Шотл16
1Корей, Ицгар эрге – Ицгарже Каафын эргыже, а тудыжо Левийын эргыже лийын – да тудын дене пырля Дафан ден Авирон, Елиавын эргыже-влак, тыгак Авнан, Фалеф эрге – нуно Рувим тукым гыч лийыныт –2Моисей ваштареш шогалыныт. Нунын деке кокшӱдӧ витле израиль эрге ушнен. Нунышт чыланат калыкын онышт, погынышко ӱжмӧ лӱмлӧ еҥ-влак лийыныт.3Пырля погынен, нуно Моисей ден Аарон деке толыныт. «Сита тыланда! – маныныт нуно. – Калык коклаште чыланат святой улыт, да Господь нунын дене пырля! Молан те шкендам Господьын калыкше деч кӱшкӧ шындеда?»4Тидым колын, Моисей кумык возын.5Вара Корейлан да тудын дене пырля улшо-влаклан каласен: «Кӧ Тудын улеш, кӧ святой да кӧм Тудо Шкеж деке лишемда – Господь эрла эрдене ончыкта. Кӧм Тудо ойырен налеш, тудым Шкеж деке лишемда.6А тый, Корей, да тый декет ушнышо-влак, теве мом ыштыза: тулшол атыдам налза7да тушко эрла Господь ончылно тулым да тамле пушан тӱтыртышым пыштыза. Кӧм Господь ойырен налеш, тудо святой лиеш. Сита тыланда, Левий эрге-влак!»8Моисей Корейлан эше каласен: «Левий эрге-влак, колыштса мыйым!9Израильын Юмыжо тендам израиль калык кокла гыч ойырен налын, Господьын скинийже пелен сомылым шуктен шогаш да Тудын калыкшын лӱмжӧ дене пашам ышташ манын, тендам Шкеж деке лишемден. Тиде тыланда шагал мо?10Господь тыйым да иза-шольыч-влакым – Левий эрге-влакым – Шкеж деке лишемден, а те эше иерей лияш шонеда.11Тый да тый декет ушнышо-влак Господь ваштареш погынен улыда! А Ааронжо кӧ тыгай? Мом тудын ӱмбакыже ӧпкелен ойледа?»12Моисей шкеж деке Елиав эрге-влакым, Дафан ден Авироным, ӱжыктен. Но нуно каласеныт: «Огына мий!13Тый мемнам, шӧр да мӱй йогыман мланде гыч луктын, ир мландышке колаш конденат. Тиде тылат шагал мо? А ынде эше мемнан дене оза лийнет?14Тый мемнам шӧр да мӱй йогыман мландыш шыч кондо, пасу ден виноград аҥам шыч пу. Еҥ-влак сокыр улыт шонет мо? Ме она мий!»15Моисей пеш чот шыдешкен да Господьлан каласен: «Нине еҥ-влаклан мый нимогай осалым ыштен омыл, нигӧшт деч ик осёлымат налын омыл – ит ончал нунын кондымо надырыштым».16Моисей Корейлан каласен: «Тый да тый декет ушнышо-влак эрла Господь ончыко шогалза – тый, нуно да Аарон.17Тек тендан кокла гыч кажныже шке тулшол атыжым налеш, тушко тӱтыртышым пышта да Господь ончыко конда – чылаже кокшӱдӧ витле тулшол ате лийже. Тыгак тый шке атетым да Аарон шке атыжым кондыза».18Кажныже, шке тулшол атыжым налын, тушко тулым да тӱтыртышым пыштен. Нуно Юмо дене вашлийме омашыш пурымо вер деке миен шогалыныт. Моисей ден Ааронат тыгак ыштеныт.19Нунын ваштареш Корей уло калыкым Юмо дене вашлийме омашыш пурымо вер деке поген. Тунам уло калыклан Господьын чапше кончен.20Господь Моисей ден Ааронлан каласен:21«Кораҥза нине еҥ-влак дечын: Мый нуным ик татыште пытарем».22Но Моисей ден Аарон кумык возыныт да каласеныт: «О Юмо, чыла илышылан шӱлышым пуышо Юмо! Сулыкыш ик еҥ пурен, а тый уло калыклан шыдешкенат?»23Тунам Господь Моисейлан каласен:24«Калыклан Корейын, Дафанын да Авиронын илыме омашышт деч кораҥаш кӱштӧ».25Моисей кынелын да Дафан ден Авирон деке каен, тудын почеш Израильын кугуракше-влак каеныт.26Моисей калыклан каласен: «Кораҥза нине осал еҥ-влакын омашышт деч, нунын нимогай арверышт дек ида тӱкнӧ – уке гын [нунын дене пырля] сулыкышт верч коледа».27Еҥ-влак Корейын, Дафанын да Авиронын омашышт деч кораҥыныт. А Дафан ден Авирон, омашышт гыч лектын, ватышт, эргышт да изи йочашт дене пырля омашыш пурымо вер воктене шогеныт.28Тунам Моисей каласен: «Тидым мый шке гыч огыл ыштем, чыла тидым ышташ мыйым Господь колтымым теве кушеч пален налын кертыда:29нине еҥ-влак тыглай колымаш дене колат да нунын мучашышт моло еҥ-влакын гаяк лиеш гын, тугеже мыйым Господь колтен огыл.30А Господь нине еҥ-влак дене тымарте уждымым ышта гын – мланде шке умшажым почеш да нине еҥ-влакым [пӧрт ден омашышт,] чыла погышт дене пырля нелеш да нуно вес тӱняш илышынек порволат гын, палыза: нине еҥ-влак Господь ваштареш шогалыныт».31Моисей ойлен пытарен веле, нине еҥ-влак йымалне мланде шелалтын –32мланде шке умшажым почын да мо улышт дене пырля нуным нелын. Корейын еҥже-влак ешышт дене, уло погышт дене порволеныт.33Нуно вес тӱняш чыла мо улышт дене илышынек воленыт. Вара нунын ӱмбалне мланде петырнен. Тыге нуно калык кокла гыч пытарыме лийыныт.34Тушто шогышо израиль калык, нунын кычкырымыштым колын, тушеч куржыныт. «Мланде мемнамат нелын кертеш!» – нуно ойленыт.35Тыгодым Господь деч тул лектын да тӱтыртышым кондышо кокшӱдӧ витле еҥым пытарен.36Господь Моисейлан каласен:37«Иерей Елеазарлан, Ааронын эргыжлан, ойло: тек тудо йӱлен колышо еҥ-влакын [той дене ыштыме] тулшол атыштым пога, тушеч тулшолым кораҥда – ате-влак святой лийыныт,38вет нуным Господь чурий ончыко конденыт. Нине колышо сулыкан еҥ-влакын атыштым таптен, тек той лышташым ыштат да тудын дене жертвенникым комыжлат. Тиде израиль эрге-влаклан шижтарымаш лиеш».39Иерей Елеазар йӱлен колышо-влакын кондымо той атыштым поген. Жертвенникым комыжлаш нине ате гыч лышташым таптеныт.40Елеазарлан тыге ышташ Господь Моисей гоч ойлен. Тиде той лышташ израиль эрге-влаклан теве мом шарныктен шоген: Господь ончыко тӱтыртышым Аарон тукым еҥ деч моло нигӧ конден ок керт. Уке гын тудын дене Корей да тудын велне шогышо-влак семын лиеш.41Эрлашыжым уло израиль калык Моисей ден Аарон ваштареш ӧпке мутым нӧлталын: «Те Господьын калыкшым пуштында!»42Кунам уло калык Моисей ден Аарон ваштареш погынен, нуно Юмо дене вашлийме омаш ӱмбаке ончалыныт да ужыныт: скинийым пыл леведын да Господьын чапше кончен.43Моисей ден Аарон Юмо дене вашлийме омаш дек лишемыныт,44да Господь Моисей [ден Ааронлан] каласен:45«Кораҥза нине еҥ-влак дечын, Мый нуным ик татыште пытарем». Но Моисей ден Аарон кумык возыныт.46Моисей Ааронлан каласен: «Тулшол атым нал, тушко жертвенник гыч тулым, тыгак тӱтыртышым пыште да вашкерак калык деке наҥгай, тудын дене касарыме йӱлам шукто. Господьын шыдыже лектын – калыкым пытарымаш тӱҥалын!»47Моисейын кӱштымыж почеш Аарон тӱтыртышым налын да калык коклаш куржын – туштыжо пытарымаш тӱҥалынат улмаш. Аарон тӱтыртышым йӱлалтен да касарыме йӱлам шуктен.48Тудо колышо ден эше илыше-влак коклашке шогалын, да пытарымаш чакнен.49Пытарымаш деч чылаже латныл тӱжем шымшӱдӧ еҥ колен. Тиде чотыш Корейлан кӧра колышо-влак пурен огытыл.50Кунам калыкым пытарымаш чарнен, Аарон Моисей деке, Юмо дене вашлийме омашыш пурымо вер деке, пӧртылын.
Institute for Bible Translation, Finland