Hebrews6
1Wâyc nây, pănh six oix zuc quanyf Zâu Jix-Tuz nyăngz zetx toongv gâyf ănz cah đangz, bix ninyh ayx tuz tauv săngh munh lub munh, gâyf zef năngx njăpc laif coonz tay, coong tauv nhlimc stoif gâyh đutb wax đomc tayc nyăngz cumh pâuz, bix zen caođ Zâu Tênb-Huungh,2nzaox tauv ayx quaix-gâyf nyăngz jau, cloon tăpx puf nyăngz jau cloon munh tayc năngx săngh taih nyăngz jau, cloon stâyv quâyx zuc tingc stoif nyăngz jau.3Năngđ coong Zâu Tênb-Huungh phunz, pănh six ayx wax đomc jau.4Wâyc nây six max hayh tuz — yămz wax đomc tuz siux gwăngz quaix, yâuc tuz stipx quaix Zâu Tênb-Huungh nyăngz pôz, yâuc tuz sađ Zâu Singx-Lingh phunz nyăngz munh5yâuc tuz zangđ pâyz coong Zâu Tênb-Huungh nyăngz wac six gongx cloon cah đangz phanx nyăngz tômx jab6bix zef năngx setb Zâu têx — six max hayh ayx tuz phunz stiz zef năngx nhlimc stoif phunb đangz, wâyc stiz zoz Zâu Tênb-Huungh nyăngz Toonz tingz ănz săpc đăngc zax phunz stiz ah hâyđ timb, yâuc toongx songx ayx phunz Nănh zuc nyayz.7Wâyc zuc ah tootz nib, bix tuz bungc lub nzac nănh ninyh đâub đoonz max setc tiny yâuc setb jeengz zongx gongx phunz songx jămđ nyăngz munh têx, wax tootz nib six tuz Zâu Tênb-Huungh sađ pôz phunz,8six năngđ coong setb nzim setb mađ huđ têx, wax tootz nib six max săngh nongc, yâuc zuc zaux, nzof tauv stêtb mâyv nănh six zuc tâuf pu.9Six stăngz nzongf nyăngz yâuf pez lex, max cun buz coong năngđ nâyx, buz yâuc jinh đangh zu mungc tăng nyâuh wax đomc năngx gongx quaix nyăngz jau, six phunz hayh tuz njâuv wax đomc.10Wâyc Zâu Tênb-Huungh six max zâyf coong max peengh stimz bix nyâuđ cob nyâuh nyăngz cumh pâuz, cloon nyâuh wâyc nănh nyăngz manyh bix ayx wax đomc stăngz nyăngz jau, cloon bokc dlic wax đomc đăngb zeengh munh nyăngz jau, nzof nâyx zanyf nyâuh lauf năngx jinh bokc dlic stiz.11Six buz numđ oix nongc nyâuh muif lanh tuz joomz nyâuđ năngđ nâyx, phunz nyâuh hayh tuz naih clăkx clunh nyăngz njih mungc tauv tauh tauv mâyv,12yaz max oix nongc nyâuh pênx munh lâyc munh, six oix nongc nyâuh âyz wax đomc munh naih zen stimz nyăngz gao cloon ayx nyâuđ đao zu bix tuz stipx nyunc nyăngz wac wax đomc.13Wâyc Zâu Tênb-Huungh cloon Apx-la-ham nyunc wac wax zanyf, wâyc Nănh max hayh nuz mănv năngx lub têx nongc nyunc wac, songđ cănh nuz Nănh nongc nyunc wac,14coong: “Yaz six senb senz sađ pôz phunz mâyh đuungx, yâuc ayx phunz mâyh nyăngz sây stunz phutx hongđ staox.”15Wâyc nây, Apx-la-ham songđ ayx nyâuđ đao zu, nzof nzăngđ tuz stipx wax đomc nyunc nyăngz wac.16Wâyc bamh munh nyunc wac six hayh nuz tix lanh năngx lub têx stiz nongc nyunc wac, nzof phanv stiz naih laiv huungđ tinyh panx nyăngz jau, stiz six nongc wac nyunc nzof nzăngđ sec,17lauf tinyh năngđ, Zâu Tênb-Huungh wâyc oix hinđ manyf phunz tuz stipx nyunc nyăngz wac wax đomc munh, hayh pâyz tuz tauv Nănh nyăngz zux ix six max coi wănc, Nănh songđ lauf nongc wac taih nyunc18wâyc zuc wa iz huungđ six max coi wănc, nzof yămz wa iz huungđ Zâu Tênb-Huungh six max coong jaf, pănh six wax đomc tiuv ninyh tauv tungh meem tinc nyăngz munh, yâuc tuz naih oonz nyâuđ nzongf, nzauf sen yămz pănh cah đangc nyăngz njih mungc;19pănh nzauf sen nây njih mungc six cayx năngđ ah cuyb mengc hoonh nyăngz tungh tingz nâyx, yâuc wăn yâuc tăngđ, bix japc nzac wa tăng jeengh buyx cah njaf ninyh,20wax nomz đăngb tinc six Zâu Yê-su japc nzac ninyh, ayx cayx năngđ ah Tauh ninyh đangc tayv phunz pănh nâyx, yâuc tuz săngh stayb munh pyây tauv banc stâyv banc đaic, âyz năngđ Mên-ci-sê-đek wax phănc.
FAR EAST BROADCASTING COMPANY