Mark15
1Ang ôi măng hư̆n rŏk, mông băl khua mhŏ yang ram jêh tŏng ƀư̆n pơp trông čhai ta băl khua u rañ wăt băl tơ ti pơp bhiên jêh iên lĕ mơt Pôl Băl Yo Thaĭ, jai jêh čăp Yang Yê-su, hên lăm Khua Yang sak jêh iên jao ta kăn Pi-lat.2Pi-lat lup Khua Yang: “Me jêng Mtao băl Yo Thaĭ geh ya?” Ƀê̆ dăh jai boh pơp kăn, Khua Yang ngơi: “Me tơm ngơi klăh iên.”3Jêh hư̆n băl khua mhŏ yang ram kčŭt Khua Yang ŏk pơp dơ dêh.4Mông hư̆n, Pi-lat wêh lup čêk Khua Yang klăh iêu: “Me so ngơi ju mta pơp nơn lăh? Dlăng tŏ, hên jai kčŭt me ŏk khĕ pơp tŏ hư̆n!”5Ƀê̆ dăh Yang Yê-su so hôm wêh ngơi ju mta pơp ôh, tăl kăn Pi-lat dlăng ndrơh ngăn.6Gao băh iên, mŏng mông mar, kăn krĕh phưi ta uôn lan ju nau nêh mnă jêng nêh mnă hên khơñ.7Mông hư̆n, mau ju nau nêh nai năn jêng Ƀa-ra-ƀa, jai nai nggruôn ju băk ta băl lăm rŭng, hư̆n jêng băl mhŏ tih lăm khư̆t nêh mŏng pơp tăm dăng ta nuk kna.8Jai jêh trôh ta iên, băl uôn lan ŏk dư̆ng dăn ta kăn klăh di kăn krĕh mhŏ ta hên.9Mông hư̆n, Pi-lat lup hên, klăh iêu: “Pu me khơñ ăñ phưi Mtao băl Yo Thaĭ ta pu me ya?”10Bơ yơng kăn gư̆t ru băl khua mhŏ yang ram ñư̆p jao Khua Yang yơng băh nuih tŏng nač.11Ƀê̆ dăh băl khua mhŏ yang ram čhôl trôt pôl ŏk no di mlih ta iên, ăn kăn lăm tlĕh Ƀa-ra-ƀa ta hên.12Ƀê̆ dăh, jai lup hư̆t, Pi-lat ngơi ta hên: “Ndă iên, đô̆ nă ăñ jrăng mhŏ yơng ta nêh pu me kuôl jêng Mtao uôn lan Yo Thaĭ ho?”13Mông hư̆n, uôn lan wêh ôr tĕh: “Ăn păng đĭn kăn ta jhi tăm kăng.”14Ƀê̆ dăh, Pi-lat ngơi ta hên: “Yơng băh năn pơp tih kăn mhŏ hư̆n?” Ƀê̆ dăh, nai ndôl ôr tĕh hĭn: “Ăn păng đĭn kăn ta jhi tăm kăng.”15Mông hư̆n, yơng băh khơñ lăm găl nuih nhăm băl ŏk, Pi-lat lăm phưi kăn Ƀa-ra-ƀa ta hên jêh iên kăn yua nêh ndơp Yang Yê-su iêu tŏ no di jêh tŭ nai pŭ plat, Khua Yang tŭ păng đĭn.16Mông hư̆n, băl ka han đŏh Khua Yang lăm mư̆t mŏng hih (hư̆n jêng hih khua kwar di) jêh iên kuôl lĕ pôl ka han tŏng ƀư̆n ju tŭk,17jêh hư̆n băl ĕh lăm sŏh tŏng săk Yang ju blăh ao brông hăr, jêh iên lăm ndau ta Khua Yang ƀơn đuôn mtao ta luôk jêh băl ĕh tañ,18jêh hư̆n băl ĕh dư̆ng kôh Khua Yang: “Nơ nei Mtao băl Yo Thaĭ!”19Jêh hư̆n, băl ĕh pŭ tŏng bôk Khua Yang ta mŏng jra jêh iên čhŏh dak diêu tŏng Khua Yang, jêh iên čuôn krŭng ka kôh Khua Yang.20Mông jêh băl ĕh liê̆ mưč Khua Yang ru, băl ĕh lĕh băh săk Khua Yang ao brông hăr jêh iên lăm sŏh ao Yang di ta săk Khua Yang, jêh hư̆n lăm Khua Yang sak no di hên păng đĭn Khua Yang ta jhi tăm kăng.21Hên ñư̆p ju nau nêh sak truông, năn kăn jêng Si-môn, nêh Si-ren (bap kăn A-lek-san-đơ jêh iên Ru-phu), trôh băh uôn đăm sô̆, no di kăn tung jhi tăm kăng Yang di.22Băl ĕh ndơp Khua Yang trôh ta Gôl-gô-tha (tŭk hư̆n nai nơ năn jêng “Tŭk Ndŏh Bôk”).23Băl ĕh ăn Khua Yang ñêt nơm jêh tăm lŭk ta dak gư̆n tăng, ƀê̆ dăh so Khua Yang ñêt.24Jêh hư̆n hên păng đĭn Khua Yang jêh iên tăm phă blăh ao Yang di ta pơp tăm mđăo ndăng hên, dlăng nêh tơm dơi dơn ao.25Mông hư̆n jêng mông tal pei, băl ĕh păng đĭn Khua Yang.26Ho jêng pŏk mdhă pơp tih Yang di, hên čih iêu: “Mtao Băl Yo Thaĭ.”27Băl ĕh ăt păng đĭn ya bar nau băl tlĕ ju băk Khua Yang, ju nau ting đăh ma, bơ kăn ƀơn ting đăh kiêu Khua Yang.28(Pơp ngơi Ră Ƀrăh jêh ñjêng nư̆k, klăh iêu: “Khua Yang geh nai ngơp ju băk ta băl so mau pơp bhiên.”)29Đơ băl găn truông hên čhŏh mưč Khua Yang, hên ngăč bôk jêh iên ngơi: “Hơi! Wơ tlau lăm rai hih ƀư̆n jêh iên lăm ndŏk hư̆t mŏng pei nar,30ăn lăm tlĕh dêh săk me tơm jêh iên jư̆r băh jhi tăm kăng hư̆n gơñ!”31Ăt ndrơm klăh iên ya, đơ băl khua mhŏ yang ram wăt băl tơ ti pơp bhiên, hên liê̆ mưč Khua Yang, hên ngơi: “Kăn dơi lăm tlĕh ŏk nêh dơ dêh, ƀê̆ dăh kăn so dơi lăm tlĕh săk kăn tơm.32Yang Tŏng Tlĕh, Mtao băl I-sra-el, mông ho ăn jư̆r băh jhi tăm kăng gơñ, no di băl hi so jêh iên tip.” Đơ băl nai păng đĭn ju băk Khua Yang ăt hên ngơi mưč Khua Yang ya.33Trôh mông tal pro, pơp ngo măng ĕh trôh guôm lĕ dôn teh tăl trôh mông tal sư̆n.34Mŏng mông tal sư̆n, Yang Yê-su ôr tĕh dơk: “Ê-lô-i, Ê-lô-i, la-ma-sa-ƀăč-tha-ni?” Pơp hư̆n lơ lang jêng: “Wơ Yang Trôk ăñ, Yang Trôk ăñ, pơp mhŏ Khua Yang ndrŏh lat ăñ?”35Jai tŏng kơt iên, đơ băl dŏk mơñ ta iên ngơi: “Dlăng tŏ, kăn jai kuôl Ê-li.”36Jêh hư̆n, ju nau ka han, jai jêh kăn dhul sak ñŭk djhôp bêng dak srat, kăn čôh ta tơm prŏh, nêh hư̆n ăn Khua Yang ñêt, kăn ngơi: “Lơi khiêp kăn di, dlăng Ê-li sak lăm tlĕh kăn mdăh so.”37Mông hư̆n, jai jêh ôr ju dŏ tĕh ngăn, Yang Yê-su tĕ nhăm tôč dư̆t.38Jêh iên păng dhiêm ram mŏng ƀư̆n ĕh čriêk mŏng mbar băh tê̆ trôh mŏng sô̆.39Mông hư̆n khua ka han, jêng nêh dŏk mơñ hĭn ta Khua Yang, jai jêh kăn so ru Khua Yang tĕ nhăm kơi dư̆t klăh iên, kăn ngơi: “Ngĭn ngăn, nêh ho jêng Kuôn Yang Trôk di.”40Ăt mau ya băl u ur dŏk dlăng băh tŭk wăč, mŏng hên hư̆n mau Ma-ri Ma-đơ-len, Ma-ri (mei Ya-kơ kuôn nê̆ jêh iên Yô-sê) wăt ta Sa-lô-mê,41hư̆n jêng đơ băl jăng jai Khua Yang hôm gŭk ta Ga-li-lê, hên tuôm gre Khua Yang jêh iên đru bruă Khua Yang, mau ŏk ya băl u ur dơ dêh hui gre ju băk Khua Yang sak trôh Yê-ru-sa-lem.42Trôh mông trôk jêh ngo ru, bơ yơng nar hư̆n jêng Nar Prăp Prê, hư̆n jêng nar luôr ta nar Sa-ƀat,43Yô-sep, jêng nêh băh čar A-ri-ma-thê, ju nau nêh năng mpŭ mŏng Pôl Phat Dôih, ăt jêng nêh jai kăp găn čar tŏng trôk Yang Trôk di, jai jêh trôh ta iên, kăn sak tŏng tuôm rŏk ta Pi-lat jêh iên kăn lup dăn săk khư̆t Yang Yê-su.44Mông hư̆n, Pi-lat dlăng ndrơh ngăn ndă ngĭn ngăn Khua Yang jêh khư̆t ru, jêh hư̆n jêh kăn kuôl khua ka han, kăn lông lup nêh hư̆n no di gư̆t Khua Yang khư̆t ŏk ru yau.45Mông jêh kăn gư̆t nư̆k ru bruă hư̆n băh khua ka han, kăn jao săk khư̆t ta Yô-sep.46Jai jêh kăn ruôt mnal nhơ, lăm jư̆r Khua Yang băh jhi tăm kăng, kăn put Khua Yang ta mnal hư̆n, jêh iên ăn Khua Yang mŏng tu môč jêh nai phat tŏng gơp mau. Jêh hư̆n kăn lơk ƀơn bôk mau ram ndăl lat ƀăng tu.47Mông hư̆n, Ma-ri Ma-đơ-len jêh iên Ma-ri mei kăn Yô-sê jêh hên so ru tŭk nai tăp bư̆l Khua Yang.
FAR EAST BROADCASTING COMPANY