John3
1Ƀê̆ dăh, mau ju nau nêh ting ju pôl Pha-ri-si, jêng nêh kĕ kriê uôn lan Yo Thaĭ, năn kăn jêng Ni-kô-đem.2Kăn ho sak tŏng tuôm Yang Yê-su mông tluông măng, jêh iên ngơi ta Khua Yang: “Wơ Khua tơ ti, hi gư̆t klă Khua tơ ti jêng Khua tơ ti ram trôh băh Yang Trôk, bơ yơng so mau ju nau nêh dơi mhŏ lĕ pơp myang ho, hư̆n jêng lĕ mơt pơp Khua tơ ti jêh mhŏ, ndă Yang Trôk so gŭk băk nêh hư̆n.”3Yang Yê-su boh dơk jêh iên ngơi ta kăn: “Ngĭn ngăn, ngĭn ngăn ăñ ngơi ta me, ndă nêh tơm so wêh lai săk, nêh hư̆n so dơi so čar Yang Trôk di ƀă.”4Ni-kô-đem ngơi ta Khua Yang: “Đô̆ nă mhŏ ju nau nêh, jêh trôh u rañ săk, dơi wêh lai săk? Dơi ya nêh hư̆n lŏ wêh mư̆t mŏng ndư̆l mei kăn tal bar jêh hư̆n wêh lai săk lăh?”5Yang Yê-su ngơi: “Ngĭn ngăn, ngĭn ngăn, ăñ ngơi ta me, ndă nêh tơm so dơi lai săk mơn băh dak jêh iên Yang Ngăt Găl, nêh hư̆n so dơi mư̆t mŏng čar Yang Trôk di ƀă.6Năn pơp dơi lai săk yơng băh lŏng săk jêng lŏng săk, jêh iên năn pơp dơi lai săk yơng băh Yang Ngăt Găl jêng ngăt myang.7Ei ru dlăng ndrơh năn pơp jêh ăñ ngơi ta me: ‘Pơp yuôm bhăn ta me jêng dơi wêh lai săk.’8Čal khôm u tŭk ĕh khơñ, jêh iên me dơi tŏng pơp nggôr ĕh, ƀê̆ dăh me so dơi gư̆t čal u băh tŭk trôh mdăh u iêu tŭk ĕh sak. Ăt kơt iên ya ta lĕ mơt nêh dơi lai săk yơng băh Yang Ngăt Găl.”9Ni-kô-đem boh pơp ngơi jêh iên lup Khua Yang: “Đô̆ nă bruă hư̆n dơi ñjêng klăh iên?”10Yang Yê-su wêh boh dơk jêh iên ngơi ta kăn: “Me jêng khua tơ ti ram uôn lan I-sra-el di ƀê̆ dăh so me wơng pơp hư̆n ya lăh?11Ngĭn ngăn, ngĭn ngăn, ăñ ngơi ta me klăh iêu hi ngơi yơng ta năn pơp jêh hi gư̆t, jêh iên hi têh sơm yơng ta năn pơp jêh hi so, ƀê̆ dăh pu me so sŏk dơn pơp têh sơm hi di.12Ndă jêh ăñ ngơi ta pu me yơng ta lĕ mơt bruă mŏng teh ƀê̆ dăh pu me so tip, hư̆n đô̆ nă pu me jrăng tip ndă ăñ ngơi ta pu me yơng ta lĕ mơt bruă tŏng trôk?13Ñăm mau nêh čơng tŏng trôk čuôm gu Mtao jêh jư̆r băh trôk — hư̆n jêng Kuôn Nêh.14Mô-ih jêh yông bêh mŏng tač ndrăñ đô̆ nă, hư̆n Kuôn Nêh jrăng tŭ pơp nai yông klăh iên ya,15no di grăp nau nêh đăo ta Khua Yang dơi mau pơp brêh hui hai.16Bơ yơng Yang Trôk khăp khơñ ir ta dôn teh tăl Khua Yang ăn Kuôn Ƀơn Yang di, no di grăp nau nêh đăo ta Kuôn hư̆n so dơi rai lêk, ƀê̆ dăh dơi mau pơp brêh hui hai.17Bơ yơng Yang Trôk so yua Kuôn trôh mŏng dôn teh no di phat dôih dôn teh, ƀê̆ dăh no di tŏng tlĕh dôn teh mŏng Kuôn hư̆n.18Nêh tơm đăo ta Kuôn hư̆n so hôm nai phat dôih, ƀê̆ dăh nêh tơm so đăo jêng jêh nai phat dôih ru, bơ yơng so khơñ đăo ta năn Kuôn Ƀơn Yang Trôk di.19Gao băh iên, ho jêng pơp kčăh, hư̆n jêng: Pơp ang jêh trôh mŏng dôn teh, ƀê̆ dăh nai khăp ta pơp ngo ŏk hĭn ta pơp ang bơ yơng djăp bruă hên mhŏ jêng djŏh ƀai.20Bơ yơng grăp nêh mhŏ ƀai jrăng hao nuih ta pơp ang, jêh iên so khơñ sak ta pơp ang, no di grăp bruă hên mhŏ so ĕh ƀlang ta ling.21Ƀê̆ dăh, nêh mhŏ pơp geh tŏng hư̆n khơñ sak ta pơp ang, no di grăp bruă hên di dơi lăm ƀlang klă bruă hư̆n dơi mhŏ mŏng Yang Trôk.”22Ta kơi lĕ mơt bruă hư̆n, Yang Yê-su wăt băl ƀing kna Yang di sak mư̆t mŏng wăl Yu-đê. Khua Yang gŭk mŏng tŭk hư̆n băk hên jêh iên mhŏ ƀap-tem.23Bê̆ dăh, Yô-han ăt jai mhŏ ƀap-tem ta At-nôn mơñ Sa-lim ya, bơ yơng tŭk hư̆n mau ŏk dak, băl uôn lan tŏng ndơm jêh iên tŭ ƀap-tem —24bơ yơng Yô-han ñăm nai ñư̆p nggruôn mŏng mnă.25Kơt iên, mau pơp tŏng nhan ram ĕh lôh băh băl ƀing kna kăn Yô-han ta ju nau nêh Yo Thaĭ yơng ta pơp lăm ƀrăh.26Jêh hư̆n hên sak ta Yô-han jêh iên sơm ta kăn: “Ra-ƀi, nêh tuôm gŭk băk khua tơ ti đăh tŏ dak kruông Yô-đan, khua tơ ti jêh tuôm lăm nư̆k ru ta nêh hư̆n, dlăng tŏ hư̆n, kăn jai mhŏ ƀap-tem, jêh iên lĕ mơt băl uôn lan jai sak trôh ta kăn.”27Yô-han wêh boh jêh iên ngơi: “Nai so dơi dơn ju mta pơp ôh, ƀơn pơp ei ya dơi, ndă so geh hư̆n jêng pơp jêh nai ăn ta nêh hư̆n băh trôk.28Pu me tơm jêng nêh lăm nư̆k ta ăñ klă ăñ jêh tuôm ngơi: ‘Ăñ so geh jêng Yang Tŏng Tlĕh,’ ƀê̆ dăh hư̆n jêng ‘ăñ jêng nêh nai yua sak luôr ta Mtao hư̆n.’29Nêh tơm sai de mŏ hư̆n jêng kăn tle. Bơ găp kăn tle di, jêng nêh dŏk jêh iên iêt pơp kăn ngơi, mông hư̆n mau pơp čhô̆ brơn bơ yơng tŏng dơk kăn tle. Kơt iên, pơp čhô̆ brơn hư̆n ăñ ji jêh dơi nư̆m nơn.30Pơp jrăng mhŏ ta Mtao hư̆n jêng yăr jua tŏng tê̆, bơ ăñ ho ăn lăm rôč mŏng sô̆.31Mtao trôh băh trôk tê̆ jrăng gŭk tŏng tê̆ lĕ mơt. Nêh ĕh lôh băh teh jrăng du mŏng teh jêh iên ngơi grăp bruă mŏng teh dih. Mtao trôh băh trôk jrăng gŭk tŏng tê̆ lĕ mơt.32Khua Yang têh sơm yơng ta pơp jêh Khua Yang so jêh iên tŏng, ƀê̆ dăh so mau nêh tip pơp têh sơm Khua Yang di.33Nêh tơm jêh tip pơp Khua Yang têh sơm nêh hư̆n gư̆t nư̆k Yang Trôk jêng ngĭn ngăn.34Bơ yơng Mtao jêh Yang Trôk yua trôh jrăng ngơi pơp Yang Trôk di. Bơ yơng Khua Yang ăn Yang Ngăt Găl hui si pơp so nă dư̆t bôl.35Bap khăp khơñ Kuôn jêh iên jao ru djăp pơp mŏng ti Kuôn.36Nêh tơm đăo ta Kuôn jrăng mau pơp brêh hui hai, ƀê̆ dăh nêh tơm so bhŭng mpŭ ta Kuôn jrăng so dơi so pơp brêh, ƀê̆ dăh pơp hao nuih Yang Trôk di ăt hôm gŭk răn ƀăn tŏng nêh hư̆n.”
FAR EAST BROADCASTING COMPANY