Шотл34
1Господь Моисейлан каласен:2«Израиль эрге-влаклан кӱштен ойло: кунам те Ханаан мландыш пуреда, тыланда пуымо тиде мландын чекше тыге эрташ тӱҥалеш.3Кечывалвелне мландыда Едом чек воктене, Син ир мланде деч тӱҥалеш. Тендан кечывалвел чекда эрвелне Шинчалан теҥыз тӱр гыч тӱҥалеш4да кечывалвелыш Акравим кӱкшака дек кая, вара Син ир мланде гоч кечывалвеке Кадес-Варни дек, тушеч Гацар-Аддар дек шуйна да Ацмон гоч эрта.5Ацмон деч чек Египет чекысе эҥер могырыш кая да теҥыз марте шуйна.6Тендан касвел чекда Кугу теҥыз лиеш. Тудо касвел могырысо чекда лиеш.7Йӱдвел чекдам тыге колтыза: Кугу теҥыз деч – Ор курык деке,8Ор курык деч – Емаф деке, вара – Цедад деке.9Тушечын тиде чек Цифрон деке, вара Гацар-Енан деке миен шуэш. Тиде тендан йӱдвел чекда лиеш.10Эрвел чекдам Гацар-Енан деч Шефам дек колтыза.11Шефам деч чек Аинын эрвел могырыштыжо улшо Ривла деке вола, вара Киннереф теҥызын эрвел могыр тайылже дене эрта.12Вара чек Иордан эҥер мучко Шинчалан теҥыз марте каяш тӱҥалеш. Теве тендан мландыда, тудын чекше-влак тыге эрташ тӱҥалыт».13Моисей Израиль эрге-влаклан кӱштен каласен: «Тиде мландым те шке коклаштыда шерева почеш пайледа. Тудым Господь индеш тукымлан да [Манассийын] пел тукымжылан пуаш кӱштен.14Вет Рувим ден Гад тукым еш-влак да Манассийын пел тукымжо шке мланде ужашыштым налыныт.15Нине кок тукым да эше пел тукым шке мланде ужашыштым Иорданын эрвел могырыштыжо, Иерихон ваштареш, налыныт».16Господь Моисейлан каласен:17«Теве тыланда мландым шеледаш тӱҥалше-влакын лӱмышт: иерей Елеазар, Нав эрге Иисус.18Тыгак мландым шеледаш кажне тукым деч ик тукымвуйым налза.19Теве нунын лӱмышт: Иуда тукым деч – Халев, Иефоннийын эргыже,20Симеон тукым деч – Самуил, Аммиудын эргыже,21Вениамин тукым деч – Елидад, Кислонын эргыже,22Дан тукым деч – тукымвуй Буккий, Иоглийын эргыже,23Иосифын Манассий эргыжын тукымжо деч – тукымвуй Ханниил, Ефодын эргыже,24Ефрем эргыжын тукымжо деч – тукымвуй Кемуил, Шифтанын эргыже,25Завулон тукым деч – тукымвуй Елицафан, Фарнакын эргыже,26Иссахар тукым деч – тукымвуй Фалтиил, Аззанын эргыже,27Асир тукым деч – тукымвуй Ахиуд, Шеломийын эргыже,28Неффалим тукым деч – тукымвуй Педаил, Аммиудын эргыже».29Теве нине еҥ-влакым Господь израиль эрге-влаклан Ханаан мландым пайлен пуаш шогалтен.
Institute for Bible Translation, Finland