Jemes4

1?Nōtōti vēytitit nahap? ?Wa nōtōti vēyvēygēl nonmi nahap? Ba nage gōh ēwē veg bemyōs het nonmi a niak tō kimi vēyvēygēl aē en.2Kimi nemyōs nahaphap non net tegha, tō kimi hatig wuh matmat net aē. Kimi qeneqneg bemlan net tegha ba kimi tit lep vēhte, tō kimi vēygēl wa vēytitit veg. Ba kimi tit lep vēhte veg kimi et vēhge te den Ḡod.3Mahē kimi vēhge Ḡod en, kimi tit lep vēhte veg kimi et vēvēhge tenenen te. Kimi vēhge ēwē bemyōs het nonmi.
4?Yēhē kimi, qeleave? Kimi qeleso nalqōvēn vitwag mey a nitig kēlē natm̄an nonon. ?Ba kimi et ēglalte so net a kē nemyōs so nibulsal tiwag mi namyam gōh en, kē natvale non Ḡod? Bastō net mey a kē nemyōs so nikokm̄egoy nahaphap telemyam gōh en, kē tavan me natvale non Ḡod.5Kimi nēglal vatag Nayapyap Yon̄ a mavap so, “Ḡod niqneqneg goy natalangēn mey a kē mōm̄ōk tō me hiy gēn.” ?Wo nohohole yon̄ gōh yeghuquy ēwē?
6Ba Ḡod nemyin̄ gēn vaga mi nasgōp del nonon, qele a Nayapyap Yon̄ mavap so,Ḡod titigoy ige a nēdēm liwo kēy,ba telep van nasgōp hiy ige a nēdēm bēbēw.
7Veg bege gōh en, kimi so tog leln̄an Ḡod. Ba tigoy Satan, tō kē tigityak qelen̄ den kimi.8Atmi van sisqet me hiy Ḡod, tō kē tavan sisqet kimi. Kimi ige ganganōy, atmi sōwōswōl namnemi, wa kimi mey a nangomi vōyō en, ak nalo taqami niwenwen.9Atmi lolwon wa ten̄ten̄. Nēyēyēheg nonmi en, leh mi naln̄e ten̄ten̄, tō nam̄sēksēk nonmi en, leh mi noyon̄ ninhet.10Atmi dēm bēbēw kimi lengon Welan, tō kē telep kal kimi.
11Yēhē yathithik wa yatētētek, kimi nitog hole hethet lokse hiy kimi. Veg net a nihole hethet hiy ēthēn, siso nivēvēg kē en, kē nihohole hethet hiy nele non Ḡod, wa kē nivēvēg nele nan so nehet. So kimi wo vēvēg nele en, tō kimi et tatag te nele.12Ba net vitwag wōy a melep me nele, wa tēvēvēg vēh. Ikē Ḡod mey tavaēh vēh net, wa tak hethet qēt net. ?Ba inēk ihē a tēvēvēg ige a notog walēg nēk?
13Sōwlē, kimi mey a hohole so, “Qiyig si so talōw kemem so van a lelqelqevōnō tegha, tō so tog nēte vitwag, tō mugumgu bēsēm en,” itōk, atmi yon̄teg galsi no.14Kimi et su ēglal hōn te nahap a so nikalō heylō me talōw. Nēh nonmi qele namyēp, kē nihag bah me tō nihay qelen̄ lok.15Netnenen so kimi vap so, “Sowo lemyōs non Welan, kemem totogtog ēh qōtō, tō tak vēh nahap qelegōh wa qelenōk.”16Ba kimi hole lem̄ag leptō veg kimi dēmdēm sotel kimi. Nohohole del qelenen nehet.17Bastō, net mey a nēglal galsi nahap mey netnenen so niak, ba kē et ak te en, kē nigengenyeg.

The Seed Company

https://app.library.bible/content/ae2bad925cc7f490