Mak16
1Nōqōn̄ M̄ōkheg mabah a Layavēg lemyēpyep, tō Mere Tamakdala, tiwag mi Mere a tita nonon Jemes, ba Salome, kēytēl mēwēl yatkel yētēnge qōnqōn so m̄ōk lataqn̄ēn Tigsas tō so nataqn̄ēn niwēwē lap.2Tō taval meyen nan hag en, Lasante a lemtap qōtō, kēytēl mavan me mahē a kēy mōm̄ōk tō Tigsas aē en, ba nalo qoyo halyak ēwē tō.3Kēytēl vanvan me metehal nen, kēytēl vēy hohole so “?Ihē temyin̄ qiyig dētēl so tatwul yak nevet den namte qayan̄?”4Kēytēl hohole qele gōh veg nevet nan nilwo meh. Ba kēytēl et hag qele kē, net mal tatwul yak nevet nan.5Kēytēl mahayveg hay leqyan̄ nen en, tō kēytēl et van qele kē nōlōmgep vitwag hagtō tekel qayan̄ a lemtō. Kē nehey namalmal hoyo, a naqagqag. Tō kēytēl mamamakē aē a nēkēkēn.6Tō net nan mavap van hiy kēytēl so, “Atmētēl tog mamakē. No nēglal so kēmtēl soksok Tigsas Tanasaret a kēy mowos tō kē lowolwol, ba kē mal hatig lokse. Kē tateh gōh. Atmētēl van me ba et, igōhkē mahē a kēy mōm̄ōk tō kē aē en.7Atmētēl van ēgē hiy ige tin̄qoy nonon tiwag mi Pita. Ba vasemlō van hiy kēy so kē nivanvan m̄ag Kalili. Tō kimi qoyo van ba et kē mahē anen, qele a kē mavap tō van hiy kimi am̄ag.”8Tō kēytēl kalō, tō valag veteg naqyan̄ nen, veg kēytēl memtēgteg ba mihiyey aē. Tō kēytēl et vasem hōn te hiy net vitwag en, veg kēytēl memtēgteg yeh.9Mahē Tigsas mēh lokse den namatmat Lasante a lemtap qōtō en, kē maklō kē am̄ag hiy Mere Tamakdala. Mere gōh a Tigsas mōvōylō tō nuvu het liviyō den kē en.10Mere met bah Tigsas en, tō kē nivan niet ige nonon Tigsas ēgēn, ba kēy nahag lolwon wa ten̄ geh tō nen. Tō Mere ta Makdala nivasem van hiy kēy noyoy gōh ēgēn.11Kēy moyon̄teg noyoy nen a so Tigsas mahatig lok den namatmat, wa Mere mal etsas Tigsas, ba kēy et dēmtig te nohohole nonon.12Me atgiy en, Tigsas maklō kē van hiy yoge vōyō nonon mahē kōyō mavan me den lepnō liwo vitwag, tō kōyō vanvan tatag namtehal.13Tō kōyō m̄ōl lok me, tō vasemlō noyoy gōh van hiy ige nonon Tigsas yatkelgi, ba kēy et dēmtig te kōyō.14Me atgiy lokse, Tigsas makalō me hiy ige nonon son̄wul nanm̄e vitwag, mahē a kēy gengen. Tō Tigsas nihole maymay van hiy kēy veg kēy et dēmtig te ige mey a met tō kē, a so kē mahatig lokse den namatmat. Kē mavap so nēqtēy namaymay veg kēy et dēmtig te.15Tō Tigsas mavap van hiy ige nonon so, “Kimi van vel vōnō del lemyam ba vasemlō noyoy ēwē van hiy nisil del lemyam.16Ihēte a nēdēmtig noyoy ēwē gōh tō nilep navasugyon̄ en, Ḡod tavaēh kē. Ba ihēte a et dēmtig te en, Ḡod tēvēvēg kē, wa tit vaēh vēhte kē.17Tō nēvēglal qelegōh totog tiwag mi ige mēy a nēdēmtig: Kēy tōvōyyak nuvu het lehek. Kēy tohohole mi nagatgat gayaq.18Kēy tētēy nam̄at mey a nin̄itn̄it mat net, ba kēy tit mat vēhte aē. So kēy wo min nage mey nehet, kēy tit yon̄teg vēhte nehet aē. Wa tō kēy tōm̄ōk namney apwon ige gom, tō kēy tēwē lokse.”19Sōwlē, mahē Welan Tigsas mohole bah hiy kēy en, tō Ḡod nilep kal kē hag lōtōk ēgēn. Tō Tigsas nihaghiy hōw lemtō non Ḡod.20Tō me atgiy, ige nonon mavan vel vōnō del, tō toytoy noyoy ēwē. Tō Welan memgumgu tiwag mi kēy, wa mak nohohole nonoy mitig maymay qēt mi woqse vahah, so nivasemlō so hohole nonoy en hēyhēywē. Amen.
The Seed Company