Лев13
1Господь Моисей ден Ааронлан каласен:2«Иктаж-кӧн коваштыштыже пуалше, экземе але тамга лектеш гын, кудыжо вара проказе черыш савырнен кертеш, – тыгай еҥым иерей Аарон але тудын иктаж иерей эргыж деке кондыман.3Тек иерей черле верым онча. Тушто пун ошемын, да чер коваштышке келгемын пурен гын, тиде – проказе чер. Тыгайым ужмеке, иерей ты еҥым ару огыл манын увертара.4А коваштыште тамга ошо, но келгемын огыл, да ты верыште пунат ошемын огыл гын, иерей ты еҥым моло деч шым кечылан ойырышаш.5Тек шымше кечын иерей тудым кокымшо гана онча. Черле вер тугаяк кодын да коваште мучко шарлен огыл гын, тиде еҥым иерей моло деч эше шым кечылан ойырышаш.6Шымше кечын тудым иерей эше ик гана онча. Черле вер коваште мучко шарлен огыл да пешыжак ок палдырне гын, иерей тудым ару манын увертарышаш. Тиде – экземе. Тек ты еҥ шке вургемжым мушкеш, вара тудо ару лиеш.7Иерей деке миен толмеке да ты еҥын ару улмыж нерген увертарымеке, экземе капше мучко шарлаш тӱҥалеш гын, тудо адакат иерей деке толшаш.8Экземын кап мучко шарлымыжым ужын, иерей тудым ару огыл манын увертарышаш: тиде – проказе чер.9Проказе дене черланыше еҥым иерей деке кондыман.10Тек иерей тудым онча. Коваштыште пуалше вер ошо, тушто улшо пун ошемын, а пуалме верыште коваште олмеш шыл коеш гын,11тугеже тиде – шукертак пижше проказе чер. Тек иерей тудым ару огыл манын увертара да посна ойыра, вет тудо ару огыл.12А проказе чер коваште мучко шарла да черлын уло капшым вуй гыч йол марте – иерейын шинчаже авалтыме кумдыкым – леведеш гын,13да иерей проказе черын уло кап петырымыжым ужеш – тек тудо черлым ару манын увертара. Вет тудын коваштыже пӱтынек ошемын, сандене тудо ару.14А коваште олмеш шыл коеш гын, тыгай еҥ ару огыл.15Коваште олмеш шылым ужын, иерей тудым ару огыл манын увертарышаш. Тиде шыл коймо вер ару огыл. Тиде – проказе чер.16Но шыл коймо вер вашталташ тӱҥалеш да ошемеш гын, тек тиде еҥ иерей дек толеш.17Иерей тудым ончышаш. Черле вер ошемын гын, тек иерей тиде еҥым ару манын увертара. Тудо – ару.18Кӧн могырыштыжо кокша лийын, вара паремын,19кокша лийме верыште ош пуалше але йошкар-ошалге тамга лектын гын, тудлан иерей деке толман.20Иерей тудым ончышаш. Тамга коваштыш келгемын пурен, да тушто пун ошемын гын, иерей тиде еҥым ару огыл манын увертара. Тиде – проказе. Тудо кокша лийме верыште шарлен.21Но иерей тушто ошемше пун ден коваштыш келгем пурымым ок уж да тамгажат пешыже ок палдырне гын, тунам иерей тиде еҥым калык деч шым кечылан ойыра.22Тамга коваште мучко писын шарлаш тӱҥалеш гын, иерей тудым ару огыл манын увертарышаш. Тиде еҥ – черле.23А тамга верыштыжак кодеш да ок шарле гын, тиде – кокша деч кодшо пале. Тунам иерей тиде еҥым ару манын увертарышаш.24Иктаж-кӧн коваштыже йӱла, йӱлымӧ верыште йошкар-ошалге але ош тамга лектеш,25да иерей ончымыж годым тушто пун ошеммым да тамган коваштыш келгем пурымыжым ужеш гын, тиде – проказе. Тудо йӱлымӧ вер олмышто шарлен. Иерей тудым ару огыл манын увертарышаш. Тиде – проказе чер.26Но тамгасе пун ошо огыл, тамгажат коваштыш келгем пурен огыл, адакшым пешыже ок палдырне гын, тек иерей тудым калык деч шым кечылан ойыра.27Шымше кечын иерей тудым угыч ончышаш. Тамга коваште мучко шарлен гын, иерей тудым ару огыл манын увертарышаш: тиде – проказе чер.28А тамга верыштыжак кодын, коваште мучко шарлен огыл да пешыже ок палдырне гын, тиде – йӱлымӧ деч вара пуалше. Иерей тудым ару манын увертарышаш, вет тиде – йӱлымӧ деч вара кодшо пале.29Пӧръеҥын але ӱдырамашын вуйыштыжо але оҥылашыштыже лӱмӧ лиеш гын,30тек тудым иерей онча. Тудо коваштыш келгемын пурен, а ӱмбалнысе пун нарынчалге да вичкыж гын, иерей тыгай еҥым ару огыл манын увертарышаш. Тиде – йора, вуйыш але оҥылашыш лекше проказе чер.31Но иерей, ончен лекмекше, йоран коваштыш келгем пурымыжым ок уж, да тушто ӱп шеме огыл гын, тек тудо йоран еҥым калык деч шым кечылан ойыра.32Шымше кечын иерей йорам ончышаш. Тудо шарлен огыл, нарынчалге ӱп уке, да йора коваштыш келгемын пурен огыл гын,33тек черле еҥ ӱпшым але пондашыжым нӱжын налеш, но йоран верым ок логал. Иерей тудым калык деч кокымшо гана шым кечылан ойырышаш.34Шымше кечын иерей йора улмо верым адакат ончен лекшаш. Йора коваште мучко шарлен огыл да коваштыш келгемын пурен огыл гын, иерей ты еҥым ару манын увертарышаш. Тек тудо шке вургемжым мушкеш, тунам ару лиеш.35Тиде еҥын ару улмыж нерген увертарыме деч вара йораже коваште мучко чот шарла,36да тидым иерей ужеш гын, нарынчалге пуным ынжат кычал: тиде еҥ ару огыл.37А йора улмо вер вашталтде кодын да тушто шем пун кояш тӱҥалын гын, йора пытен. Тиде еҥ ару. Иерей тудым ару манын увертарышаш.38Иктаж пӧръеҥын але ӱдырамашын коваштыштыже ош тамга-влак лектыт гын,39тек иерей тудым ончен лектеш. Тамга-влак шапалге ош тӱсан улыт гын, тиде – тыглай чӱнча. Тиде еҥ ару.40Иктаж пӧръеҥын ӱпшӧ йогаш тӱҥалын гын, тиде – вуй чараҥмаш. Тыгай еҥ ару.41Кӧн ӱпшӧ саҥгаштыже йогаш тӱҥалын гын, тиде – саҥга чараҥмаш. Тиде еҥ ару.42Но чара верыште ошо але йошкаргырак тамга лектын гын, тушто проказе чер шарлен.43Иерей тудым ончышаш. Чара верыште могыр коваштысе проказе чер гай койшо ошо але йошкаргырак тӱсан пуалше уло гын,44тиде еҥ проказе черан, тудо ару огыл. Иерей тудым ару огыл манын увертарышаш: тудын вуйыштыжо – проказе чер.45Проказе черан еҥын вургемже кушкедме, ӱпшӧ шала колтымо, ӱлыл пел чурийже петырыме лийшаш. Тудо ”Ару омыл! Ару омыл!” манын кычкырышаш.46Черле улмо чыла кечылаштыже тыгай еҥ ару огыл. Тудо посна илышаш. Тудын илыме верже – стан деч ӧрдыжтӧ.47Меж але йытын вургемыште, куымо але пидме арверыште, йытын але меж кут ден тореш шӱртыштӧ, шӱштыштӧ але шӱштӧ дене ыштыме иктаж-могай арверыште проказе гай койшо тамга лектеш гын,49да тиде тамга вургемыште але коваштыште, кут ден тореш шӱртыштӧ але коваште дене ыштыме иктаж-могай арверыште ужаргырак але йошкаргырак тӱсан лиеш гын, тиде – проказе. Тудым иерейлан ончыктыман.50Иерей проказан арверым ончен лектеш да шым кечылан посна пышта.51Шымше кечын тудо арверым угыч ончышаш. Тамгаже вургем, кут але тореш шӱртӧ, шӱштӧ але шӱштӧ дене ыштыме иктаж-могай арвер мучко шарлен гын, тиде – эҥгекым кондышо проказе. Тиде арвер ару огыл.52Вургемым, меж але йытын кут ден тореш шӱртым, кеч-могай шӱштӧ арверым, куштыжо проказе уло – иерей йӱлалтышаш. Вет тиде – эҥгекым кондышо проказе, тыгай арверым йӱлалтыман.53Но вургем, кут але тореш шӱртӧ да кеч-могай шӱштӧ арвер мучко иерей тамга шарлымым ок уж гын,54тек тамган арверым мушкаш кӱшта да кокымшо гана шым кечылан посна пышта.55Мушмо деч вара иерей тамган арверым ончен лекшаш. Тамга шарлен огыл, но тугаяк кодын гын, тиде арвер ару огыл. Проказе кеч тӱжвал але кӧргӧ велне лийже, ты арверым йӱлалтыман.56Но мушмо деч вара тамга пешыжак ок палдырне гын, тек иерей тудым вургем але шӱштӧ деч, кут але тореш шӱртӧ деч кушкед ойыра.57Тамга тидын деч варат вургемыште, кут але тореш шӱртыштӧ, шӱштӧ арверыште угыч лектеш гын, тиде – пижедылше проказе. Тыгай арверым йӱлалтыман.58А вургемым, кут але тореш шӱртым, шӱштӧ арверым мушмеке, тамга йомын гын, нуным кокымшо гана мушман. Тунам нуно ару лийыт.59Теве меж але йытын вургемыште, кут але тореш шӱртыштӧ, шӱштӧ арверыште проказе лекме да нуным ару але ару огыл манын увертарыме шотышто закон».
Institute for Bible Translation, Finland