Romans12
1Wâyc nây, yâuf pez lex, yămz Zâu Tênb-Huungh hâuđ lênh nyăngz jau, Yaz quinb nyâuh oix zuc stuungx nyâuh nyăngz stinb ayx cayx năngđ ah cuyb congx nyăngz tax huungđ phunz Zâu Tênb-Huungh, săngh nyăngz yâuc đăngb zeengh, hoopđ Nănh nyăngz nyâuđ, nây six nyâuh canyx bongc tuz hoopđ nyăngz jau.2Yâuc năngx gâyf ayx âyz nây stâyv sangc nyăngz jau, six oix zuc coi wănc nyâuh nyâyh nyăngz jau săngh săngb nyăngz taih, phunz nyâuh hayh pâyz tuz laiv huungđ six gongx nyăngz zux ix, cloon Zâu Tênb-Huungh numđ nyađ, clăkx clunh nyăngz zux ix.3Wâyc tăng Zâu Tênb-Huungh sađ pôz phunz yaz, yaz joođ coong ănz nyâuh muif lanh, năngx gâyf nyâyh zanyf cănh, ayx tuz blătc hoopđ zuc nyâyh nyăngz, six oix zuc hayh cun tuz nyâuđ nyâyh, âyz năngđ Zâu Tênb-Huungh sađ phunz pănh săngh lanh nyăngz zen stimz six beengc laiv.4Wâyc zuc cayx năngđ pănh six đuungx huungđ phănc songc yămz ah nomz stinb nâyx, nzof wax đomc muif huungđ phănc yâuc max tinyh năngđ,5lauf tinyh năngđ, pănh đuungx lanh munh six songc săngh ah nomz stinb yămz Zâu Jix-Tuz, nzof pănh muif lanh six săngh stinb sangc nyăngz phănc.6Six pănh tuz nyăngz sâuđ nyâyc yâuc max tinyh năngđ, cănh âyz Zâu nyăngz pôz sađ phunz pănh: năngđ coong laiv lanh tuz sâuđ nyâyc tâuc wac, six oix zuc âyz nănh nyăngz zen stimz tâuc;7năngđ coong tuz sâuđ nyâyc bokc dlic, six oix zuc bokc dlic; năngđ coong tuz sâuđ nyâyc nzaox munh, six oix zuc nzaox;8năngđ coong tuz sâuđ nyâyc quinb munh, six oix zuc quinb; tuz sâuđ nyâyc stăngc munh, six oix zuc ayx nyâuđ quăng stăngc; tuz sâuđ nyâyc yenv jiux pangx, six oix zuc nongc nyâuđ yenv; tuz sâuđ nyâyc hâuđ lênh munh, six oix zuc numđ nyađ ayx.9Stăngz munh six oix zuc senz stăngz, okx nyăngz six zuc hănđ, gongx nyăngz six zuc nzauf năngx sen;10oix zuc lanh stăngz lanh cayx năngđ yâuf pez nâyx; yâuc oix zuc lanh nyangc phunz lanh;11oix zuc vaic năngx gâyf lâyc; oix zuc joomz nyâuđ; ayx Zâu nyăngz cumh pâuz;12oix zuc numđ nyađ wâyc naih njih mungc; pongh zâuđ nanc oix zuc tanyđ; yâuc oix zuc nzac jab cloo Zâu;13oix zuc stăngc phunz wax đomc đăngb zeengh munh sămv nongc nyăngz jau; oix zuc nongc nyâuđ stipx zeb.14Oix zuc poou wac phunz ayx huđ ănz nyâuh wax đomc munh; oix zuc poou wac yâuc năngx gâyf zaux;15munh nyađ six cloon stiz nyađ; munh haoh six cloon stiz haoh;16oix zuc lanh cloon lanh hoopđ stimz tongh âyx yămz, năngx gâyf nyâyh ayx lub, yâuc oix zuc stipx wax đomc minb mâyc hav nyăngz munh. Năngx gâyf numđ cănh naih tongb manyh;17năngx gâyf zoz okx clao okx phunz mănv, oix zuc ayx gongx yămz muif lanh munh nyăngz cah đangc;18năngđ coong tuz, six zuc cănh nzac jab cloon munh tinyh đoih ayx gongx yămz;19stăngz nyăngz yâuf pez lex, năngx gâyf cănh clao yônz, six oix zuc njâuh phunz Zâu Tênb-Huungh tingc stoif nyăngz jau, wâyc zuc naih ja coong: “‘Clao yônz six yămz Yaz; Yaz six clao phunz,’ Zâu coong năngđ nâyx.”20“Wâyc nây, năngđ coong nyâuh nyăngz yônz zaz nyâuđ sab, six oix zuc phunz stiz nhlinc. Năngđ coong stiz nyâuđ gatb, oix zuc phunz stiz hopb. Wâyc ayx năngđ nâyx, nyâuh six đuiz tâuf tanv stib ănz stiz nyăngz pyây.”21Năngx gâyf phunz okx hingh mâyh, six oix zuc nongc gongx hingh okx.
FAR EAST BROADCASTING COMPANY