Romans13
1Muif lanh munh oix zuc mungv naih lanyf cun pănh wax đomc, wâyc zuc max naih laiv huungđ lanyf bix max zâyf tăng Zâu Tênb-Huungh njăpc taih, nzof nâyx zanyf naih lanyf nyăngz munh six tăng Zâu Tênb-Huungh njăpc taih.2Năngđ nây, laiv lanh nzeengz huungh pâu nyăngz lanyf, wax tauh six lauf nzeengz cloon Zâu Tênb-Huungh njăpc taih nyăngz lanyf, nzof nzeengz huungh lanyf wax đomc munh six cănh zuc tingc stoif.3Wâyc wax đomc naih lanyf nyăngz munh six max zâyf nongc phunz ayx gongx nyăngz munh cumh nzav, six cungb phunz ayx okx nyăngz munh cumh nzav. Nyâuh oix max cumh nzav naih lanyf nyăngz munh max? Phanv ayx gongx dlayc, nyâuh six tuz naih lanyf nyăngz munh tanv,4wâyc zuc stiz six Zâu Tênb-Huungh nyăngz pâuz wâyc nongc phunz nyâuh tuz gongx. Six năngđ coong nyâuh ayx huđ, six oix zuc cumh nzav, wâyc stiz nzauf nzuc đao six max zâyf coong lunc nzauf, stiz six Zâu Tênb-Huungh nyăngz pâuz, stiz yâuc naih lanyf nongc tingc ayx huđ wax đomc munh nyăngz stoif.5Wâyc nây, six oix zuc mungv, max zâyf cungb wâyc cumh nzav zuc tingc stoif cuungv, six lauf wâyc stimz nyâuđ timb.6Six lauf wâyc nâyx nyâuh bix zuc setb sôiv; wâyc stiz six Zâu Tênb-Huungh nyăngz pâuz, nongc ayx nâyx huungđ cumh pâuz.7Mâyh sămv muif lanh munh nyăngz zaix six oix zuc clao phunz: hoopđ zuc setb sôiv phunz mănv six zuc setb, hoopđ zuc nôpc nyanh phunz mănv six zuc nôpc, hoopđ zuc cumh nzav laiv lanh six zuc cumh nzav, hoopđ zuc zanyb laiv lanh six zuc zanyb.8Năngx gâyf sămv mănv nyăngz laiv huungđ zaix, cungb oix zuc sămv lanh stăngz lanh cuungv, wâyc laiv lanh stăngz nănh nyăngz cah sinh munh six ayx tuz gâyf njanh clăkx clunh nzuf.9Wâyc nâyx đomc gâyf njanh coong: “Mâyh năngx gâyf pamf pongz lauh nyăngz stoif, mâyh năngx gâyf tayx munh, mâyh năngx gâyf ayx stac, mâyh năngx gâyf mauh tax huungđ,” năngđ coong naih tix huungđ lanyf timb, six wax đomc muif huungđ lauf cloopb dlonf yămz nâyx zâux wac, coong: “Mâyh oix zuc stăngz mâyh nyăngz cah sinh munh năngđ mâyh cănh nyăngz stinb nâyx.”10Stăngz munh six max ayx hoiđ cah sinh munh. Năngđ nây, stăngz munh six ayx phunz gâyf njanh tuz clăkx clunh nzuf.11Oix zuc năngđ nâyx yămz, wâyc pâyz tuz nâyx yenh stâyv, six beengc săngx huđ phunz nyâuh oix zuc tăng mâyc njoomh sting điub taih. Wâyc nâyx zanyf pănh nyăngz njâuv pôz six taih năngx stătx têx pănh ah yac săngđ zen wax zanyf.12Guungh munf dlih cayx quaix nzof, bah noib zax yâuc cayx tauv. Wâyc nây, pănh oix zuc quanyf nzuf nzămc nyăngz cumh pâuz, bix zuz gwăngz nyăngz bopc zax tungh zăngc.13Pănh oix zuc ayx năngx hoopđ, cayx năngđ yămz bah noib zax nyăngz gwăngz, năngx gâyf nyađ, hopb tiu binz, năngx gâyf tinyh văngf, bah camx bah caiz, năngx gâyf tinyh nzeengz, tinyh hănđ.14Nzof, nyâuh six oix zuc săngh yămz Zâu Yê-su Jix-Tuz cah njaf, yâuc năngx gâyf ayx âyz stinb a oix nyăngz jau.
FAR EAST BROADCASTING COMPANY