Hebrews7

1Wâyc nâyx tauh Mên-ci-sê-đek, six Sa-lem nyăngz huungh, yâuc ayx Yămz Njăngb Quaix wax Tauh Zâu Tênb-Huungh nyăngz stayb munh, nănh ninyh pongh Apx-la-ham, toix Apx-la-ham ninyh bopc tuz hingh wax đomc huungh stix bix jinh đangh phunb đangz lauf wax zanyf, nănh songđ poou wac phunz Apx-la-ham,2nzof Apx-la-ham yâuc lanyc săpc phănc nyăngz ah phănc tăng bopc tuz hingh wax đomc muif huungđ jax toongx phunz wax tauh huungh; Mên-ci-sê-đek âyz gâyf six “peengh stimz nyăngz huungh,” yâuc lauf ayx Sa-lem nyăngz huungh, âyx gâyf six “peengh oonz nyăngz huungh,”3nănh max naih nzif, max naih pha, max naih stu stongz, max naih steengb stâyv noib, yâuc max naih quaix stâyv noib, six cayx năngđ Zâu Tênb-Huungh nyăngz Toonz nâyx, Mên-ci-sê-đek six njinh luh ayx stayb munh tauv banc stâyv banc đaic.
4Six phanv nyâyh mangc jađ wax tauh huungh saix ayx năngđ laix, bix claof jex Apx-la-ham năngx stungx săpc phănc nyăngz ah phănc phunz, tăng bopc tuz hingh wax đomc gongx quaix nyăngz jax toongx.5Nzof wax đomc Lê-wi munh nyăngz sây stunz, tuz stipx ayx stayb munh nyăngz cumh pâuz wax zanyf, âyz gâyf njanh six naih gâyf nongc zoz săpc phănc nyăngz ah phănc tăng songx munh, âyz gâyf six tăng cănh nyăngz yâuf pez, wâyc stiz six lauf tăng Apx-la-ham taih.6Six, nâyx tauh huungh max cloon Lê-wi munh songc stingx, bix lauf stipx Apx-la-ham nyăngz săpc phănc ah phănc, yâuc poou wac phunz naih nyunc wac nyăngz munh.7Nzof, yămz hav nyăngz munh tuz poou wac tăng yămz njăngb nyăngz munh six max hayh aox tuz.8Nzof yămz nây, six wax đomc hayh tayc nyăngz munh tuz stipx săpc phănc nyăngz ah phănc, six yămz wa, wax tauh huungh yâuc tuz stunx coong six năngx jinh săngh.9Lauf hayh coong ah zâux ayx năngđ nâyx coong, Lê-wi munh, tuz sâub wax đomc săpc phănc nyăngz ah phănc, yâuc lauf wâyc Apx-la-ham bix setb săpc phănc nyăngz ah phănc,10wâyc Mên-ci-sê-đek pongh Apx-la-ham wax zanyf Lê-wi lauf năngx jinh yămz claof jex nyăngz nyâuđ njaf.
11Wâyc, năngđ coong clăkx clunh nyăngz jau six păngc wax đomc Lê-wi nyăngz stayb munh cumh pâuz (yâuc wâyc nây, songx munh bix tuz sađ gâyf njanh phunz), ha săngh laix bix zef năngx sămv zuc njăpc pitc tauh stayb munh âyz Mên-ci-sê-đek wax phănc, bix yâuc max tuz stunx âyz A-lôn wax phănc heh?12Wâyc stayb munh nyăngz cumh pâuz zuc coi wănc, six gâyf njanh lauf zuc naih coi wănc.13Nzof Nănh, six nâyx đomc wac jinh đangh coong tauv wax Tauh, six cănh pitc stingx munh, nzof yămz wax stingx munh yâuc max zeengx naih mănv tuz ayx cumh pâuz yămz wa congx tinc.14Wâyc pâyz tuz yox coong pănh nyăngz Zâu six tăng Yu-đa stingx setb taih, nzof yămz wax stingx munh, Mô-sê yâuc max coong tauv ayx stayb munh nyăngz cumh pâuz ax tiny.15Nzof nây zef năngx yox têx timb năngđ coong naih pitc tauh stayb munh tuz njăpc taih cayx năngđ Mên-ci-sê-đek nâyx,16Nănh tuz săngh stayb munh max zâyf âyz bamh munh nyăngz gâyf njanh tingc taih, six âyz săngh mengc max hayh tayc nyăngz tômx jab.17Wâyc naih zanyx manyf nyăngz wac coong tauv Nănh coong:“Mâyh six ayx stayb munh tauv banc stâyv banc đaic cayx năngđ Mên-ci-sê-đek wax phănc nâyx.”
18Wâyc nây, cah đangc wax đomc lanyf wâyc max naih jab yâuc max setb laiv huungđ songđ zuc quanyf19(wâyc gâyf njanh max hayh ayx phunz laiv huungđ tuz clăkx clunh), nzof yâuc wâyc naih gongx quaix nyăngz njih mungc, phunz pănh păngc wa bix tuz ninyh yămz stătx Zâu Tênb-Huungh.20Nzof nâyx đomc yâuc max zâyf coong max naih nyunc nyăngz wac, — max cun wax đomc pitc đomc munh hănđ max naih nyunc nyăngz wac yâuc tuz ayx stayb munh,21six Zâu Yê-su tuz njăpc taih naih cloon nyunc nyăngz wac, tuz Zâu Tênb-Huungh coong ănz Nănh coong:“Zâu nyunc nyăngz six max coi wănc:‘Mâyh six ayx stayb munh tauv banc stâyv banc đaic.’” —
22wâyc nây, Zâu Yê-su six săngh baox đamz munh phunz ah cuyb năngx gongx nyăngz nhlengc wac.23Max cun, wax đomc ayx stayb munh nyăngz munh six đuungx nzongf, yâuc wâyc hayh zuc tayc songđ max hayh tuz stâyv quâyx ayx stayb munh,24wâyc Zâu Yê-su six stâyv quâyx yămz, Nănh stâyv quâyx ayx stayb munh max hayh coi wănc,25Yâuc wâyc nâyx, Nănh bix hayh njâuv tuz yetx stong păngc Nănh bix ninyh yămz stătx Zâu Tênb-Huungh wax đomc munh, wâyc Nănh six stâyv quâyx săngh nongc joođ tayv phunz stiz.26Wâyc senz sămv zuc ah tauh stayb munh năngđ nâyx phunz pănh: đăngb zeengh, max naih stoif, max naih wâyx, tuz lanyc gâyh wax đomc naih stoif nyăngz munh, yâuc tuz ênz muf năngx njăngb quaix wax đomc muif tab guungh;27Nănh six max năngđ wax đomc stayb munh bix năngx sămv zuc muif noib stungx stanyb lanyh, tah yetx six tayv phunz cănh nyăngz stoif, cah đangz zef tayv phunz songx munh nyăngz stoif, wâyc Nănh jau đai ayx tuz soongb nzuf wax đomc cumh pâuz, yămz Nănh stungx cănh nyăngz stinb wax zanyf ah hâyđ six caux nzuf.28Wâyc gâyf njanh six njăpc wax đomc munh đoonh munh taih ayx stayb munh pyây, nzof nyunc nyăngz wac six taih đangz gâyf njanh, songđ njăpc Toonz taih, Nănh six ayx tuz clăkx clunh tauv banc stâyv banc đaic.

FAR EAST BROADCASTING COMPANY

https://app.library.bible/content/4031cf477b55913c