Пс118
[Аллилуия.]
1Пиалан улыт чын корным тошкышо-влак,Господьын законжо почеш илыше-влак.2Пиалан улыт Тудын сугыньжым шуктен шогышо-шамыч,Тудым уло чон дене кычалше-шамыч.3Нуно осал пашам огыт ыште,Господьын корныж дене коштыт.4Тый Шке шӱдымаш-влакетым тӱткын шуктен шогаш кӱштенат.5О, мылам тура корно дене каяш ыле,Тыйын пунчалет-влакым шуктен шогаш ыле!6Тунам, кӱштымаш-влакетым ушыштем кучен,вожылмашыш мый ом пуро.7Ару шӱм-чон дене Тыйым моктем,Тыйын чын уставет-влаклан тунемам.8Пунчал-влакетым мый шукташ тӱҥалам,ит кодо мыйым йӧршешлан.9Кузе рвезыеҥлан шке корныжым арулыкышто кучаш? –Тыйын шомакетым шуктен шогымо дене.10Уло шӱмем дене Тыйым кычалам,ит пу мылам кӱштымаш-влакет деч кораҥаш.11Ончылнет сулыкым ышташ огыл манын,Тыйын шомакетым шӱмыштем аралем.12Моктымо улат Тый, Господь!Пунчал-влакетлан мыйым туныкто.13Тыйын умшат гыч лекше устав-влакыммыйын йылмем увертара.14Сугынь-влакетым шуктен илымыланмый поянлыклан куаныме семын йывыртем.15Тыйын шӱдымашет-влак нерген шонкалем,Тыйын корнет-влакым ончем.16Пунчалет-влак мыйым лыпландарат,Тыйын шомакетым мый ом мондо.17Шке тарзетлан порылыкетым ончыкто –тунам мый умбакыжат илем, Тыйын шомакет шуктем.18Поч мыйын шинчам,тунам законетын ӧрыктарыше чынже-влакым ужам.19Мландымбалне мый жаплан толшо гына улам –кӱштымаш-влакетым мый дечем ит шылте.20Устав-влакетым палаш шонен,мый чон улнен йокрокланем.21Кугешныше-шамычым Тый шылталенат–нуно каргыме улыт,кӱштымаш-влакет деч кораҥыныт.22Намыс ден шӱктарымашым мый дечем кораҥде,вет Тыйын сугынет-влакым мый шуктен шогем.23Тӧра-шамыч шинчат да мыйын ваштареш каҥашен кутырат,а Тыйын тарзет пунчалет-влак нерген шонкала.24Тыйын сугынет-влак – мыланем куан,[пунчалет-влак улыт] ойым пуышо.25Мыйын чонем пуракыште кия,шке мутет почеш мыйым иландаре.26Шке корнем-влак нерген Тылат ойленам –Тый мыйым колынат.Туныкто мыйым шке пунчалет-влаклан!27Полшо умылаш шӱдымаш-влакетын корныштым,да ӧрыктарыше пашат-влак нерген шонкалаш тӱҥалам.28Чонемже ойгырен шортеш –шке мутет дене мыйым пеҥгыдемде.29Шояк корным мый дечем кораҥде,порылыкет дене мыйым законетлан туныкто.30Ойырен налынам мый чынлык корным,Тыйын уставет-влак эре шинча ончылнем улыт.31Сугынет-шамычым, Господь, мый шӱмыштем ашнем –ит пурто мыйым вожылмашыш.32Куржам мый кӱштымаш-влакетын корнышт дене,Тый мыйын умылымашем кумдаҥдет.33Ончыкто мылам, Господь, пунчал-влакетын корныштым,мый тудын дене мучаш марте каем.34Пу мылам ушым – тӱҥалам законетым шукташ,уло шӱмем дене тудым аралаш.35Шогалте мыйым кӱштымаш-влакетын йолгорнышкышт,вет тушто мый куаным муам.36Мыйын шӱмем сутлык шонымаш дек огыл,а Тыйын сугынет деке савыре.37Кораҥде мыйын шинчам чыла кӱлдымаш деч,шке корныштет мыйым иландаре.38Шукто шке тарзетлан сӧрымӧ мутетым,Тыйым шотлен илыше-влаклан Тый тудым пуэнат.39Ит пу мыланем мыскылыме лияш –тидын дечын мый лӱдам.Тыйын уставет-влак сай улыт.40Шӱдымаш-влакетым мый вучен илем,шке чынлыкет дене мыйым иландаре.41Господь, мылам порылыкетым ончыкто,сӧрымет семынак мыйым утаре.42Тунам мыйым шӱктарышылан пуэн кертам вашмутым,вет Тыйын шомакетлан ӱшанен илем.43Умшам гыч чынле мутым ит кораҥде,вет Тыйын уставет-влаклан ӱшанен илем.44Эре, курым-курымешмый Тыйын законет шуктем.45Эрыкан кошташ мый тӱҥалам,вет шӱдымашет-влак почеш илаш тыршем.46Тыйын сугынет-влак нерген кугыжа-шамычлан ойлем,вожылмашыш мый ом пуро.47Тыйын кӱштымаш-влакетлан куанем,нуным мый йӧратем.48Кидем шуем Тыйын кӱштымаш-влакет дек,нуным мый йӧратем,пунчалет-влак нерген мый шонкалем.49Шарналте шке тарзетлан пуымо мутетым,тудо шукталтеш манын, Тый мылам ӱшаным пуэнат.50Йӧсӧ годым тудо мыйым лыпландара,Тыйын мутет мыйым иландара.51Кугешныше-влак мыйым чот воштылыт,но мый Тыйын законет деч ом кораҥ.52Шарналтем Тыйын уставет-влакым, Господь,Тыйын акрет устав-влакетым, да лыпланем.53Осал еҥ-шамычлан мый шыдешкем –Тыйын законетым нуно кӱлдымыш луктыт.54Чыла вере, кушто йот еҥ семын илем,муро гай улыт пунчалет-влак мыланем.55Йӱдымат, Господь, Тыйым шарнем,Тыйын законетым ушыштем кучем.56Чыла тиде мый денем лийын,вет мый шӱдымаш-влакетым шуктен шогем.57Господь – мылам палемдыме ужаш,Тыйын шомакетым шуктен шогаш мый сӧренам.58Уло шӱм-чон дене Тылат кумалам:каласымет семынак поро лий мый декем.59Коштмо корнем-влак нерген шонкалемда Тыйын сугынь корнышкет шке йолем савырем.60Вашкем мый, ом юватылТыйын кӱштымаш-влакетым шукташ.61Осал еҥ-шамычын кандырашт мыйым авырат,но Тыйын законетым мый ом мондо.62Чын уставет-влаклан Тыйым мокташмый пелйӱдым кынелам.63Тый дечет лӱдшӧ да шӱдыметым шуктышо-влакланчылаштлан мый йолташ улам.64Тыйын порылыкет дене, Господь, мланде темын –шке пунчалет-влаклан мыйым туныкто.65Господь, cӧрымет семынакТый шке тарзетлан сайым ыштенат.66Мыйым шонен мошташ туныкто, шинчымашым пу,вет Тыйын кӱштымаш-влакетлан ӱшанем.67Орлыкым эртымешке, мый йомын коштым,а кызыт Тыйын шомакет шуктен шогем.68Поро Тый улат, [Господь,] ыштет лач порым!Шке пунчалет-влаклан мыйым туныкто.69Кугешныше-влак ӱмбакем шоям кышкат,а мый уло шӱмем дене шӱдыметым шуктем.70Нунын шӱмышт кӱжгемын,а мый Тыйын законетлан куанем.71Орлыкем мылам сайыш савырнен –пунчал-влакетым мый тунемынам.72Тыйын умшат гыч лекше закон мыланемпеш шуко шӧртньӧ ден ший деч шергырак.73Тыйын кидет мыйым ыштен да калыплен:пу мылам ушым – Тыйын кӱштымашет-влаклан тунемам.74Тый дечет лӱдшӧ-влак мыйым ужыт да куанат,вет Тыйын шомакетлан мый инанен илем.75Палем, Господь – Тый чын судитлет,Тыйын колтымо орлыкым мый суленам.76Тек Тыйын порылыкет мыйым лыпландара,тидым Тый шке тарзетлан сӧренат.77Тек Тыйын чаманымашет пеленем лиеш –мый умбакыжат илаш тӱҥалам,Тыйын законет – мыланем куан.78Тек кугешныше-влак вожылмашыш пурат –титакем уке ӱмбач нуно мыйым шыгыремдылыт,а мый Тыйын шӱдымашет-влак нерген шонкалем.79Тек Тый дечет лӱдшӧ да сугынетым палыше-шамычмый декем толыт.80Тек шӱмем Тыйын пунчалет-влак почеш ила,тунам ом пуро вожылмашыш.81Утарыметым вучен, йӧслана чонем:Тыйын шомакетлан инанен илем.82Тыйын мутетым вучен, шинчамже ноен –ойлем мый: кунам пуэт мылам лыпланымашым?83Лийынам мый шикш деч туртын пытыше шувыш гай,но Тыйын пунчал-влакетым монден омыл.84Мыняр жап эше Тыйын тарзетлан вучаш?Мыйым поктылшо-влаклан кунам Тый судым ыштет?85Тыйын законетым кӱлдымыш луктын,кугешныше-влак мылам вынемым кӱнченыт.86Тыйын чыла кӱштымашет чынле улыт.Нимолан огыл мыйым поктылыт – полшо мыланем!87Изиш гына мыйым ышт пытаре,но Тыйын шӱдымашет-влакым мый шым кодо.88Шке порылыкет дене арален кодо илышем –Тыйын пуымо сугынетым мый шуктен шогем.89Курымешлан, Господь, Тыйын шомакет каваште пеҥгыдемдыме,90Тыйын чынлыкет – тукым гыч тукымыш.Ыштенат Тый мландым, да тудо шога.91Тыйын уставет почеш чылажат таче кече марте шога,чылажат Тыланет служитла.92Тыйын законет мылам куаным ок пу ыле гын,пытем ыле ойгемлан кӧра.93Ом мондо нигунам шӱдымаш-влакетым,нунын дене Тый арален кодет илышем.94Тыйын мый улам – утаре мыйым,вет шӱдымашет-влак почеш илаш тыршем.95Вучен коштыт осал еҥ-влак мыйым пушташлан,а мый Тыйын сугынет нерген шонем.96Кеч-монат шке чекше уло – мый тидым ужынам,а Тыйын кӱштымашет-влак улыт пеш кумда.97Кузе мый Тыйын законетым йӧратем!Кече мучко тудын нерген шонкалем.98Тыйын кӱштымашет-влак эре ушыштем улыт,нуно мыйым чыла тушманем деч мунлыракым ыштат.99Ушанрак лийынам чыла туныктышем деч,вет Тыйын сугынет-влак нерген мый шонкалем.100Ушан-шотанрак лийынам калык кугурак-шамыч дечын,вет Тыйын шӱдымаш-влакетым мый шуктен шогем.101Нимогай осал корныш ом пу шогалаш йолемлан,Тыйын шомакетым мый шуктен шогынем.102Ом кораҥ Тыйын уставет-влак дечын,вет Тый Шкеак мыйым туныктет.103Могай тамле улыт мутет-влак йылмемлан,умшамлан улыт мӱй деч шерырак.104Тыйын шӱдымашет-влак пуат мылам ушым,садлан тӱрлӧ шояк корным ужмем ок шу.105Тыйын шомакет – йолемлан волгыдым пуышо,йолгорнемым волгалтарыше тул.106Мый чын устав-влакетым шуктен шогаш товатленам:сӧрымемым мый шуктем.107Господь, мый пеш чот орланем –шке мутет почеш мыйым иландаре.108Господь, тек Тыланет келша умшам гыч лекше шомакем –тудым шке кумылын мый надырлан кондем;шке устав-влакетлан мыйым туныкто.109Кеч илышемым лӱдыкшылык авырен шога,но Тыйын законетым мый ом мондо.110Осал еҥ-влак мылам лӧдым шынденыт,но Тыйын шӱдымет деч мый кораҥын омыл.111Тый дечет мый сугынь-влакым курымешлан налынам,вет нуно шӱм-чонем куандарат.112Шонен пыштенам мыйТыйын пунчалет почеш эре илаш.113Тылат ӱшанле огыл-влакым ужмем огеш шу,а Тыйын законетым мый йӧратем.114Тый мыйын авыртышем, куржын утлымо верем улат,Тыйын шомакетлан инанен илем.115Осалым ыштыше-шамыч, мый дечем кораҥза –Юмемын кӱштымашыж-влакым мый шуктен шогем.116Шке мутет почеш мыйым пеҥгыдемде –тунам умбакыжат илаш тӱҥалам,Тылат инанымылан мыйым вожылмашыш ит пурто.117Полшо мыланем – тунам лиям утарыме,пунчал-влакетым ушыштем эре кучаш тӱҥалам.118Пунчал-влакет деч кораҥше-шамычым Тый поктен колтет,вет нуно лач чояланен да ондален моштат.119Тый мландысе чыла осал еҥым куштыра семын ӱштыл кудалтет,а мый Тыйын сугынетым йӧратем.120Тый дечет лӱдмем дене капем чытыра,Тыйын суд-влакет деч мый лӱдам.121Чын пашам ыштен, мый чынлын иленам –ит пу мыйым поктылшо-влак кидыш.122Арален нал шке тарзетым, мылам сайым ыште,кугешныше-влак мыйым ынышт шыгыремдыл.123Тыйын утарыметым, чынле мутетын шукталтмыжым вучен,мыйын шинчам ноен.124Ончыкто тарзетлан шке порылыкетым,шке пунчалет-влаклан мыйым туныкто.125Улам мый Тыйын тарзет, пу мылам ушым –пален налам мый Тыйын сугынетым.126Жап шуын Господьлан шке пашажым ышташ,вет Тыйын законетым кӱлдымыш луктыныт.127А мый Тыйын кӱштымаш-влакетымшӧртньӧ деч чот, яндар шӧртньӧ деч чот йӧратем.128Мый чыла шӱдымашетым шуктен шогем,садлан тӱрлӧ шояк корным ужмем ок шу.129Ӧрмашан улыт Тыйын сугынет-влак,сандене мыйын чонемлан нуно шерге улыт.130Шомакетым умылымаш волгыдым конда,ужарвуй-влакланат ушым шында.131Умшам почын, нелын шӱлештам –тыге мый кӱштымаш-влакетым вучем.132Ончал ӱмбакем да мыйым чамане,вет лӱметым йӧратыше-влак дене Тый тыге ыштет.133Шке мутет дене ошкылем пеҥгыдемде,нимогай сулыклан мыйым ит пу сеҥаш.134Утаре мыйым айдеме шыгыремдымаш деч,тунам Тыйын шӱдымаш-влакетым шуктем.135Шке чуриетын волгыдыж дене тарзетым волгалтареда шке пунчал-влакетлан мыйым туныкто.136Еҥ-влак Тыйын законетым огыт шукто,садлан шинчам гыч вӱд чот йога.137Тый чын ыштыше улат, Господь,чынле улыт Тыйын уставет-влак.138Тыйын пуымо сугынет-влакчын деч чын улыт.139Монденыт тушманем-влак Тыйын шомакетым –тиде мыйын чонем йӱлалта.140Тыйын шомакет пеш яндар,Тыйын тарзет тудым йӧрата.141Мыйым изиэш ужыт, огыт шотло,но Тыйын шӱдымаш-влакетым мый ом мондо.142Тыйын чынлыкет курымашле,Тыйын законет чынле.143Йӧсланымаш ден ойго мыйым авалтеныт,но кӱштымаш-влакет мылам куаным кондат.144Сугынет-влак курымеш чынле улыт:пу ушым мылам, да мый умбакыжат илаш тӱҥалам.145Уло шӱмем дене ӱжын кумалам:кол мыйым, Господь –пунчал-влакетым мый шуктен шогем.146Тыйым ӱжам – мыйым утаре,тунам Тыйын сугынетым шукташ тӱҥалам.147Волгыжмо деч ончычак Тыйым сӧрвален ӱжам –мый Тыйын шомакетлан инанен илем.148Йӱдвошт мый шинчам ом петыре,Тыйын шомакет нерген шонкалем.149Шке порылыкет дене, Господь, кол йӱкемым,чын судым ыштен, мыйым иландаре.150Лишемыт поктылшем-влак осал шонымаш дене,Тыйын законет деч нуно мӱндырнӧ улыт.151Лишне Тый улат, Господь,Тыйын чыла кӱштымашет улыт чынле.152Сугынь-влакетым шукертсек палем,Тый нуным курымешлан пеҥгыдемденат.153Ончал орлыкем да мыйым утаре,вет Тыйын законетым мый ом мондо.154Нал мыйым пыдалын, мыйым арале –шке мутет почеш мыйым иландаре.155Осалым ыштыше-влак деч утаралтмаш мӱндырнӧ,вет пунчал-влакетым нунын палымышт ок шу.156Господь, Тыйын чаманыше порылыкет пеш шуко –чын судым ыштен, мыйым иландаре.157Шуко мыйын поктылшем да тушманем,но сугынь-влакет деч ом кораҥ.158Тый дечет кораҥше-влакым ужын, мый йырнем,вет нуно Тыйын шомакетым огыт шукто.159Ончал, кузе мый шӱдымаш-влакетым йӧратем –шке порылыкет дене, Господь, мыйым иландаре.160Тыйын шомакет тӱрыснек чын,Тыйын чынле судет-влак курымашле улыт.161Титакем уке ӱмбач тӧра-влак мыйым поктылыт,но шӱмемже Тыйын шомакет деч веле лӱдеш.162Куанем мый Тыйын мутетлан,кугу поянлык тудо мыланем.163Ужмем ок шу шоякым, тудын деч йырнем,а Тыйын законетым йӧратем.164Чын уставет-влаклан Тыйымкечылан шым гана моктем.165Кугу тыныслык лиеш нунылан, кӧмыт законетым йӧратат,огыт шӱртньӧ нуно нигунам.166Тыйын утарыметлан, Господь, инанен илем,Тыйын кӱштымашет-влакым мый шуктен шогем.167Тыйын сугынет-влак улыт мылам шерге,нуным мый моткоч йӧратем.168Шуктен шогем мый шӱдымаш ден сугынетым,вет мыйын коштмо корнем Тыйын ончылнет.169Господь, полышым йодын кычкырымемтек Тый декет миен шуэш –шке мутет почеш пу ушым мыланем.170Тек мыйын кумалмем Тыйын ончыкет миен шуэш –шке мутет почеш мыйым утаре.171Умшам Тыйым мокташ тӱҥалеш,вет Тый мыйым пунчал-влакетлан туныктет.172Тыйын шомакетым йылмем мураш тӱҥалеш,вет Тыйын кӱштымашет-влак улыт чынле.173Тек Тыйын кидет мылам полыш лиеш,вет Тыйын шӱдымашет-влак почеш илаш шонен пыштенам.174Тыйын утарыметым, Господь, мый чот вучен илем,Тыйын законет мылам конда куаным.175Тек чонем ила да Тыйым мокта,уставет-влак тек мылам полшат.176Йомдарыме шорык семын мый йомынам:кычал му шке тарзетым,вет Тыйын кӱштымаш-влакетым монден омыл.Institute for Bible Translation, Finland