŏng čar Ƀa-ƀi-lôn jêng măt puôn gưl nêh, jêh iên dŏng băh nuk mhŏ dư̆k mŏng čar Ƀa-ƀi-lôn trôh ta Yang Tŏng Tlĕh jêng măt puôn gưl nêh.18Pơp lai săk ta Yang Tŏng Tlĕh Yê-su jêng blăh iêu: Jai Ma-ri, mei Khua Yang, jêh nai tŏng huôt ta kăn Yô-sep, ƀê̆ dăh luôr ta hên tŏng gŭk ju băk, nai gư̆t de mau ndư̆l yơng băh Yang Ngăt Găl.19Bơ kăn Yô-sep, sai de, jêng nêh geh tŏng, jêh iên bơ yơng so kăn khơñ lăm prêng de ta măt nai, kăn mĭn ndrŏh muôč de.20Ƀê̆ dăh jai kăn mĭn yơng ta grăp bruă hư̆n, dlăng băh tŏ hư̆n, nêh myang Yang di nôh ƀlang ta kăn mŏng pơp mbơi, jêh iên ngơi: “Wơ Yô-sep, kuôn so Đa-wit, ei ru me ngam sŏk Ma-ri ñjêng ur, bơ yơng kuôn sei dêt de triêu mŏng ndư̆l de hư̆n jêng yơng băh Yang Ngăt Găl.21De jrăng lai săk ju nau kuôn tlau, jêh iên me jrăng nơ năn kuôn hư̆n jêng Yê-su, bơ yơng kuôn hư̆n jrăng lăm tlĕh uôn lan Yang di băh pơp tih hên.”22Djăp bruă trôh no di ĕh lăm nư̆k pơp jêh Yang Trôk ngơi ta băl têh luôr, klăh iêu:23“Dlăng tŏ hư̆n, ur drôh jrăng mau ndư̆l jêh iên lai săk ju nau kuôn tlau, jêh iên nai jrăng kuôl năn Khua Yang jêng Em-ma-nu-el” — lơ lang jêng “Yang Trôk gŭk băk băl băn.”24Jai jêh kăn ngĕh băh pơp bê̆, kăn Yô-sep mhŏ trip klăh di pơp nêh myang Yang Trôk tơ tă jêh iên kăn sŏk de ñjêng ur kăn di.25Ƀê̆ dăh kăn so bê̆ băk de tăl trôh mông de lai săk ju nau kuôn tlau. Jêh hư̆n kăn nơ năn kuôn tlau hư̆n jêng Yê-su.
FAR EAST BROADCASTING COMPANY