Mark6
1Băh tŭk hư̆n, Khua Yang dŏk du, jêh hư̆n du trôh ta uôn tơm Yang di, jêh iên băl ƀing kna Yang di hui gre Khua Yang.2Trôh nar Sa-ƀat, Khua Yang dư̆ng tơ ti mŏng hih ƀư̆n. Ŏk nêh iêt ĕh hơ̆ hă, jêh iên ngơi klăh iêu: “Đơ pơp tơ ti lăh ho u tŭk băh kăn sŏk? Pơp knhau jêh dơi mau mŏng kăn ho wăt ta pơp myang klăh tŏ hư̆n ĕh ƀlang băh ti kăn hư̆n jêng đô̆ nă?3So lăh geh ho jêng tlau trăh phat, kuôn tlau Ma-ri di, jêh iên mi tlơ tlau kăn Ya-kơ, Yô-sê, Yu-đe jêh iên Si-môn lăh? So lăh geh đơ rôh mei kăn di jai hên gŭk ta o mŏng mbar băl băn lăh?” Hên păk bông yơng ta Khua Yang.4Yang Yê-su ngơi ta hên klăh iêu: “Nêh têh luôr so tuôm kƀăh ôh pơp nai mpŭ, čuôm gu ta uôn hên tơm, mŏng mbar găp pôl hên jêh iên mŏng hih nhăk hên gu.”5Khua Yang so dơi mhŏ ju mta bruă myang ta iên ôh, čuôm gu Khua Yang lăm băh kuôp ji jai bi ti tŏng ƀê̆ ngăn nêh kuôp ji.6Khua Yang dlăng ndrơh ngăn yơng băh nuih krăk dăng hên di, jêh hư̆n Khua Yang sak tơ ti lăh jư̆m dar grăp uôn đăm.7Khua Yang kuôl măt bar ƀing kna jêh iên dư̆ng yua hên sak tơ ti, bar nau ju tŭk, Khua Yang ăt ăn ta hên pơp dơi tŏng grăp yang djŏh,8jêh iên tơ tă hên klăh iêu ei ru ñôt ju mta pơp jai sak truông, čuôm gu ƀơn mŏng jra gu — so ñôt ƀăñ, so ñôt kdô, ăt so ñôt prăk kăk mŏng sei drăng iêng ya —9ƀê̆ dăh ăn triêu jep, jêh iên “Pu me so dơi sŏh bar ao.”10Jêh iên Khua Yang tơ tă ta hên: “Năn mŏng hih jai pu me mư̆t, ăn gŭk ta iên tăl trôh ta mông pu me du băh hih hư̆n.11U ta tŭk so nai ruôm pu me, mdăh so khơñ iêt pu me, hư̆n jai du băh iên, ăn tơ tôh ƀhŭl mŏng jŏng pu me klăh di pơp lăm nư̆k tăm dăng ta hên.”12Hư̆n jêng, jai jêh sak truông, hên tơ ti klăh iêu grăp nau nêh ăn gư̆t niêl mlih.13Hên prŏh ŏk yang djŏh, jêh iên ñŏh dak ndriêng ta ŏk nêh kuôp ji jêh hư̆n lăm băh hên.14Hư̆n yơh, mtao Hê-rôt tŏng pĕh pơp ho, bơ yơng năn Yang di jêh ñjêng pĕh hing ŏk, jêh iên nai ngơi klăh iêu: “Yô-han Ƀap-tit jêh dơi wêh dŏk brêh băh tŭk khư̆t, hư̆n yơh grăp pơp ndrơh myang dơi mau mŏng nêh ho.”15Mau ya nêh dơ dêh ngơi klăh iêu: “Kăn ho jêng Ê-li.” Ƀê̆ dăh mau ya nêh ngơi hư̆n jêng: “Ju nau nêh têh luôr, ndrơm klăh di ju nau mŏng băl têh luôr.”16Ƀê̆ dăh jai jêh tŏng kơt iên, Hê-rôt ngơi klăh iêu: “Yô-han, jêng nêh ăñ ndăč bôk, kăn jêh dơi wêh dŏk brêh.”17Bơ yơng kăn Hê-rôt yơh, jêh yua nêh, ñư̆p Yô-han jêh iên čăp kăn mŏng war yơng ta bruă de Hê-rô-đia (ur kăn Phi-lip, ŏh tlơ tlau mtao di) bơ yơng mtao jêh sai de hư̆n.18Yơng băh Yô-han ngơi ta Hê-rôt klăh iêu: “Ngĭn ngăn tih ta pơp bhiên jai mtao sai ur ŏh mtao di.”19Ƀê̆ dăh Hê-rô-đia hao nuih ta kăn jêh iên khơñ lăm khư̆t kăn, ƀê̆ dăh de so thơp mhŏ ôh,20yơng băh Hê-rôt bhŭng Yô-han, bơ yơng gư̆t kăn jêng nêh geh tŏng jêh iên ƀrăh ngôr, hư̆n mtao ăn kăn dơi đăp nang, wăt di lăh jêh tŏng pơp kăn ngơi, mtao tŏng sriê̆ ngăn, ƀê̆ dăh mtao ăt ñăt nuih nhăm iêt kăn ngơi.21Jêh hư̆n jai jêh trôh mông geh găl, jêng mông Hê-rôt mkra mar mei lai săk kăn di kăn ndơm jă grăp băl khua kăn wăt ta băl git gai pôl ka han, jêh iên băl kĕ kriê wăl Ga-li-lê,22mông hư̆n kuôn ur de Hê-rô-đia mtao di, mư̆t mŏng tŏ, muñ kdŏ, jêh iên de lăm ăn ta Hê-rôt wăt băl năč gŭk jhưng ju băk mtao hên brơn nuih ngăn, hư̆n mtao ngơi ta de ur drôh: “Ăn e dăn ta ăñ djăp mta pơp e khơñ jêh iên ăñ jrăng ăn ĕh ta e.”23Kăn kăt săk ta de klăh iêu: “Wăt di lăh e dăn ăñ, trôh ta ju khăn čar ăñ ji, ăt ăñ jrăng ăn ta e ya.”24Hư̆n yơh, jai jêh du ta ling, de ur drôh hư̆n lup mei de: “Năn pơp ăñ jrăng dăn?” Jêh hư̆n mei de ngơi: “Bôk kăn Yô-han Ƀap-tit.”25Mhăč rŏk, mŏng pơp tơ tan jai de plơ̆ iêu mtao, de ur drôh dăn: “Ăñ khơñ mau mŏng mông ho rŏk mtao ăn ta ăñ bôk kăn Yô-han Ƀap-tit ăn tŏng măm.”26Wăt di lăh bêng pơp nguôt nư̆ng, ƀê̆ dăh mtao so thơp ơ̆ pơp de dăn ôh yơng băh pơp kăt săk kăn di jêh iên băl năč yang jai gŭk jhưng ju băk kăn,27hư̆n mtao mhăč rŏk, yua nêh kŏng pêh, ăn ndơp bôk Yô-han ta iên, jêh iên jai jêh du ling, nêh hư̆n sak srĕh bôk kăn mŏng mnă.28Kăn ñôt bôk Yô-han ăn tŏng măm jêh hư̆n jao ĕh ta de ur drôh, jêh hư̆n de ur drôh wêh jao ĕh ta mei de.29Jai jêh tŏng pĕh bruă hư̆n, băl ƀing kna Yô-han trôh ta iên, sŏk săk khư̆t kăn, jêh iên ñôt ĕh sak tăp bư̆l mŏng tu.30Băl ƀing kna ƀư̆n jư̆m dar Yang Yê-su, têh ta Khua Yang grăp bruă hên jêh tuôm mhŏ jêh iên grăp pơp hên jêh tơ ti.31Khua Yang ngơi ta hên: “Ăn pu me sak dêh trôh mŏng grăp tŭk ngă nguôi, jêh iên gŭk mdei dŏng nê̆.” Bơ yơng mau ŏk ngăn nêh sak tŏ nêh sak o, jêh iên tăl hên so mau mông no di sông sa.32Hên ju băk băl hao tŏng plŭng sak trôh ta tŭk ngă nguôi.33Ŏk nêh nai so hên du jêh iên gư̆t năl hên, hư̆n yơh băh grăp uôn ram, nai ju băk băl sak jŏng trôh ta iên jêh hư̆n nai trôh ta tŭk hư̆n luôr ta hên.34Jai jêh du băh plŭng, Khua Yang so ju pôl uôn lan ŏk ngăn, jêh iên Khua Yang mau nuih nhăm tlŏng đač hên bơ yơng hên ndrơm klăh di biêp so mau nêh kĕ, jêh hư̆n Khua Yang dư̆ng tơ ti lăh hên ŏk pơp.35Mông hư̆n jêh la ru, hư̆n yơh jai trôh ta Khua Yang, băl ƀing kna Yang di ngơi klăh iêu: “Tŭk ho jêng tŭk ngă nguôi jêh iên mông ho trôk jêh ngo ngăn ru.36Dăn ăn ta băl uôn lan du, no di jai jêh sak mư̆t mŏng grăp uôn jư̆m dar păt o, hư̆n lơi hên ruôt dêh pơp sông sa.”37Ƀê̆ dăh jai boh pơp hên, Khua Yang ngơi: “Pu me jrăng ăn hên sa.” Hên ngơi ta Khua Yang: “Jêh sak băh o, năng ai dơi băl hi ruôt bar hiêng đơ-niê ƀăñ jêh iên ăn ta băl uôn lan ho sa lăh?”38Jêh hư̆n, Khua Yang ngơi ta hên: “Ăn sak. Dlăng tŏ. Dŏng ŏk mlăm pu me mau ƀăñ?” Jai jêh hên sak dlăng, hên têh: “Prăm mlăm ƀăñ jêh iên bar mlăm ka.”39Khua Yang yua lĕ mơt băl uôn lan gŭk mŏng sô̆ ju pôl ju pôl tŏng băt piêk.40Hên gŭk tŏng phă ñjêng grăp pôl, phă ju pôl ju hiêng nau nêh jêh iên ju pôl prăm jăt nau nêh.41Jai jêh ñôt prăm mlăm ƀăñ jêh iên bar mlăm ka, ngơk măt tŏng trôk tê̆, Khua Yang lăh găl jêh iên phič ƀăñ jêh hư̆n ndơp ta băl ƀing kna Yang di no di hên sak tŏng phă ta băl uôn lan. Khua Yang wêh phă ya bar mlăm ka hư̆n ta grăp nau nêh.42Hên sa gơ gu jêh iên dơi hơm.43Jêh iên dơi hên dôñ măt bar bai bêng ƀăñ djăh wăt ta ka.44Đơ nêh jêh sa ƀăñ trôh ta prăm bau nau nêh tlơ tlau.45Mhăč rŏk, Khua Yang ñjêt băl ƀing kna Yang di hao tŏng plŭng jêh iên sak luôr trôh ta hang đăh tŏ, trôh ta Ƀêt-sai-đa, jăng jai Khua Yang ăn băl uôn lan du.46Jai jêh hên sak, Khua Yang čơng tŏng yôk no di kuôl dăn.47Trôh măng, plŭng jêh trôh mŏng mbar dak sĭ, jêh iên Khua Yang gŭk dêh ju nau tŏng hang.48So hên jai gir lĕ ai ƀăh plŭng — bơ yơng čal jai ĕh prôh iêu plŭng hên — năng ai trôh ta mông tal puôn măng hư̆n, Khua Yang sak jŏng tŏng bôk dak sĭ trôh tŭk hên jêh iên Khua Yang khơñ găn gao hên.49Ƀê̆ dăh jai hên so Khua Yang djhuang sak tŏng bôk dak sĭ, hên mĭn klăh iêu hư̆n jêng čak, hư̆n yơh hên ôr ndrăt,50bơ yơng hên so gơ gu Khua Yang jêh iên bhŭng ndrăt. Ƀê̆ dăh mhăč rŏk, Khua Yang ngơi ta hên jêh iên tơ tă hên: “Ăn kjăp nuih nhăm! Jêng ăñ ho! Ei ru bhŭng!”51Khua Yang djhuang mư̆t mŏng plŭng băk hên jêh iên čal gŭk miêt rŏk, grăp băl ƀing kna mau pơp ñhuôt ktang ngăn mŏng mbar hên.52Bơ yơng hên so wơng yơng ta pơp myang lăm ñjêng ƀăñ, mlih ta iên, nuih nhăm hên ăt hôm krăk dăng.53Jăng jai jêh sak găn hang đăh tŏ, hên sak trôh Gê-nê-sa-rêt jêh iên čhiêp plŭng ta hang hư̆n.54Jai hên du băh plŭng, bơ yơng gư̆t năl Khua Yang rŏk,55hư̆n nai dhul grăp wăl hư̆n jêh iên dư̆ng tung đơ băl kuôp ji tŏng jhưng trôh ta tŭk hên tŏng pĕh klă Khua Yang jai gŭk ta iên.56U ta tŭk Khua Yang sak mư̆t, mŏng grăp uôn đăm, mdăh mŏng uôn ram mdăh mŏng uôn wăč, băl uôn lan hên sak ndơp đơ băl kuôp ji ăn ta tŭk tăč blơ̆ jêh iên dăn Khua Yang no di ƀê̆ ngăn hên dơi bi ta tiêng ao Khua Yang, jêh iên đơ nêh tơm dơi bi tŏng Khua Yang jrăng dơi băh kuôp ji.
FAR EAST BROADCASTING COMPANY