2 Corinthians1
1Ăñ jêng kăn Pôl, ƀing kna Yang Tŏng Tlĕh Yê-su yơng băh pơp Yang trôk khơñ, jêh iên nêh ŏh mi Ti-mô-thê, čih ñuôr ta pôl ƀrăh Yang Trôk gŭk ta uôn Kô-rin-tô, wăt ta lĕ mơt băl đăo hôm gŭk mŏng grăp wăl A-čai.2Dăn pơp đač jêh iên pơp đăp nang băh Yang Trôk, Bap băl băn, jêh iên Khua Yang, jêng Yang Tŏng Tlĕh Yê-su, trôh ta ŏh mi!3Nơ nei Yang Trôk jêh iên Bap Khua Yang băl băn — Yang Tŏng Tlĕh Yê-su — jêng Bap ta pơp tlŏng đač, wăt ta grăp pơp jôh lih Yang Trôk di,4jêng Mtao jôh lih hi mŏng grăp pơp knap mñai hi, lăm ndơp hi trôh ta bruă dơi jôh lih đơ nêh gŭk mŏng pơp knap mñai ta pơp jôh lih hư̆n jêng pơp jôh lih hi dơi dơn yơng băh yang Trôk.5Bơ yơng đô̆ nă pơp knap mñai Yang Tŏng Tlĕh ƀư̆t bêng tŏng hi, hư̆n pơp jôh lih hi dơi mau mơn băh Yang Tŏng Tlĕh ăt bêng blăh iên ya.6Ƀê̆ dăh ndă di hi tŭ pơp knap mñai, hư̆n jêng pơp jôh lih jêh iên pơp tŏng tlĕh ŏh mi di; ndă hi dơi mau pơp jôh lih, hư̆n jêng pơp jôh lih ŏh mi di, jêng pơp mưng mŏng bruă gĭr wăt ta pơp knap mñai ƀê̆ dăh nư̆k hi ăt tuôm gĭr.7Jêh iên pơp čang mơn băl hi yơng ta ŏh mi jêng ngĭn ngăn, đô̆ nă dơi gư̆t klă ŏh mi jêng nêh dơn ju băk mŏng pơp knap mñai, hư̆n ăt dơn ju băk mŏng pơp jôh lih blăh iên ya.8Wơ ŏh mi, bơ yơng hi so khơñ ŏh mi so gư̆t ta pơp knap mñai jêh trôh ta hi mŏng čar A-si, kơt iên hi mau pơp jŏk gao hĭn ta pơp hi dơi añ, tăl ta hi ăt so hôm mau pơp čang mơn dơi brêh ôh.9Ngăn ya, nư̆k hi jêh dơn pơp phat dôih khư̆t mŏng nuông hi, no di hi so knang ta hi tơm, ƀê̆ dăh mŏng Yang Trôk, Mtao ăn băl khư̆t wêh dŏk brêh,10Mtao jêh lăm tlĕh hi băh pơp khư̆t ram tŏ, hư̆n Khua Yang jrăng wêh lăm tlĕh hi — jêng gŭk mŏng Khua Yang, hi mau pơp čang mơn klăh iêu Khua Yang ăt jrăng lăm tlĕh hi ya,11jăng jai ŏh mi ăt đru mŏng pơp kuôl dăn yơng băh hi — no di trôh băh ŏk nêh, pơp găl trôh ta hi, Yang Trôk sŏk dơn pơp lăh găl bơ yơng ŏk nêh yơng băh hi.12Bơ yơng pơp čhô̆ brơn hi jêng blăh iêu: pơp lăm nư̆k băh nuih nhăm hi, jêh hi gŭk brêh mŏng mbar teh dih mŏng pơp ƀrăh ngôr jêh iên pơp ngĭn ngăn Yang Trôk di, so geh yơng băh pơp gư̆t mĭn hui si lŏng săk, ƀê̆ dăh yơng băh pơp đač Yang Trôk di, jêh iên luôr hĭn jêng ta ŏh mi.13Bơ yơng hi so čih ta ŏh mi pơp dơ dêh ôh, čuôm gu pơp jêh ŏh mi dlăng jêh iên dơi wơng, ƀê̆ dăh ăñ čang mơn klăh iêu ŏh mi jrăng gư̆t wơng lĕ mơt —14ndrơm klăh di ŏh mi jêh gư̆t wơng hi mŏng ju khăn ya — no di hi jêng pơp čhô̆ brơn ta ŏh mi, hư̆n ŏh mi ăt klăh iên ya ta hi, mŏng nar Khua Yang băn, jêng Yang Yê-su.15Jêh iên ta pơp đăo hư̆n ya, luôr lak ăñ khơñ sak ta ŏh mi, no di ŏh mi dơi mau pơp găl dŏ bar,16jêh hư̆n băh ŏh mi no di ăñ sak trôh ta Ma-sê-đuan, jêh iên băh Ma-sê-đuan wêh sak ta ŏh mi, jêh hư̆n ŏh mi ndơp ăñ sak trong trôh ta Yu-đê.17Kơt iên, jai ăñ mĭn bruă ho, hư̆n so mau ăñ mhŏ mŏng pơp so mau ju ni ai ôh? Mdăh ăñ kčăh pơp ăñ mĭn hui si đăh lŏng săk, no di mŏng ăñ jêng “Geh, geh” wăt “So, so” lăh?18Ƀê̆ dăh Yang Trôk jêng sĭt suôr, hư̆n yơh pơp hi ngơi ta ŏh mi jêng so geh mông “Mau” mông “So” ôh.19Bơ yơng Kuôn Yang Trôk, jêng Yang Tŏng Tlĕh Yê-su, Mtao yơng băh hi jêh tơ ti lăh mŏng mbar ŏh mi — jêng yơng băh ăñ jêh iên Sil-wăñ ju băk Ti-mô-thê — so geh jêng mông “Geh” mông “So”, ôh jêh iên mŏng Khua Yang răn ƀăn jêng “Geh”.20Bơ yơng ŏk mŏk pơp ƀuôn Yang Trôk di jêng “Mau” mŏng Khua Yang gơ gu. Hư̆n yơh, hi ăt mơn Khua Yang, ngơi “A-men” mơn băh băl băn myơr ta Yang Trôk yơng pơp guh ang Khua Yang.21Gao băh iên, Yang Trôk jêng Mtao lăm kjăp hi ta ŏh mi mŏng Yang Tŏng Tlĕh jêh iên jêh truôč dak ndriêng ta hi,22ăt jêng Mtao jêh kđăm têl tŏng hi jêh iên ăn pơp lăm năl băh Yang Ngăt Găl mư̆t mŏng nuih nhăm hi.23Bơ ăñ kuôl dăn Yang Trôk lăm klă ta ngăt nhuôl ăñ klăh iêu bơ yơng so năñ ndrŏh ta ŏh mi, ăñ so hôm sak trôh ta uôn Kô-rin-tô ôh.24So geh yơng băh hi mau pơp dơi ta pơp đăo ŏh mi, ƀê̆ dăh yơng băh hi jêng jôk kuăng mhŏ bruă ju băk bơ yơng pơp čhô̆ brơn ŏh mi di, yơng băh ŏh mi jêh gŭk kjăp mŏng pơp đăo ru.
FAR EAST BROADCASTING COMPANY