1 Corinthians16
1Yơng ta bruă tŏng čung prăk ăn ta grăp Pôl Ƀrăh, klăh di ăñ jêh tơ tă ta grăp băl Pôl Ƀrăh wăl Ga-la-ti, ŏh mi ăt mhŏ klăh iên ya.2Grăp nar bôk si men, grăp nau nêh mŏng ŏh mi ăn ñăt mdê mdê, năn mông tŏng čung prăk ndă nêh hư̆n dơi mau prăk kao, no di mông ăñ trôh, so hôm wêh tŏng čung mông hư̆n ôh.3Ƀê̆ dăh, jai ăñ trôh, ndă đơ nêh ŏh mi ruăh, ăñ jrăng yua hên ñôt pơp ăn gai ŏh mi di ju băk ră ñuôr sak ta Yê-ru-sa-lem.4Ƀê̆ dăh ndă bruă hư̆n ăt jêng pơp năng ăn ăñ sak, hư̆n hên jrăng sak băk ăñ.5Ƀê̆ dăh ăñ jrăng sak băk ŏh mi jai jêh ăñ sak găn gao čar Ma-sê-đuan, bơ yơng ăñ jrăng găn gao čar Ma-sê-đuan.6Jêh hư̆n năng ai ăñ jrăng wêh gŭk hư̆t băk ŏh mi, mdăh tăl lĕ dơm ik, no di ŏh mi dơi ndơp ăñ sak ndă u ta tŭk ăñ khơñ sak.7Bơ yơng ăñ so khơñ tŏng tuôm ta ŏh mi mông ho jăng jai sak găn truông, yơng ăñ čang mơn jrăng gŭk băk ŏh mi ƀê̆ nar, ndă Khua Yang khơñ.8Ƀê̆ dăh ăñ jrăng gŭk ta uôn Ê-phê-sô tăl trôh ta Mar Pan-ti-kôt,9bơ yơng ƀơn ƀăng lơ jêh iên pơp găl jêh pŏk ta ăñ, ƀê̆ dăh ŏk pơp dơ dêh ghă ăñ.10Ƀê̆ dăh, ndă kăn Ti-mô-thê trôh, ăn ruôm kăn no di so kăn ngam gŭk băk pu me, bơ yơng kăn mhŏ bruă Yang Trôk, ndrơm ăñ ya.11Kơt iên, so mau ju nau nêh mưč kăn ôh. Ƀê̆ dăh ăn ndơp kăn sak truông ta pơp đăp nang, no di kăn dơi trôh ta ăñ, bơ yơng ăñ hôm kăp găn kăn ju băk ta ŏh mi dơ dêh.12Bơ ta kăn A-ƀô-lô, nêh ŏh mi băn, ăñ tlŏh nŏh trôt jhôl kăn no di kăn sak ta pu me ju băk ŏh mi dơ dêh, ƀê̆ dăh hư̆n so geh jêng pơp khơñ kăn ôh tăl ta kăn trôh mŏng mông ho. Ƀê̆ dăh kăn jrăng sak jăng jai mau mông găl.13Ăn gư̆t ñjrăng; ăn gŭk kjăp mŏng pơp đăo; ăn năñ klăh di ju nau tlơ tlau; ăn prăl ktang.14Ăn grăp bruă mhŏ ŏh mi di mhŏ mŏng pơp khăp khơñ.15Klăh iên, wơ ŏh mi, ăñ trôt ŏh mi (ŏh mi gư̆t hih nhăk kăn Sê-pha-na, nư̆k ngăn hên jêng ple bôk yăn ta A-čai, jêh iên hên čŏng săn săk đru bruă băl đăo),16no di pu me ăt gưt ta nêh blăh iên wăt lĕ mơt nêh jai mhŏ bruă jêh iên măh ăr.17Ăñ čhô̆ brơn ta bruă Sê-pha-na, Phôt-tu-na jêh iên A-čai-kơ, bơ yơng hên jêh mbăč năn pơp hôm bhơi băh ŏh mi;18bơ yơng hên jêh lăm mhei nuih nhăm ăñ wăt ŏh mi. Kơt iên, ăn sŏk ruôm đơ nêh blăh iên.19Grăp Pôl Ƀrăh čar A-si ñuôr pơp kôh čhưn trôh ta ŏh mi. A-ki-la jêh iên Ƀê-rit-sin, ju băk Pôl Ƀrăh tăm ƀư̆n ta hih hên, lĕ nuih nhăm ñuôr pơp kôh čhưn ta ŏh mi mŏng Yang Trôk.20Lĕ mơt ŏh mi ta o kôh čhưn ta ŏh mi. Ăn tŏng kôh čhưn ta pơp čư̆m ƀrăh.21Pơp kôh čhưn ho jêng nư̆k ti ăñ tơm čih — Pôl.22Ndă nêh tơm so gư̆t mpŭ Khua Yang, nêh hư̆n năng tŭ pơp tăm păh! Wơ Khua Yang hi, dăn Khua Yang trôh gơñ!23Dăn pơp đač Yang Yê-su gŭk băk ta ŏh mi.24Pơp khăp khơñ ăñ ji gŭk băk lĕ mơt ŏh mi mŏng Yang Tŏng Tlĕh Yê-su. A-men.
FAR EAST BROADCASTING COMPANY