Пс55
1Хор вуйлатышылан. «Умбалне йӱкым лукде илыше кӧгӧрчен» семлан возымо. Филистим-влакын Давидым Гефыште кучымекышт, Давидын возымашыже.2Юмем, мыйым серлаге!Еҥ-влак мыйым шыгыремдылыт,ӱмбакем керылтше-влак кечыгут поктылыт.3Кажне кечын тушманем-влак мыйым шыгыремдылыт,вет ваштарешем шогалше шукын улыт,о, Чыла деч Кӱшылысӧ!4Лӱдмем годым Тыйын полышетлан ӱшанем.5Мый Юмын мутшым моктем,ом лӱд – Юмын полшымыжлан ӱшанем,мом ыштен кертеш мылам айдеме?6Кажне кечын тушманем-влак вес семын савырат мутем,иктым нуно шонат – ышташ мылам осалым.7Пырля погынат, шылын шинчыт,мыйым пушташ ваҥен,кажне йолтошкалтышем эскерат.8Осал пашаштлан мутым огыт кучо мо?Юмем, калык-влакым шке шыдет дене сӱмырен кудалте!9Кусныл коштмо кажне кечем Тый шотленат.Мыйын шинчавӱдем шке атышкет пого –нуно Тыйын книгашкет возымо огытыл мо?10Кунам мый Тыйым сӧрвален ӱжам,тушманем-влак савырнат мӧҥгеш.Тышечын мый палем: Юмо – мыйын велне.11Мый Юмын мутшым моктем,Господьын пуымо мутшым чаплем.12Мый Юмылан инанен илем, нимо дечын ом лӱд,мом ыштен кертеш мылам айдеме?13Юмем, Тылат мом сӧрымем шуктем,моктымаш надырым кондем.14Вет утарышыч чонем Тый колымаш деч,[шинчамым – шинчавӱд деч,]йолемым – шӱртньымаш деч,да мый Юмын ончылно, илышын волгыдыштыжо, коштын кертам.
Institute for Bible Translation, Finland