1 Thessalonians3
1Bơ yơng kơt iên, ndă so hôm dơi kăp găn, hi mĭn găl hĭn lơi ju nau ăñ lŏ wêh gŭk hư̆t ta uôn A-then,2jêh iên hi yua kăn Ti-mô-thê, nêh ŏh mi hi di jêh iên dư̆k Yang Trôk đru bruă Pơp Găl Yang Tŏng Tlĕh di, no di lŏ lăm kjăp ŏh mi jêh iên jôh lih ŏh mi mŏng pơp đăo,3no di so mau ju nau nêh plơ̆ nuih yơng băh pơp knap mñai ho. Bơ yơng nư̆k ŏh mi gư̆t ru nai ăn băl băn tăm ndră ta bruă klăh iên.4Tăl ta mông hôm hi gŭk băk ŏh mi, hi jêh sơm luôr ta ŏh mi gư̆t băl băn jrăng tŭ pơp knap mñai, jêh iên bruă ĕh trôh klăh di ŏh mi jêh gư̆t.5Yơng băh bruă ho, so hôm dơi găn yau hĭn ôh, ăñ yua nêh sak no di gư̆t đô̆ nă pơp đăo ŏh mi, no di ơn băl djŏh yua truông ho truông tŏ mblơm ŏh mi jêh iên bruă ăr măh hi ĕh ñjêng li dăh dan.6Ƀê̆ dăh mŏng mông ho, kăn Ti-mô-thê, mhei kăn du băh tŭk ŏh mi trôh ta hi, kăn ndơp ta hi pơp čhô̆ brơn yơng ta pơp đăo jêh iên pơp khăp khơñ ŏh mi di, kăn lŏ wêh tơ têh ta hi gư̆t, răn ƀăn ŏh mi kăh wơi yơng ta bruă găl hi mhŏ ta kơi lak, ŏh mi mơn ngăn dơi tŏng tuôm ta hi ndrơm klăh di hi mơn ngăn dơi tŏng tuôm ta ŏh mi ya.7Bơ yơng kơt iên, wơ ŏh mi, hi tuôm jôh lih yơng băh ŏh mi jai tŏng tuôm ta grăp pơp đhir ngit wăt pơp knap mñai băl băn, bơ yơng pơp đăo ŏh mi di.8Dŏng băh nar o, ndă di ŏh mi gŭk kjăp mŏng Yang Trôk, hư̆n hi brêh.9Đô̆ nă dơi hi myơr pơp lăh găl Yang Trôk mơn băh lĕ mơt pơp čhô̆ brơn yơng ta ŏh mi yơng băh ŏh mi, hư̆n hi mau pơp čhô̆ brơn ta măt Yang Trôk hi,10măng nar hi gir kuôl dăn no di dơi tŏng tuôm ta ŏh mi jêh iên wêh mbăč năn pơp hôm bhơi mŏng pơp đăo ŏh mi?11Dăn Yang Trôk tơm, Bap băl băn, jêh iên Yang Yê-su, Khua Yang băl băn, lăm ndơp hi trôh ta ŏh mi.12Dăn Yang Trôk lăm ăn ŏh mi wêh mbăč hư̆t jêh iên khăñ khăh mŏng pơp khăp khơñ ndăng găp jêh iên ta grăp nau nêh, ăt ndrơm klăh di hi ta ŏh mi,13no di lŏ lăm kjăp nuih nhăm ŏh mi, so mau pơp năng ƀuăh mŏng pơp ƀrăh ngôr ta măt Yang Trôk, Bap băl băn, mŏng pơp lăm ƀlang Khua Yang băn di, jêng Yang Yê-su, wăt ta lĕ mơt băl đăo ƀrăh Yang di. A-men!
FAR EAST BROADCASTING COMPANY