1 Corinthians9
1Ăñ so dơi mau pơp êngiê lăh? Ăñ so geh jêng ju nau ƀing kna lăh? Ăñ ñăm tuôm so Yang Yê-su, Khua Yang băn lăh? Ŏh mi so geh jêng bruă ăñ mhŏ mŏng Khua Yang lăh?2Wăt di lăh ăñ so geh jêng ƀing kna ta nêh dơ dêh tŭ, ƀê̆ dăh ƀê̆ ngăn ăñ ăt jêng ƀing kna ta ŏh mi. Bơ yơng ŏh mi jêng pơp lăm nư̆k ta bruă ƀing kna ăñ ji mŏng Khua Yang.3Pơp ngơi mgang ăñ ji ta măt băl khăng lup ksiêm ăñ jêng klăh iêu:4Geh ya băl hi so mau pơp dơi sa jêh iên ñêt?5Geh ya băl hi so mau pơp dơi ndơm ju nau ur đăo Yang Trôk, ăt ndrơm klăh di băl ƀing kna ƀơ ƀă ju băk ŏh tlơ tlau Khua Yang jêh iên Sê-pha?6Mdăh čuôm gu ju nau Ƀa-na-ƀa ta ăñ so mau pơp dơi so mhŏ bruă?7Mau ya nêh sak ka han čŏng juôi dêh prăk ƀơk tơm? Mau ya nêh tăm mir ño ƀê̆ dăh so sa ple ĕh? Mdăh mau ya nêh năk ruông pơp no ƀê̆ dăh so ñêt dak tŏh ĕh?8So geh ăñ ngơi pơp ho hui si nai ngơi lăh, mdăh pơp bhiên ăt so ngơi pơp hư̆n?9Bơ yơng mau pơp čih mŏng pơp bhiên Mô-ih: “Man trư̆p bai ta mbung ndrôk jăng jai juôt ba.” Geh ya Yang Trôk mĭn gu ta ndrôk?10Mdăh Khua Yang ngơi nư̆m nơn bơ yơng pơp tŭ dơn ta băl băn? Ngăn ya, pơp ngơi jêh čih yơng pơp tŭ dơn ta băl băn, hư̆n jêng nêh kai lŏ ăn kai mŏng pơp čang mơn, jêh iên nêh juôt ba ăn juôt ta nuih nhăm čang mơn dơi phă ta băn ƀă.11Ndă di băl hi răh grăp pơp myang mŏng mbar ŏh mi, hư̆n au gao ir ya ndă hi jrăng sŏk dơn pơp no băh ŏh mi?12Ndă nêh dơ dêh mau pơp dơi hư̆n ta ŏh mi, geh ya hi mau ŏk hĭn ta iên lăh? Ƀê̆ dăh hi so mhŏ mnăč ta pơp dơi ho. Mlih ta iên, hi gir djăp pơp no di hi so mau pơp lăm gun Pơp Găl Yang Tŏng Tlĕh di.13Ŏh mi so gư̆t lăh nêh tơm mhŏ bruă mŏng hih ƀư̆n dơi sa năn pơp ting ju hih ƀư̆n, đơ nêh mhŏ bruă ta jhưng mhŏ yang hư̆n dơi mau ju khăn ta jhưng mhŏ yang, mdăh so?14Ăt kơt iên ya, Khua Yang jêh tơ ti ru đơ nêh têh sơm Pơp Găl jrăng brêh mơn băh Pơp Găl.15Ƀê̆ dăh ăñ ñăm tuôm yua ju mta pơp mŏng iên. Jêh iên, ăñ so čih pơp ho ăn pơp dơi hư̆n jêh yua ta ăñ tơm klăh iên, bơ ăñ, găl ƀê̆ ăñ khư̆t ta nai jrăng sŏk pơp nơ nei ăñ ji ñjêng dăh dan.16Bơ yơng ndă di ăñ têh sơm Pơp Găl, so mau ăn ta ăñ no di nơ nei, bơ yơng bruă jêh jao ta ăñ. Bơ yơng knap mñai ngăn ta ăñ ndă ăñ so têh sơm Pơp Găl!17Ndă ăñ mau nuih nhăm mhŏ bruă hư̆n, ăñ dơi mau pơp khôm. Ƀê̆ dăh ndă so mau nuih nhăm, hư̆n ăñ jêh nai jao bruă ta kĕ kriê ru.18Kơt iên, năn pơp nai khôm ta ăñ? Hư̆n jêng jai têh sơm Pơp Găl so mau păh mưn, đô̆ nă ăñ dơi lăm lar Pơp Găl so yua pơp dơi ăñ ji mŏng Pơp Găl.19Bơ yơng di lăh dơi êngiê băh grăp pơp, săk jăn ăñ jêh lăm ñjêng dư̆k ta grăp nau nêh, no di ăñ dơi lăm ndơp ŏk nêh hĭn.20Bơ ta băl Yo Thaĭ, ăñ ñjêng ndrơm klăh di nêh Yo Thaĭ, no di ăñ dơi lăm ndơp băl Yo Thaĭ. Bơ ta nêh tơm gŭk mŏng sô̆ pơp bhiên, ăñ ñjêng ndrơm klăh di nêh gŭk mŏng sô̆ pơp bhiên, khă săk jăn ăñ so gŭk mŏng sô̆ pơp bhiên, no di ăñ dơi lăm ndơp nêh gŭk mŏng sô̆ pơp bhiên.21Bơ ta nêh so mau pơp bhiên, ăñ ñjêng ndrơm klăh di nêh so mau pơp bhiên (wăt di lăh so mau pơp bhiên Yang Trôk, ƀê̆ dăh gŭk mŏng sô̆ pơp bhiên Yang Tŏng Tlĕh), no di ăñ dơi lăm ndơp đơ nêh so mau pơp bhiên.22Bơ ta nêh djhup dư̆r, ăñ ñjêng ndrơm klăh di djhup dư̆r, no di ăñ dơi lăm ndơp nêh djhup dư̆r. Ăñ khơñ ñjêng djăp mta pơp ta grăp nau nêh, no di ăñ dơi juôi grăp truông lăm tlĕh ƀơ ƀă nêh.23Ƀê̆ dăh, ăñ mhŏ grăp bruă bơ yơng băh Pơp Găl, no di ăñ dơi mau ju khăn mŏng iên.24Ŏh mi so gư̆t lăh lĕ mơt nêh dhul mŏng tŭk tăm lông nai dhul gơ gu, ƀê̆ dăh čuôm gu ju nau dơi sŏk pơp khôm lăh? Ăn dhul hui klăh iên no di ŏh mi dơi mau pơp khôm.25Ƀê̆ dăh, grăp nau nêh tăm lông mŏng grăp pơp tăm lông hên riêm gư̆t răng mŏng grăp bruă. Khă hên mhŏ kơt iên no di hên dơn đuôn mtao gơñ rai lêk, ƀê̆ dăh băl băn jêng đuôn mtao so dơi rai lêk.26Hư̆n yơh, ăñ dhul klăh iên, so geh ndrơm klăh di so mau tŭk kčăh; ăñ pŭ klăh iên, so geh ndrơm klăh di pŭ čal.27Ƀê̆ dăh, ăñ lăm knap săk jăn ăñ jêh iên lăm riêm ĕh ăn gưt, ơn ta pơp hư̆n, jai jêh tơ ti lăh ŏk nêh dơ dêh, nư̆k ăñ tơm nai jrăng ndrŏh lat.
FAR EAST BROADCASTING COMPANY