Шотл35
1Иордан воктенысе Моав тӧрверыште, Иерихон ола ваштареш, Господь Моисейлан каласен:2«Израиль эрге-влаклан кӱштен ойло: тек нуно левит-влаклан илашышт шке мланде пайышт гыч ола-влакым, тыгак нунын йыр улшо кӱтымӧ верлам пуат.3Ола-влак нунын илыме верышт лийыт, а кӱтымӧ верлаште нуно шке тыгыде ден шолдыра вольыкыштым кӱтен ашнаш тӱҥалыт.4Левит-влаклан пуышаш ола йыр улшо кӱтымӧ вер-влак ола пырдыж деч чыла могырыш [кок] тӱжем кынергут кутышыш шуйналтшаш улыт.5Ола деч эрвелкыла кок тӱжем кынергутым, кечывалвелкыла кок тӱжем кынергутым, касвелкыла кок тӱжем кынергутым да йӱдвелкыла кок тӱжем кынергутым висен налза, а покшелныже ола лиеш. Левит-влакын олашт йыр улшо кӱтымӧ вер-влакын кумдыкышт тыгай лийыт.6Левит-влаклан пуышаш олада-влак гыч кудытшо куржын утлымо ола лийыт. Тушко еҥым пуштшо айдеме куржын толын кертеш. Нине куд ола деч посна нунылан эше нылле кок олам пуыза.7А чылаже левит-влаклан нылле кандаш олам да нунын йыр улшо кӱтымӧ верлам пуыза.8Кунам левит-влаклан Израиль эрге-влакын мландышт гыч ола-влакым пуэда, тек кугу чотан тукым шукырак пуа, изирак тукым – шагалрак. Кажне тукым, могай мланде пайым налмым шотыш налын, левит-влаклан олалам пуышаш».9Господь Моисейлан каласен:10«Израиль эрге-влаклан ойло: Иорданым вончен, Ханаан мландыш пурымеке,11шкаланда куржын утлымо ола-влакым ойырен налза. Тушко вес еҥым лӱмын огыл, а йоҥылыш пуштшо еҥ куржын да шылын кертеш.12Пуштшо еҥым калык ончыко судыш шогалмыж деч ончыч ынышт пушт манын, нине ола-влак [вӱр верч] ӱчым шуктышо еҥ деч куржын утлымо вер лийыт.13Куржын утлаш те куд олам ойырышаш улыда:14кумытым – Иордан ты велне да кумытым – Ханаан мландыште. Нине ола-влак куржын утлымо вер лийыт.15Израиль еҥ-влаклан, тыгак тендан коклаште илыше йотъеҥ-влаклан нине куд ола куржын утлымо вер лийыт. Вес еҥым йоҥылыш пуштшо кажне еҥ тушко куржын кертеш.16Ик еҥ вес еҥым кӱртньӧ ӱзгар дене пера, да тудыжо кола гын, тиде еҥ – айдемым пуштшо: тудым шкенжым пуштман.17Ик еҥ весым пушташ ситыше нелытан кӱ дене пера да тудым пуштеш гын, перыше еҥ айдемым пуштшылан шотлалтеш: тудым шкенжым пуштман.18Але вес еҥым пуштын кертше пу ӱзгар дене пера да тудым пуштеш гын, тиде еҥ – айдемым пуштшо: тудым шкенжым пуштман.19Вӱр верч ӱчым шуктышо еҥ, тиде пуштшо еҥым вашлиймеке, тудым пуштшаш.20Ик еҥ весым ужмышудымыжлан кӧра шӱкалеш але лӱмынак ӱмбакше иктаж-мом кудалта да тудым пуштеш,21але шыдым кучымыжлан кӧра мушкындыжо дене пеш чот пера, да тудыжо кола гын, тиде еҥ – айдемым пуштшо: тудым шкенжым пуштман. Вӱр верч ӱчым шуктышо еҥ, тиде пуштшо еҥым вашлиймеке, тудым пуштшаш.22Но кӧ вес еҥым лӱмын огыл, тудлан шыдым кучыде, шӱкалеш але осалым шоныде иктаж-мом ӱмбакше кудалта,23але пушташ ситыше нелытан кӱ кидше гыч йоҥылыш ӱмбакше камвозеш да тудыжо кола гын, – а пуштшо еҥ тудын тушманже лийын огыл, тудлан осалым шонен огыл –24тунам пуштшо еҥ ден вӱр верч ӱчым шуктышо еҥ коклам калык нине пунчал почеш ончен лекшаш.25Тыгай пуштшо еҥым калык ӱчым шуктышо еҥын кидше деч утарен кодышаш, тудым куржын утлымо олашке мӧҥгеш пӧртылтышаш. Тек тудо тушто святой елей дене шӱрымӧ кугу иерейын колымешкыже ила.26Пуштшо еҥ куржын утлымо ола деч ӧрдыжкӧ лектеш27да ӱчым шуктышо еҥ тудым ола деч ӧрдыжтӧ вашлиеш да пуштеш гын, пуштмыжлан титакан ок лий.28Пуштшо еҥ куржын утлымо олаште кугу иерейын колымешкыже кодшаш. Лач тудын колымекше веле тудо шке илыме мландышкыже пӧртыл кертеш.29Кеч-кушто илаш тӱҥалыда гынат, законын тиде пунчалжым тукым гыч тукымыш шуктен шогыза.30Кӧ вес еҥым пуштеш гын, тыгай еҥым таныклыше-влакын мутышт почеш веле пушташ лиеш. Но пуштмо нерген пунчалым лукташ ик таныклыше еҥ шагал лиеш.31Кӧ вес еҥым пуштын да колымашым сулен, тыгай еҥын илышыжым арален кодаш манын, сулен налме акым ида нал – тудым пушташ кӱлеш.32Тыгак куржын утлымо олашке шылын кайыше еҥ деч сулен налме акым ида нал, [кугу] иерейын колымыж деч ончыч тудлан шке илыме мландышкыже пӧртылаш ида пу.33Шке илыме мландыдам ида амырте. Вет вӱр мландым амырта, а йоктарыме вӱр деч мландым лач вӱрым йоктарыше еҥын вӱржӧ дене веле эрныкташ лиеш.34Шке илыме мландыдам ида амырте – тушто Мыят илем. Вет Мый, Господь, израиль калык коклаште илем».
Institute for Bible Translation, Finland