Luke12
1Mŏng mông hư̆n, jai pôl ŏk êbau nau nêh tăm ƀư̆n tăl tŏng juôt lên ndăng săk, hư̆n luôr hĭn, Khua Yang dư̆ng ngơi ta băl ƀing kna Yang di: “Ăn ñjrăng săk tơm băh pei băl Pha-ri-si, hư̆n jêng pơp mưng pra mhŏ găl.2Ƀê̆ dăh so mau ju mta pơp nai ndăp jêh iên jrăng so dơi lăm pơl, mdăh srôm khăp jêh iên jrăng so dơi nai gư̆t.3Hư̆n yơh, năn pơp jêh pu me ngơi mŏng tŭk ngơ ngo jrăng dơi tŏng mŏng tŭk ang, jêh iên năn pơp pu me ngơi muôč ta tôr mŏng dŭ lăm ndăp jrăng dơi têh sơm tŏng dôn hih.4Ƀê̆ dăh, ăñ ngơi ta pu me jêng nêh jôk kuăng ăñ ji, man bhŭng yơng băh băl dơi lăm khư̆t săk jăn, jêh iên ta kơi hư̆n so dơi hôm mhŏ ju mta pơp ôh.5Ƀê̆ dăh ăñ jrăng lăm ƀlang ta pu me gư̆t nêh tơm ta bhŭng. Ăn bhŭng ta Mtao, jai jêh lăm khư̆t săk jăn, mau pơp dơi čĕ nai mŏng war iñ. Geh ru, ăñ ngơi ta pu me, ăn bhŭng ta Mtao hư̆n.6So lăh geh prăm mlăm sư̆m srai dơi blŏ bar nggăr prăk lăh? Ƀê̆ dăh so mau ƀăh ƀơn mŏng ĕh dơi lăm wăr ta măt Yang Trôk.7Gao hĭn ta iên tăl ta sŏk tŏng bôk pu me jêh dơi ngơp lĕ ru. Man bhŭng: pu me yuôm ŏk hĭn ta sư̆m srai.8Ăñ ngơi ta pu me nêh tơm têh sơm ăñ ta măt nai, hư̆n Kuôn Nêh ăt jrăng têh sơm nêh hư̆n ta măt băl myang Yang Trôk di ya,9bơ nêh tơm khan ăñ ta măt nai hư̆n ăñ ăt jrăng khan ta măt băl myang Yang Trôk di ya.10Jêh iên nêh tơm ngơi pơp tăm dăng ta Kuôn Nêh jrăng dơi đač un, ƀê̆ dăh ta nêh tơm ngơi mgao trôh ta Yang Ngăt Găl jrăng so dơi đač un ƀă.11Ƀê̆ dăh jai nai lăm ndơp pu me trôh ta grăp hih ƀư̆n, băl kĕ kriê jêh iên băl ñôt bôk, man rŭng răng đô̆ nă jrăng ngơi mgang tơm mdăh djăp pơp, mdăh năn pơp pu me jrăng ngơi,12bơ yơng trip mŏng mông hư̆n, Yang Ngăt Găl jrăng tơ ti pu me năn pơp khơñ ngơi.”13Jêh hư̆n, ju nau nêh mŏng pôl ŏk ngơi ta Khua Yang: “Wơ Khua Yang, dăn ngơi un mi ăñ phă ngăn drăp ta ăñ.”14Ƀê̆ dăh Khua Yang ngơi ta nêh hư̆n: “Wơ mi, nêh tơm ăn ăñ jêng khua phat dôih mdăh nêh bi la tăm phă un ngăn drăp ta pu me?”15Jêh hư̆n Khua Yang ngơi ta hên: “Ăn răng jêh iên ñăt săk tơm tlĕh băh grăp pơp mưng he khơñ, bơ yơng pơp brêh ju nau nêh so mau gŭk mŏng tŭk ngăn drăp khăñ khăh kăn di ôh.”16Jêh hư̆n, Khua Yang tơ têh ta hên ƀơn pơp hơ hôr klăh iêu: “Tač lŏ ju nau nêh ndrŏng tŏ ĕh jêng ngăn,17jêh iên kăn mau pơp mĭn klăh iêu: ‘Đô̆ nă ăñ jrăng mhŏ ho, bơ yơng ăñ so hôm mau tŭk no di ñăt phei ba ăñ ôh?’18Kăn ngơi: ‘Ăñ jrăng mhŏ klăh iêu: “Ăñ jrăng plŭng lĕ năm ba ăñ, mkra ram hĭn, jêh iên ñăt mŏng iên lĕ mơt phei ba ju băk ta pơp no găl ăñ ji.”19Jêh hư̆n ăñ jrăng ngơi ta ngăt nhuôl ăñ: “Wơ ngăt nhuôl, me jêh mau ŏk ngăn drăp thêm ñăt ta yau năm. Ăn tui si khơñ, sông sa, ñêt jêh iên čhô̆ brơn.”’20Ƀê̆ dăh Yang Trôk ngơi ta kăn: ‘Wơ nêh plư̆p, trip măng ƀê̆ ngăt nhuôl me nai sŏk hư̆t, jêh hư̆n lĕ mơt pơp jêh me thêm ñăt nêh tơm jrăng dơn?’21Nêh tơm thêm ñăt ngăn drăp ta tơm ƀê̆ dăh so ndrŏng mŏng Yang Trôk ăt kơt iên ya.”22Jêh hư̆n Khua Yang ngơi ta băl ƀing kna Yang di: “Yơng kơt iên, ăñ ngơi ta pu me, man rŭng răng ta pơp brêh tơm, năn pơp jrăng sa — ăt ei ru rŭng răng ta săk jăn pu me, năn pơp jrăng čư̆t sŏh.23Bơ yơng pơp brêh jêng yuôm hĭn pơp sa, jêh iên săk jăn yuôm hĭn čhum ao.24Ăn dlăng pôl sư̆m đak, hư̆n jêng ĕh so răh ăt ei so riêk, so mau năm ñăt mdăh krĕh drŏng thêm ta ĕh, ƀê̆ dăh Yang Trôk ruông ĕh. Pu me yuôm ŏk hĭn ta pôl sư̆m!25Ƀê̆ dăh, nêh tơm mŏng pu me, mơn băh pơp rŭng răng, dơi wêh mbăč hư̆t ta pơp brêh kăn djha ƀê̆ dŏng nê̆ ya?26Kơt iên, ndă pu me so dơi mhŏ čuôm gu bruă ku êt ho, hư̆n pơp mhŏ pu me wêh rŭng răng li ta lĕ mơt bruă dơ dêh?27Ăn ksiêm dlăng kao huê̆ — đô̆ nă ĕh sak ta ram. Ĕh so ăr măh, ăt so ri brai. Ƀê̆ dăh ăñ ngơi ta pu me, tăl ta mtao Sa-lô-môn, ta lĕ mơt pơp guh ang mtao hư̆n, ăt so dơi čư̆t sŏh nhăp ndrơm ju kuông mŏng kao hư̆n ya.28Wơ nêh ƀê̆ pơp đăo, ndă Yang Trôk lăm sŏh klăh iên ta kao băt mŏng tač lŏ hư̆n jêng pơp nar o hôm tŏng o nai čĕ mŏng iñ, ƀăh jai pu me khăñ khăh hĭn ta iên ya.29Man pu me tư̆ng juôi năn pơp pu me sông sa jêh iên năn pơp ñêt, ăt ei ru rŭng răng ya.30Bơ yơng grăp găp pôl nêh tŏng dôn teh khăng tư̆ng juôi lĕ mơt pơp ho, ƀê̆ dăh Bap pu me di gư̆t luôr ru lĕ mơt pơp pu me khơñ hư̆n.31Ƀê̆ dăh, ăn juôi uôn Yang Trôk di, jêh iên grăp pơp hư̆n jrăng dơi mbăč un ta pu me.32Wơ pôl ƀê̆, man bhŭng, bơ yơng Bap pu me brơn nuih ăn čar ta pu me.33Ăn blŏ ngăn drăp pu me jêh iên phă gai ta băl ƀun ƀin. Ăn prăp prê ta pu me tơm ƀap so dơi sat — hư̆n jêng ngăn drăp so dơi rai lêk gŭk tŏng trôk, jêng tŭk băl blăč so dơi trôh mơñ, te rĕh ăt so dơi lăm rai.34Bơ yơng u ta tŭk ngăn drăp pu me gŭk hư̆n nuih nhăm pu me ăt jrăng gŭk ta iên.35Nuôi pu me di ăn wêh đuôt hư̆t, wăt ta iñ kđen ăn ĕh ang răn ƀăn,36jêh iên pu me ndrơm klăh di băl kăp găn khua hên di mông kăn du băh tŭk tăm sai, no di jai jêh trôh jêh iên pơng ƀăng, hên răn pŏk rŏk ta kăn.37Găl jôn ta băl dư̆k hư̆n jêng băl jai jêh trôh hih, khua jrăng so dư̆k hôm kăh măng. Ngĭn ngăn, Ăñ ngơi ta pu me gư̆t khua jrăng đuôt sei yăn nuôi kăn, jêh iên ndơm hên gŭk tŏng jhưng sông sa, jêh iên khua sak ndơp pơp sông sa ta grăp nau hên.38Ndă di khua trôh mŏng mông tal bar, mdăh tăl trôh mông tal pei, jêh iên khua ăt so klăh iên ya, hư̆n kăh pơp găl jôn trôh ta băl dư̆k hư̆n.39Ƀê̆ dăh ăn wơng klăh iêu, hư̆n jêng ndă di khua hih gư̆t luôr năn mông băl blăč trôh, hư̆n năng ai kăn so lơi hih kăn dơi băl blăč mư̆t.40Pu me ăt ñjrăng ya, bơ yơng hư̆n jêng mông pu me so mĭn trôh, hư̆n Kuôn Nêh jrăng trôh.”41Jêh hư̆n Pê-trôih ngơi: “Wơ Khua Yang, Khua Yang tơ têh pơp hơ hôr ho ta hi, mdăh ăt ăn ta lĕ mơt grăp nau nêh?”42Jêh iên Khua Yang ngơi: “Kơt iên, nêh tơm jêng nêh năk hih sĭt suôr, gư̆t mĭn, jêng nêh khua jrăng ăn năk iêl băl dư̆k kăn di, no di phă pơp sông sa ta pŏng hên trip mông?43Găl jôn ta kăn dư̆k hư̆n, hư̆n jêng nêh khua kăn, jai sak dlăng, jrăng so kăn mhŏ trip klăh iên.44Ngĭn ngăn, ăñ ngơi ta pu me klăh iêu khua jrăng ăn kăn dư̆k hư̆n năk iêl lĕ mơt ngăn drăp kăn di.45Ƀê̆ dăh ndă di dư̆k hư̆n mĭn mŏng nuih nhăm kăn, klăh iêu: ‘Khua ăñ yau ma du,’ hư̆n yơh dư̆ng pŭ bang băl dư̆k tlơ tlau jêh iên dư̆k u ur, jai sa jai ñêt, jêh hư̆n ñư̆l pliă plia,46khua kăn dư̆k hư̆n jrăng trôh mŏng nar jêng nar so kăn gư̆t, geh ru, trip mông jêng mông so kăn gư̆t, jêh iên khua jrăng čriêk tau săk kăn, jêh hư̆n kčăh tŭk ta kăn ju băk ta băl so sĭt suôr.47Kăn dư̆k hư̆n, jêng nêh gư̆t pơp mĭn khua kăn ƀê̆ dăh kăn so prăp prê mdăh mhŏ hui si pơp mĭn khua, nai jrăng pŭ bang ŏk hĭn.48Bơ dư̆k so gư̆t jêh iên mhŏ bruă năng nai kmhal nai jrăng pŭ nghơč ƀê̆. Ƀê̆ dăh, nêh tơm, jêng nêh jêh nai ăn ŏk, ăt ŏk pơp nai jrăng wêh tro băh nêh hư̆n, jêh iên ta nêh tơm jêh nai jao ŏk, lĕ mơt pơp nai jrăng lŏ wêh tro băh nêh hư̆n ŏk hĭn ya.49Ăñ jêh trôh no di čĕ iñ mŏng teh, jêh iên năn pơp ăñ khơñ ndă di ĕh jêh sa ru.50Bê̆ dăh ăñ hôm wêh tŭ ƀơn pơp ƀap-tem, jêh iên ăñ ênguôt ŏk ngăn tăl trôh mông ĕh jêh lĕ mơt!51Pu me tôn lăh ăñ trôh ñôt pơp đăp nang ta dôn teh lăh? So mau ƀă, ăñ ngơi ta pu me, geh hĭn jêng pơp tăm jăh.52Bơ yơng dŏng băh nar o, jrăng mau prăm nau nêh mŏng ju hih tŏng jăh pôl — pei tăm dăng ta bar, jêh iên bar tăm dăng ta pei.53Hên jrăng tăm jăh, bap tăm dăng ta kuôn tlau jêh iên kuôn tlau tăm dăng ta bap, mei tăm dăng ta kuôn u ur jêh iên kuôn u ur tăm dăng ta mei, mei sai tăm dăng ta mŏ măn de tơm jêh iên mŏ măn tăm dăng ta mei sai.”54Jêh iên Khua Yang ăt ngơi ta băl uôn lan: “Jăng jai pu me so ñuôi tŭk ĕh trôh băh nar ñăp, mhăč rŏk pu me ngơi klăh iêu: ‘Mih mơñ trôh,’ jêh iên bruă geh trip klăh iên ya.55Jêh iên jai so čal băh nơ năm pôh, pu me ngơi klăh iêu: ‘Jrăng mau dôh ôl,’ hư̆n bruă trip klăh iên.56Wơ băl pra mhŏ găl! Pu me gư̆t lơ lang grăp bruă ĕh mau mŏng trôk jêh iên teh dih, ƀê̆ dăh pơp mhŏ pu me so dơi wơng no di lơ lang ta nuk nar o?57Pơp mhŏ pu me tăl so čŏng ksiêm mĭn dêh năn pơp jêng geh?58Bơ yơng mŏng mông pu me jai sak ju băk ta nêh kčŭt pu me trôh ta hih khua uôn, ăn gir lĕ ai ktang no di tŏng ñjăl bruă ta nêh hư̆n ta truông sak, no di tlĕh nai đŏh pu me trôh ta hih phat dôih, jêh iên khua phat dôih jao pu me ta khua mnă, jêh iên khua mnă ñư̆p ngguôn pu me mŏng war.59Ăñ ngơi ta pu me, ngĭn ngăn pu me jrăng so dơi du băh war tăl trôh mông pu me čiu lĕ prăk nuôn tôč dư̆t.”
FAR EAST BROADCASTING COMPANY