Зах3
1Вара тудо мыланем кугу иерей Иисусым ончыктен. Тудыжо Господьын Суксыжо ончылно шоген, а Иисусын пурла велныже, тудым титаклаш манын, сатана шоген.2Господьын Суксыжо сатаналан каласен: «Тек Господь умшатым петыра, сатана! Тек Иерусалимым ойырен налше Господь умшатым петыра! Вет тиде айдеме тул гыч руалтен лукмо тулвуй дене иктак!»3Суксо ончылно шогышо Иисусын вургемже амыргыше лийын.4Суксо шке полышкалышыже-влаклан каласен: «Тудын амыргыше вургемжым кудашса!» А Иисуслан манын: «Теве мый ӱмбачет сулыкым кудашым да тылат пайрем вургемым чиктем».5Вара кӱштен: «Иисуслан ару вуйчиемым упшалтыза!» Нуно тудлан ару вуйчиемым упшалтеныт да вургемым чиктеныт. Тидын годым Господьын Суксыжо воктеныже шоген.6Господьын Суксыжо Иисуслан каласен:7«Господь Саваоф тыге ойла: Мыйын корнем дене кошташ, Мылам служитлаш тӱҥалат гын, Мый тылат шке пӧртыштем вуйлаташ да кудывечем-влакым эскераш ӱшанем. Тый Мыйын пеленем улшо-влак коклашке толын кертат.8Колышт, кугу иерей Иисус, да тек тидым тыйым колышт шинчыше иерей иза-шольыч-влак колыт, вет те чыланат палдарыше пале лийыда: вашке Мый Игым, шке тарземым, кондем.9Теве кӱ, тудым Мый Иисус ончылан пыштем. Тушто – шым шинча, тиде кӱ ӱмбалан Мый пӱчкеден возем, – ойла Господь Саваоф, – да тиде мландын сулыкшым ик кечыште ӱштыл кудалтем.10Тудо кечын, – ойла Господь Саваоф, – те икте-весыдам виноград ден смоква пушеҥге йымалне шинчаш ӱжыда».
Institute for Bible Translation, Finland