2 Corinthians3
1Hi lŏ dư̆ng čŏng nơ nei ta hi tơm mơh? Mdăh klăh di nêh ƀơ ƀă, hi ke mau ră ñuôr lăm ƀlang trôh ta ŏh mi mdăh băh ŏh mi?2Ŏh mi yơh jêng ră ñuôr ƀlang hi di, jêh čih mŏng nuih nhăm hi, grăp nau nêh dơi gư̆t jêh iên dơi dlăng,3bơ yơng jêh lăm ƀlang klă ru ŏh mi jêng ră ñuôr Yang Tŏng Tlĕh di, jêh jao ta hi, so mau čih ta dak jŭ ôh ƀê̆ dăh čih ta Yang Ngăt Găl Yang Trôk khăng brêh, so mau čih tŏng bôk mau, ƀê̆ dăh čih tŏng nuih nhăm kuôn nêh.4Jêh iên, mơn băh Yang Tŏng Tlĕh, hi mau pơp đăo kjăp klăh iên ta Yang Trôk.5So geh bơ yơng hi mau pơp ktang băh săk jăn no di mĭn ju mta bruă jêng pơp tŭ dơn băh hi tơm. Mlih mŏng iên, pơp dơi hi trôh băh Yang Trôk,6jêng Mtao ăt jêh ăn hi mau pơp dơi jêng nêh đru bruă pơp tăm guôp mhei, so geh ta pơp čih, ƀê̆ dăh ta Yang Ngăt Găl; bơ yơng pơp čih lăm khư̆t kuôn nêh, bơ Yang Ngăt Găl ăn brêh.7Kơt iên, ndă bruă mhŏ lăm ndơp ta pơp khư̆t — dơi tuôr trĕh ta ple ră tŏng bôk mau — dơi lăm ƀlang mŏng pơp guh ang, tăl ŏh kuôn băl I-sra-el so năñ dlăng măt dră măt ta kăn Mô-ih yơng băh pơp guh ang čuôm gu bhiêu ta măt kăn,8so lăh geh bruă mhŏ Yang Ngăt Găl di jrăng mau mŏng pơp guh ang ŏk hĭn ya lăh?9Bơ yơng ndă pơp guh ang hôm thêm ta bruă phat dôih, hư̆n bruă mhŏ pơp kpă bêng dlai pơp guh ang ŏk hĭn ta iên!10Ngăn ya, bơ yơng pơp jêh tuôm mau pơp guh ang hư̆n so hôm wêh mau guh ang mŏng bruă ho, yơng băh pơp guh ang gao hĭn ta iên.11Ndă di pơp gơñ rai lêk jêh trôh ta pơp guh ang, hư̆n pơp hôm hui hai jrăng trôh mŏng pơp guh ang ŏk hĭn ta iên ya!12Bơ yơng, jai mau pơp čang mơn blăh iên, hư̆n yơh hi mau nuih nhăm năñ ngăn,13jêh iên so ndrơm klăh di kăn Mô-ih, kăn lư̆m ju pŏk dhiêm tŏng môh măt kăn trôh ta bruă so ăn kuôn so I-sra-el dlăng dră măt mŏng lĕ pơp guh ang gơñ rai tôč.14Ƀê̆ dăh, pơp mĭn hên jêh ñjêng krăk dăng, tăl trôh nar o, ƀơn dhiêm lư̆m hư̆n ăt hôm mŏng bruă dlăng pơp tăm guôp yau, bơ yơng so dơi pơk, hư̆n jêng mŏng Yang Tŏng Tlĕh, ĕh rai tôč.15Ƀê̆ dăh, tăl trôh nar o, grăp dŏ dlăng pơp bhiêm Mô-ih, hư̆n ju pŏk dhiêm lư̆m tŏng nuih nhăm hên,16ndă di trôh mông nai du plŏ ta Yang Trôk, kơt iên dhiêm lư̆m hư̆n dơi sŏk lat.17Kơt iên, Yang Trôh jêng Yang Ngăt Găl, jêh iên u tŭk mau Yang Ngăt Găl Yang Trôk, ta iên mau pơp êngiê.18Jêh iên lĕ mơt băl băn, ta môh măt so lư̆m, čral pơp guh ang Yang Trôk di, jăng jai mlih ĕh ñjêng ƀơn rup dŏng băh pơp guh ang trôh pơp guh ang, ndrơm klăh di băh Yang Trôk, jêng Yang Ngăt Găl.
FAR EAST BROADCASTING COMPANY