Суд6
1Израиль эрге-влак адакат Господь шинча ончылно осалым ышташ тӱҥалыныт, сандене Господь нуным шым ийлан мадиан-влакын кидышкышт пуэн.2Мадиан-влак нуным чот пызыреныт, сандене израиль эрге-шамыч курык шелше ден курыкпомышлаште шкаланышт шылме вер ден карман-влакым ыштеныт.3Израильтян-шамыч ӱден веле пытарат, нунын дек мадиан, амалик да моло эрвел калык толын лектыныт.4Нуно израильтян-влакын кундемыштышт шке омашлаштым шогалтеныт да мланде лектышым Газа марте пытарен каеныт. Нуно израильтян-влаклан шкеныштым пукшаш шорыкымат, ушкал ден ӱшкыжымат, осёлымат коден огытыл.5Нине калык шке вольыкышт да омашышт дене шурнышырчык наре толеденыт. Нуным шкеныштым, верблюдыштым шотлен пытараш лийын огыл. Нуно пӱтынь Израиль мландым пустаҥденыт.6Мадиан-влаклан кӧра Израильын пеш чот нужнаҥмекше, израиль эрге-шамыч Господь деч полышым йодын кычкыреныт.7Кунам израильтян-влак мадиан-шамыч деч утаралташ Господьым ӱжын кычкыреныт,8Тудо нунын деке пророкым колтен. Пророк нунылан каласен: «Тыге Господь, Израильын Юмыжо, ойла: ”Мый тендам Египет гыч, кул лийме мланде гыч, луктынам.9Мый тендам египтян-влакын да чыла моло шыгыремдылшын кидышт деч утаренам. Нуным тендан ончыч поктен колтенам да мландыштым тыланда пуэнам.10Тыланда каласенам: ’Мый Господь, тендан Юмыда, улам. Кеч те аморрей-влакын мландыштышт иледа, нунын юмышт-влаклан ида кумал’. Но те Мыйым колыштын огыдал”».11Господьын Суксыжо толын да Офрасе тумо йымак шинчын. Тумыжо Авиезер тукым гыч улшо Иоасын мландыштыже шоген. Иоасын Гедеон эргыже, мадиан-влак ынышт уж манын, тиде жапыште виноградым темдыме верыште шыдаҥым шийын.12Тудлан Господьын Суксыжо кончен. Тудо Гедеонлан каласен: «Виян сарзе, Господь тый денет!»13Гедеон тудлан вашештен: «Мыйын озам! Господь мемнан дене гын, молан чыла тиде [орлык] мемнан дене лийын? Кушто Тудын ӧрыктарыше чыла пашаже, кудын нерген мыланна ача-кочана-влак ойленыт? Вет нуно ”Господь мемнам Египет гыч луктын” манын каласкаленыт. А кызыт Господь мемнам коден каен, мадиан-влак кидыш пуэн».14Господь тудын ӱмбак ончалын да каласен: «Кай да тиде вий-куатет дене Израильым мадиан-шамычын кидышт гыч утаре. Мый тыйым колтем».15Гедеон тудлан манын: «Господь! Кузе мый Израильым утарем? Манассий тукымышто мыйын урлыкем эн начар, а мый ешыште эн изи улам».16Господь тудлан каласен: «Мый пеленет лиям, мадиан-влакым тый ик еҥым сеҥыме семын кырен шалатет».17Гедеон Тудлан манын: «Мый Тыйын шинчаштет поро кумылым суленам гын, мый денем Тыяк кутырымым палаш манын, мылам палдарыше палым ончыкто.18Тый декет пӧртылмешкем, тышеч ит кай. Мый Тылат пӧлекым кондем да Тылат темлем». Тудо каласен: «Тыйын пӧртылмешкет, Мый тыштак лиям».19Гедеон каен, казапача шылым ямдылен да ик ефа ложаш дене шергиндым кӱэштын. Шылым комдыш, а лемым кӧршӧкыш пыштен да Тудын деке тумо йымак конден.20Юмын Суксыжо тудлан каласен: «Шыл ден шергиндым нал, тиде кӱ ӱмбак пыште да лемым оптал». Гедеон тыгак ыштен.21Господьын Суксыжо кидыште улшо пондыжым шуялтен да шыл ден шергинде деке тӱкнен. Кӱ гыч тул лектын да шыл ден шергиндым нелын. Господьын Суксыжо Гедеонын шинча ончычшо йомын.22Тунам Гедеон тиде Господьын Суксыжо лиймым умылен. Тудо каласен: «Господь Юмо, ойго мыланем! Вет мый Господьын Суксыжым шинчаваш ужынам».23Господь тудлан каласен: «Тылат тыныс лийже. Ит лӱд, тый от коло».24Гедеон тушан Господьлан жертвенникым ыштен да тудым «Иегова-шалом» манын лӱмден. Тиде жертвенник таче кечынат Авиезер тукым мландысе Офраште шога.25Тиде йӱдым Господь Гедеонлан каласен: «Ачатын кӱтӱж гыч ик ӱшкыжым да шым ияш вес ӱшкыжым нал. Ачатын Вааллан кумалме жертвенникшым шалате, тушто улшо Ашера меҥгым руэн шу.26[Тылат кончышо] Господь Юметлан жертвенникым тиде кӱ курык вуйышто кӱлеш семын шогалте. Руымо пуэт ӱмбалне йӱлалтен пуымо надырлан кокымшо ӱшкыжшым кондо».27Гедеон шке тарзыж-влак кокла гыч лу еҥым налын да Господьын каласымыж семын ыштен. Но шке родо-тукымжо да олаште илыше-влак деч лӱдмыжлан кӧра тудо тидым кечывалым огыл, а йӱдым ыштен.28Эрдене олаште илыше-влак кынелыныт да ужыныт: Ваалын жертвенникшым шалатыме, воктеныже улшо Ашера меҥгым руэн шуымо, а чоҥен шындыме у жертвенникеш надырлан кокымшо ӱшкыжым кондымо.29«Кӧ тидым ыштен?» – нуно икте-весышт деч йодыштыныт. Умылкалаш тӱҥалыныт да пален налыныт: тидым Гедеон, Иоас эрге, ыштен.30Олаште илыше-влак Иоаслан каласеныт: «Лук эргычым. Ваалын жертвенникшым шалатымылан да воктеныже улшо меҥгым руэн шуымылан тудо колышаш».31Тудым авырен шогалше-влаклан Иоас вашештен: «Тыланда мо Ваалым арален налман? Тыланда мо тудым пыдалман? Кӧ тудым пыдал налеш, эр марте пуштмо лийшаш. Ваал чынжымак Юмо гын, жертвенникшым шалатымылан тудо шкенжым шке арален налын кертеш».32Тиде кече гыч Гедеоным Иероваал манын лӱмденыт. Вет тудын шотышто тыге ойленыт: «Тек жертвенникшым шалатымылан Ваал шкенжым тудын деч шке арален налеш».33Мадиан ден амалик-влак да эрвелне илыше-шамыч пырля погыненыт, эҥерым вонченыт да стан дене Изреель лапвереш шогалыныт.34Гедеоным Господьын Шӱлышыжӧ авалтен. Тудо пучым пуалтен, да Гедеон почеш каяш Авиезер урлык погынен.35Гедеон уверзе-влакым Манассий тукым мланде мучко колтен – Манассий тукым погынен да тудын почеш каен. Тыгак тудо уверзе-влакым Асир, Завулон да Неффалим тукым еҥ-влак деке колтен. Нунат тудын деке толыныт.36Гедеон Юмылан каласен: «Ойлымет семынак Израильым мыйын кидем дене утарынет гын,37теве мый тышан идымеш тӱредме межым шарем. Лупс меж ӱмбаке гына возеш, а йырым-йырысе мланде кукшо кодеш гын, тунам мый палем: сӧрымет семынак Тый Израильым мыйын кидем дене утарет».38Тыгак лийын. Вес кечын Гедеон эрдене эрак кынелын да межым пунчалын. Тудо меж гыч корка тич вӱдым луктын.39Гедеон Юмылан каласен: «Ит шыдешке мыланем, мый эше ик гана йоднем, меж дене эше ик гана терген ончынем – тек тиде гана меж кукшо кодеш, а йырым-йырысе мланде ӱмбаке лупс возеш».40Тиде йӱдым Юмо тыгак ыштен: меж кукшо кодын, а мланде ӱмбаке лупс возын.
Institute for Bible Translation, Finland