Namgumgu Namun Ige Hal1
1Teofilas, lōbōk namuk mey am̄ag en, no mayap gatay tawye haphap del a Tigsas magaleg geh tō, wa mavatvatgo tō, leqtēqtēg2mēdēn̄ a lōqōn̄ mey Ḡod melep kal kē alge. Am̄ag den Tigsas mēvēy kal alge en, kē metyak ige hal nonon, tō mavasemlō nahap a kēy so galeg heylō naman ne Vu Yon̄.3Lēkle yon̄ memeh nonon en, kē makalō woet me hiy ige hal. Tō kē maklō kē van hiy kēy bōqōn̄ son̄wul vet (40). Tō kē mavasemlō galsi so kē mēh lokse lemtehal m̄adeg. Tō kē mohohole gatay namtehal a Ḡod so nimyanag goy ige nonon.4Lōqōn̄ vitwag kēy gengen tiwag en, tō Tigsas mohohole maymay van hiy ige hal so, “Nitog vanvan veteg Jerusalem, ba dēyē veg nahap a Imam mino melgēg, wa mey a kimi moyon̄teg tō den no.5Veg Jon mavasugyon̄ kimi mi nēbē, ba et misin te Ḡod tavasugyon̄ kimi mi Nuvu Yon̄.”6Mahē kēy mahag tiwag en, tō kēy vēhge van Tigsas wo, “?Welan, qiyig gōh nēk so van me namyanag liwo lengon ige Tisrael ēnōk?”7Ba Tigsas meplu van hiy kēy so, “Nōqōn̄ ne haphap geh nen, Imam mahgen movonyak, ba et namunmi te so kimi so ēglal.8Ba Nuvu Yon̄ tēhēw kimi wa telep naman van hiy kimi. Tō kimi so vasemlō no van hiy ige n̄a Jerusalem, wa vel vōnō Judea, Samaria, wa tō vel mayam del.”9Tigsas nihole bah, tō kēy etet leptō van hiy kē wah, Ḡod nilep kal kē alge, tō namlēg vitwag nigaygoy kē, tō kēy et etsas lok site kē.10Kēy etet lapgetō hag alge en, tō kēy so et van qelekē net vōyō tig tiwag tō mi kēy. Kōyō mehey qēt namalsam qagqag, tō kōyō vap van hiy kēy so,11“!Kimi Takalili! ?Kimi tig sey tō gōh, tō etet ketket hag alge en bahap? Ḡod mal lep kal Tigsas den kimi n̄a lōtōk alge. Ba kē mahgen tavan lokse me lemtehal a qele kē mōm̄ōl kal tō aē en.”12Bahnentō, ige hal nen hatig den nuwutwut nan, a kēy ōl so Nuwutwut Ne Olif, tō van lokse Jerusalem. Nuwutwut nan kē sisqet ēwē napnō.13Tō kēy van dēn̄ me lēm̄ a kēy motog tō aē am̄ag. Nēm̄ nan nehey vag yō, ba nidin nan alge. Tō kēy yōstiwag lidin nan. Nahan ige nan wa Pita, Jon, Jemes, Andrō, Filip, Tomas, Batholomiw, Mathiw, tiwag mi Jemes a ēntēn Alfeus ōk, tō Simon a Silot , bahnentō Judas a ēntēn Jemes.14Ige gōh tiwag mi ige lōqōvēn, tō Mere a tita non Tigsas tiwag mi ige yathēthēn Tigsas, vaga kēy qultiwag batatay.15Qōn̄ vitwag, ige mey nēdēmtig Tigsas van tiwag me. Kēy tege m̄eldēl vag tiwag son̄wul yō (120). Tō Pita nihatig hag tō nihohole van hiy kēy.16Tō Pita wo, “Yathithik wa ige tētētek, me am̄ag Nuvu Yon̄ mohole heylō Mayanag Devēt veg Judas. Nayapyap Yon̄ mavasemlō so ikē vitwag den gēn, tō kē temgumgu tiwag mi gēn, ba ikē nen a titig helem̄ag me ige so tēy Tigsas en. Ba natawye vavap del a Layapyap Yon̄ so nak tig, tō mal aktig qēt.”18(Ba Judas en, kē melep nayseyse bahap mey nehet a kē mak tō. Tō kē melep nēvētan aē. Nēvētan nen, kē misisgoy lok aē, tō mēqēswoy natqan a nētna nonon makakalō.19Tō ige sil del Tejerusalem moyon̄teg noyoy nan, tō kēy mōl nahe mahē nen so, “Akeldama” a lagatgat nonoy, kēy ōl so, “Natno day.”)20Tō Pita hohole laptō. Kē wo, “Nayapyap Yon̄ mavap lōbōk Sam so,‘Itōk so nēm̄ nonon nitaq mamah qeleanen,tō net tit tog vēhte aē.’“Wa tō,‘Itōk so net vitwag nileh natno mugumgu nonon.’21“Tō veg bege gōh en, itōk so net vitwag niqultiwag mi kemem tō so vasemlō so Welan Tigsas mahatig lok tō den namatmat. Ba itōk so gēn etyak net vitwag mey a mavan tiwag tō mi kemem lēvētmahē del a Tigsas mavan kēlkēl tiwag tō mi kemem, meqtēg mahē a Jon mavasugyon̄ kē, tō mēdēn̄ lōqōn̄ a Ḡod melep kal kē alge.”23Tō kēy m̄ōk kal nahe et vōyō. Net totogyeg nahan Jōsēp, a tekel han Basabas si so Justus. Tō net vōyō negi, nahan Matias.24Tō kēy tatay so, “Welan, nēk nēglal nēdēmdēm non ige del. Tō nēk nēglal so ihē itōk so tēygoy namgumgu non ige hal, a Judas mukēg veteg tō, tō mavan nitiy vōnō nonon. Bastō, vasemlō me hiy kemem ihēte den yoge gōh a nēk mal etyak tēymat.”26Tō kēy suwsuwyeg nevet susu so etyak vitwag den yoge vōyō anen, tō nahan Matias makalō me. Tō kēy m̄ōk kal Matias, tō vatah kē tiwag mi ige hal son̄wul nanm̄e vitwag.
The Seed Company