Mark12
1Khua Yang dư̆ng ngơi ta hên ta pơp hơ hôr: “Ju nau nêh hư̆n tăm mir ño, pêr nêr jư̆m dar, sir ƀăng păt dak ño, lăm ndŏk ju mlăm hih jua, jêh iên ăn ta băl tăm ño mưn mir hư̆n, jêh iên kăn sak čar wăč.2Trôh dơm lêh ple, kăn yua ju nau nêh dư̆k sak ta băl tăm ño no di băh băl ho, kăn dơi dơn ju khăn kao nga băh mir hư̆n.3Ƀê̆ dăh jai jêh ñư̆p pŏng knai, băl ĕh pŭ bang jêh hư̆n prơh du ti gai.4Kăn wêh yua ju nau nêh dư̆k dơ dêh sak ta băl ĕh, jêh iên ta kăn dư̆k hư̆n, băl ĕh pŭ tŏng bôk jêh iên mưč mač.5Jêh hư̆n kăn wêh yua dư̆k dơ dêh ya, ta nêh hư̆n, băl ĕh lăm khư̆t, ju băk ta ŏk băl dơ dêh — nar o pŭ bang nêh ho, tŏng o lăm khư̆t nêh dơ dêh.6Kăn hôm gu ju nau nêh, jêng kuôn tlau khăp khơñ ngăn, kăn yua kuôn hư̆n, nêh kơi dư̆t, sak ta băl ĕh, kăn mĭn klăh iêu: ‘Băl ĕh jrăng mpŭ ta kuôn tlau ăñ.’7Ƀê̆ dăh băl tăm ño hư̆n tŏng trông čhai ndăng hên klăh iêu: ‘Ho jêng tlau dơn ngăn. Jơ̆ sak, băl băn lăm khư̆t kăn, jêh hư̆n ngăn drăp kăn dơn hư̆n jrăng ñjêng pơp băn di.’8Kơt iên jai jêh ñư̆p čăp, băl ĕh lăm khư̆t kuôn tlau hư̆n, jêh hư̆n čĕ pŏng knai ta ling mir ño.9Hư̆n yơh, Đô̆ nă khua mir ño jrăng mhŏ? Kăn jrăng sak lăm khư̆t lĕ mơt băl tăm ño jêh iên jao mir ño ta băl dơ dêh.10Pu me ñăm tuôm dlăng pơp ho mŏng Ră Ƀrăh lăh?‘Bôk mau jêh băl mhŏ hih ndrŏh lat,mau hư̆n jêh ĕh ñjêng mau tur hih.11Bruă hư̆n trôh băh Yang Trôk,jêh iên hư̆n jêng bruă ndrơh ngăn ta măt băl băn.’”12Hư̆n jêng hên juôi truông ñư̆p Khua Yang ƀê̆ dăh hên bhŭng uôn lan, bơ yơng hên gư̆t klă Khua Yang prơ pơp hơ hôr hư̆n čiêng ngơi ta hên. Hư̆n yơh jai yĕh băh Khua Yang, hên du tŭk dêh.13Jêh hư̆n hên yua bar pei nau nêh ting ju pôl Pha-ri-si jêh iên ting ju pôl Hê-rôt sak ta Khua Yang no di hên mblơm Khua Yang mŏng pơp ngơi.14Trôh ta iên, hên ngơi ta Khua Yang: “Wơ khua, băl hi gư̆t ru khua jêng nêh ngĭn ngăn jêh iên mŏng khua, so mau pơp hui gre ju nau nêh ôh, bơ yơng khua so dlăng băh bôk dih kuôn nêh, mlih mŏng iên, khua tơ ti lăh truông ƀăng Yang Trôk di geh trip ta pơp ngĭn ngăn. Geh ta pơp bhiên mdăh so jai tôh jia ta Sê-sa? Băl băn tôh jia mdăh ei ru tôh jia?”15Ƀê̆ dăh yơng băh gư̆t luôr ru pơp krĕh pra mhŏ nhăp mhŏ găl hên di, Khua Yang ngơi ta hên: “Pơp mhŏ pu me lông dlăng ăñ? Ăn ndơp ta ăñ ju đơ-niê no di ăñ dlăng.”16Hư̆n jêng hên ndơp ju đơ-niê, jêh hư̆n Khua Yang ngơi ta hên: “Rup jêh iên năn ho jêng nêh tơm di?” Hên ngơi ta Khua Yang: “Sê-sa di.”17Mông hư̆n, Yang Yê-su tơ tă hên: “Ăn plơ̆ ta Sê-sa năn pơp Sê-sa di, jêh iên plơ̆ ta Yang Trôk năn pơp Yang Trôk di.” Hên hơ̆ hă ta măt Khua Yang.18Jêh hư̆n pôl băl Sa-đu-sê, jêng băl krĕh ngơi klăh iêu so mau pơp wêh dŏk brêh, sak ta Khua Yang jêh iên lup čêk Khua Yang, klăh iêu:19“Wơ khua, Mô-ih jêh čih ta băl hi klăh iêu: ‘Ndă mi ju nau nêh hư̆n khư̆t kăn lơi ur ndrau ƀê̆ dăh ñăm mau kuôn, mông hư̆n ŏh nêh mi hư̆n jrăng sai ur ndrau hư̆n no di bă kuôn ta brau mi kăn.’20Mau pŏh nau ŏh mi hư̆n, kăn mi bôk gŭk ur jêh iên khư̆t, so mau kuôn,21nêh tal bar sai de hư̆n, jêh hư̆n khư̆t, so mau kuôn, jêh iên nêh tal pei ăt iên ya,22lĕ pŏh nau so mau kuôn gơ gu. Trôh kơi dư̆t, nêh u ur hư̆n khư̆t ya.23Trôh nar dŏk brêh, jai hên wêh brêh, de hư̆n jrăng ñjêng ur nêh tơm mŏng hên hư̆n? Bơ yơng pŏh nau hên jêh sŏk de ñjêng ur.”24Yang Yê-su ngơi ta hên: “So lăh geh pu me jêh nai lăm čhuai yơng băh pơp ho lăh, yơng băh so gư̆t wơng Ră Ƀrăh wăt ta pơp myang Yang Trôk di?25Bơ yơng mông kuôn nêh băh tŭk khư̆t dŏk brêh, nai so hôm gŭk ur mdăh gŭk sai, ƀê̆ dăh hên jrăng ñjêng klăh di băl myang tŏng trôk.26Ƀê̆ dăh yơng ta bruă nêh khư̆t dơi dŏk brêh, năng ai pu me ñăm dlăng mŏng ră Mô-ih, ta tŭk kăn čih yơng ta pôm luôk, đô̆ nă Yang Trôk ngơi ta kăn lak: ‘Ăñ jêng Yang Trôk kăn A-bra-ham, Yang Trôk kăn I-săk, jêh iên Yang Trôk kăn Ya-kôp’?27Khua Yang so geh jêng Yang Trôk băl khư̆t di, ƀê̆ dăh hư̆n jêng băl brêh di. Pu me čhuai kjham ngăn ru.”28Jai ju nau mŏng băl tơ ti pơp bhiên sak mơñ, čang tŏng pơp hên jai tŏng nhan, kăn so ru Khua Yang wêh lăh ta băl tŏ hư̆n geh ngăn, hư̆n kăn lup Khua Yang: “Năn pơp jêng pơp bhiên yuôm bhăn hĭn mŏng lĕ mơt?”29Yang Yê-su ngơi klăh iêu: “Pơp bhiên yuôm hĭn jêng: ‘Wơ I-sra-el, ăn iêt ho, Khua Yang, Yang Trôk băl băn, jêng Yang čuôm gu ƀơn30Ăn kuôn khăp Yang jêng Yang Trôk kuôn di ta lĕ mơt nuih nhăm kuôn, ta lĕ mơt ngăt nhuôl kuôn, ta lĕ mơt pơp gư̆t mĭn kuôn, jêh iên ta lĕ mơt pơp prăl ktang kuôn di.’31Pơp bhiên tal bar jêng ho: ‘Ăn kuôn khăp khơñ nêh kiêu ma kuôn di klăh di săk jăn tơm.’ So hôm mau ju mta pơp bhiên dơ dêh ram hĭn ta bar mta ho.”32Khua tơ ti pơp bhiên ngơi ta Khua Yang: “Geh ngăn, wơ khua! Khua jêh ngơi hui si pơp ngĭn ngăn ru Khua Yang jêng čuôm gu ƀơn, jêh iên so mau yang dêh dai gao hĭn băh Khua Yang.33Khăp khơñ Khua Yang ta lĕ mơt nuih nhăm, ta lĕ mơt pơp gư̆t mĭn, wăt ta lĕ mơt pơp ktang, jêh iên khăp khơñ nêh kiêu ma ndrơm ta săk tơm pơp hư̆n tăl ĕh yuôm bhăn hĭn ta grăp pơp mhŏ yang pô̆ jêh iên pơp mhŏ yang dêh.”34Jai jêh dlăng kăn, yơng băh kăn wêh lăh ta pơp gư̆t mĭn, Yang Yê-su ngơi ta kăn: “Me so wăč băh uôn tŏng trôk Yang Trôk di ƀă.” Jêh iên so mau nêh năñ wêh lup čêk Khua Yang ôh.35No di boh pơp, mông jai tơ ti mŏng jŏng gung hih ƀư̆n, Yang Yê-su ngơi: “Đô̆ nă mhŏ no di băl tơ ti pơp bhiên ngơi klăh iêu Yang Tŏng Tlĕh jêng kuôn mtao Đa-wit?36Dơk mtao Đa-wit tơm, mŏng Yang Ngăt Găl, kăn ngơi:‘Yang ngơi ta Yang ăñ:“Ăn gŭk đăh ma Ăñ,tăl trôh ta mông Ăñ ăn băl rŏh Kuôn ta jŏng Kuôn di.”’37Dơk mtao Đa-wit tơm kuôl Khua Yang jêng ‘Yang Trôk,’ hư̆n đô̆ nă Khua Yang dơi jêng kuôn mtao hư̆n di ya?” Pôl uôn lan ŏk iêt Khua Yang srei ngăn.38Mŏng pơp tơ ti lăh Yang di, Khua Yang ngơi: “Ăn ñjrăng ta băl tơ ti pơp bhiên, jêng băl khăp čiêng čư̆t sŏh ta čhum ao djha, grăp pơp kôh nơ nei mŏng tŭk tăč blơ̆,39tŭk gŭk drưh ang mŏng hih ƀư̆n wăt ta tŭk gŭk bôk măt mŏng tŭk mar.40Đơ băl hư̆n hên luôn hih băl ur ndrau, pra mhŏ kuôl dăn djhak. Pôl băl ho jrăng tŭ pơp phat dôih kjham hĭn.”41Jai jêh gŭk mŏng sô̆ tŏng ta tŭk nai ăn hip prăk myơr hih ƀư̆n, Khua Yang ksiêm dlăng uôn lan lăm lôh prăk mŏng hip đô̆ nă. Ŏk băl ndrŏng hên lăm lôh mŏng iên ta nŏh prăk ram.42Jai ju nau ur ndrau ƀun sak mơñ, de lăm lôh bar lui prăk kuôn nê̆, nŏh yuôm ĕh jêng ju su.43Jai jêh kuôl ƀing kna Yang di trôh ta iên, Khua Yang ngơi ta hên: “Ngĭn ngăn, ăñ ngơi ta pu me klăh iêu ur ndrau ƀun ho de myơr ŏk hĭn lĕ mơt đơ băl jêh lăm lôh prăk mŏng hip tŏ hư̆n.44Bơ yơng lĕ dŏng hên čuôm gu myơr băh pơp khăñ khăh hên di gu, ƀê̆ dăh ur ndrau hư̆n, dŏng băh pơp knap mñai de di, de myơr lĕ mơt djăp mta pơp de dơi mau, hư̆n jêng djăp pơp thêm ñăt no di ruông brêh de.”
FAR EAST BROADCASTING COMPANY