John1
1Luôr bôk mau Pơp Ngơi, Pơp Ngơi gŭk băk Yang Trôk, jêh iên Pơp Ngơi jêng Yang Trôk.2Khua Yang bhiên mau băh luôr bôk băk Yang Trôk.3Grăp pơp mơn băh Khua Yang dơi rih ñjêng, jêh iên ndă so rih ñjêng mŏng Khua Yang, ăt so mau ju mta pơp dơi ĕh ñjêng.4Mŏng Khua Yang jêng pơp brêh, jêh iên pơp brêh jêng pơp ang kuôn nêh di.5Pơp ang đang mŏng tŭk ngo, jêh iên pơp ngo so mau dơi pơp dơi ta pơp ang.6Mau ju nau nêh nai yua băh Yang Trôk, năn kăn jêng Yô-han.7Kăn trôh mŏng bruă jêng nêh nư̆k no di kăn dơi lăm nư̆k ta pơp ang, mơn băh kăn yơh, ŏk nêh jrăng đăo.8Kăn tơm so geh jêng pơp ang, ƀê̆ dăh kăn trôh no di lăm nư̆k ta pơp ang.9Pơp ang ngơ ngăn, jêng pơp ang đang ang ta grăp nau nêh, jêh trôh mŏng dôn teh.10Khua Yang jêh gŭk mŏng dôn teh, jêh iên dôn teh dơi rih ñjêng mŏng Khua Yang, ƀê̆ dăh dôn teh so gư̆t năl Khua Yang.11Khua Yang jêh trôh ta tŭk jêh kčăh ta Khua Yang, ƀê̆ dăh uôn lan Yang di so hên ruôm khua Yang.12Ƀê̆ dăh lĕ mơt nêh tơm ruôm Khua Yang, Khua Yang ăn ta hên pơp myang dơi ñjêng kuôn Yang Trôk di, hư̆n jêng ăn ta nêh tơm đăo ta năn Khua Yang.13Đơ băl hư̆n so geh nai lai săk yơng băh mham, ăt so geh yơng băh pơp khơñ lŏng săk, mdăh yơng băh pơp khơñ kuôn nêh, ƀê̆ dăh yơng băh Yang Trôk.14Pơp Ngơi jêh ñjêng lŏng săk jêh iên gŭk brêh mŏng mbar băn, jêh iên jêh băn so ru pơp guh ang Khua Yang, trip klăh di pơp guh ang Kuôn Ƀơn trôh băh Bap, bêng pơp đač wăt pơp ngĭn ngăn.15Yô-han têh sơm yơng ta Khua Yang jêh iên ngơi tĕh klăh iêu: “Ho jêng Mtao ăñ ngơi lak: ‘Mtao trôh ta kơi ăñ ĕh ñjêng ram hĭn ta ăñ, bơ yơng Khua Yang bhiên mau luôr ta ăñ.’”16Bơ yơng ĕh lôh băh pơp nư̆m nơn Yang di, grăp nau băn dơi dơn lĕ mơt pơp đač ho trôh pơp đač dêh.17Bơ yơng pơp bhiên nai ăn mŏng kăn Mô-ih. Pơp đač jêh iên pơp ngĭn ngăn nai ăn mŏng Yang Tŏng Tlĕh Yê-su.18Ñăm mau nêh tuôm so Yang Trôk. Čuôm gu Kuôn Ƀơn Yang Trôk, Mtao gŭk mŏng nuih nhăm Bap, Mtao hư̆n yơh lơ lang yơng ta Bap.19Ho jêng pơp têh sơm băh kăn Yô-han jai băl Yo Thaĭ yua băl khua mhŏ yang ta băl Lê-wi băh Yê-ru-sa-lem sak no di lup kăn: “Nêh tơm me jêng?”20Kăn têh sơm klă so kăn mơ mo ƀê̆ dăh kăn dơn — klăh iêu: “Ăñ so geh jêng Yang Tŏng Tlĕh.”21Hên lup kăn: “Ndă iên đa lăh ĕh hư̆n? Me jêng kăn Ê-li lăh?” Kăn wêh ngơi: “Ăñ so geh.” “Me jêng nêh têh luôr lăh?” Kăn ngơi “So geh.”22Jêh hư̆n, hên ngơi ta kăn: “Nêh tơm me jêng, no di hi gư̆t têh ta nêh jêh yua hi sak? Đô̆ nă me ngơp ta me tơm?”23Kăn ngơi:“Ăñ jêng dơk ôr mŏng tač ndrăñ:‘Ăn lăm tŏng truông Yang di,’klăh di nêh têh luôr Ê-sai jêh ngơi.”24Đơ nêh nai yua sak ting ju pôl băl Pha-ri-si gơ gu,25hên lup čêk kăn, jêh iên ngơi ta kăn: “Ndă me so geh jêng Yang Tŏng Tlĕh, ăt so geh jêng kăn Ê-li, mdăh nêh têh luôr, ndă iên pơp mhŏ me mhŏ ƀap-tem?”26Yô-han ngơi ta hên klăh iêu: “Ăñ mhŏ ƀap-tem ta dak. Ƀê̆ dăh Mtao jêh gŭk mŏng mbar pu me ƀê̆ dăh so pu me gư̆t,27jêng Mtao trôh băh kơi ăñ, Mtao hư̆n ăñ so dơi năng no di lĕh sei jep Khua Yang di.”28Lĕ mơt bruă hư̆n trôh ta Ƀê-tha-ni đăh tŏ dak kruông Yô-đan, hư̆n jêng tŭk Yô-han jai mhŏ ƀap-tem.29Nar ta kơi, Yô-han so Yang Yê-su sak trôh ta kăn, hư̆n kăn ngơi: “Tŏ hư̆n, Biêp Kuôn Yang Trôk di, Mtao sŏk lĕ pơp tih dôn teh!30Hư̆n jêng yơng ta Mtao jêh ăñ tuôm ngơi: ‘Nêh trôh ta kơi ăñ jêng Mtao bhiên ram hĭn ta ăñ, bơ yơng Khua Yang mau luôr ta ăñ.’31Ăñ so gư̆t Khua Yang, ƀê̆ dăh no di dơi lăm ƀlang Khua Yang ta băl uôn lan I-sra-el, ăñ sak mhŏ ƀap-tem ta dak yơng băh bruă hư̆n.”32Yô-han jêh lăm nư̆k ru, jai kăn ngơi klăh iêu: “Ăñ so ru Yang Ngăt Găl jư̆r băh trôk klăh di sư̆m tơp, jêh iên jrăm tŏng Khua Yang.33Ăñ ăt so gư̆t năl Khua Yang ya, ƀê̆ dăh Mtao yua ăñ mhŏ ƀap-tem ta dak, Mtao hư̆n ngơi ta ăñ: ‘Tŏng nêh tơm me so Yang Ngăt Găl jrăm jêh iên gŭk tŏng săk, nêh hư̆n yơh jêng Mtao mhŏ ƀap-tem ta Yang Ngăt Găl.’34Jêh hư̆n ăñ tuôm so jêh iên lăm nư̆k klă ho jêng Kuôn Yang Trôk.”35Wêh ju dŏ hư̆t, mŏng nar ta kơi, jăng jai Yô-han gŭk băk bar nau mŏng băl ƀing kna kăn di,36jêh hư̆n jai so Yang Yê-su sak găn gao, kăn ngơi: “Dlăng tŏ, Biêp Kuôn Yang Trôk di!”37Bar nau ƀing kna hư̆n tŏng Yô-han ngơi klăh iên hư̆n hên gre Yang Yê-su.38Jai Yang Yê-su wiêng iêu kơi jêh iên so hên gre, Khua Yang lup hên: “Nêh tơm pu me juôi?” Hên sơm ta Khua Yang: “Ra-ƀi (pơp ngơi ho dơi lơ lang jêng ‘Khua tơ ti’), U tŭk khua tơ ti gŭk?”39Khua Yang ngơi ta hên: “Ăn sak jêh hư̆n pu me jrăng so.” Jêh hư̆n hên sak, so tŭk Khua Yang gŭk, jêh iên hên gŭk băk Khua Yang mŏng nar hư̆n. Mông hư̆n năng ai mông tal măt.40Ju nau mŏng hên hư̆n tŏng băh kăn Yô-han jêh iên hui gre Yang Yê-su hư̆n jêng kăn An-drê, ŏh kăn Si-môn Pê-trôih.41Luôr hĭn, kăn sak tŏng tuôm mi kăn jêng Si-môn, jêh hư̆n kăn têh ta mi kăn, klăh iêu: “Hi jêh tŏng tuôm ru Mtao Nai Truôč Dak Ndriêng” (pơp ho dơi lơ lang jêng Yang Tŏng Tlĕh).42Kăn lăm mi kăn trôh ta Yang Yê-su. Jai jêh so kăn, Yang Yê-su ngơi: “Me jêng Si-môn, kuôn kăn Yô-han. Me jrăng mau năn jêng Sê-pha” (năn hư̆n dơi lơ lang băh năn “Pê-trôih”).43Nar ta kơi, Yang Yê-su khơñ du băh tŭk hư̆n sak ta Ga-li-lê, jêh iên Khua Yang tŏng tuôm kăn Phi-lip jêh hư̆n ngơi ta kăn: “Ăn gre ăñ.”44Kăn Phi-lip jêng nêh trôh băh Ƀêt-sai-đa, hư̆n jêng băh uôn kăn An-drê jêh iên Pê-trôih di ya.45Phi-lip sak tŏng tuôm kăn Na-tha-na-ên jêh iên ngơi ta kăn: “Jêh hi so ru Mtao kăn Mô-ih čih mŏng ră pơp bhiên jêh iên băl têh luôr ăt iên ya — hư̆n jêng Yê-su, kuôn Yô-sep di, băh Na-sa-ret.”46Ƀê̆ dăh Na-tha-na-ên ngơi ta kăn: “Mau ya pơp găl ĕh lôh băh Na-sa-ret lăh?” Phi-lip ngơi ta kăn: “Ăn sak jêh iên dlăng yơh.”47Yang Yê-su so Na-tha-na-ên jai trôh ta Khua Yang, hư̆n Khua Yang ngơi ta kăn: “Dlăng ho, ju nau nêh I-sra-el geh tŏng, so mau pơp huôk jăr mŏng nêh ho!”48Na-tha-na-ên lup Khua Yang: “U băh Khua Yang dơi gư̆t ăñ?” Yang Yê-su sơm, Khua Yang ngơi ta kăn klăh iêu: “Luôr ta kăn Phi-lip kuôl me, jăng jai me gŭk mŏng tơm jhi a ra, mông hư̆n ăñ ru so me.”49Na-tha-na-ên ngơi ta Khua Yang: “Ra-ƀi, Khua jêng Kuôn Yang Trôk! Khua jêng Mtao I-sra-el!”50Yang Yê-su boh dơk jêh iên ngơi ta kăn: “Geh ya me đăo bơ yơng ăñ jêh ngơi ta me klăh iêu: ‘Ăñ jêh so me mŏng tơm jhi a ra’? Me jrăng so ŏk bruă myang ram hĭn klăh iêu ya.”51Jêh hư̆n Khua Yang ngơi ta kăn: “Ngĭn ngăn, ngĭn ngăn, ăñ ngơi ta pu me, pu me jrăng so trôk ĕh pơk, jêh iên băl myang Yang Trôk di čơng jư̆r tŏng Kuôn Nêh.”
FAR EAST BROADCASTING COMPANY