Суд21
1Мицпаште израильтян-влак товатлен каласеныт: «Нигӧ мемнан кокла гыч Вениамин эрге-влаклан шке ӱдыржым марлан огеш пу».2Калык Вефильыш каен, тушто Юмо ончылно кас марте шинчен да кугу йӱкын пеш чот шортын.3Еҥ-влак ойленыт: «Господь, Израильын Юмыжо! Молан тиде Израиль дене лийын? Молан ынде Израильыште ик тукым уке?»4Вес кечын, эрдене эр кынелын, израильтян-влак тушан жертвенникым ыштеныт да йӱлалтен пуымо надыр ден татулык надырым конденыт.5Нуно икте-весышт деч йодыныт: «Чыла израиль тукым кокла гыч Господь ончыко погынымашыш кӧмыт толын огытыл?» Вет Господь ончыко Мицпаш толдымо-влак пытарыме лийшаш улыт манын товатлен каласыме улмаш.6Израильтян-влак Вениамин тукым иза-шольышт шотышто ойгыреныт. Нуно тыге ойленыт: «Ынде Израильын ик тукымжым пӱчкын кудалтыме.7Утаралт кодшыжо-влак оръеҥым муышт манын, мыланна мом ышташ? Вет ме Господьын лӱмжӧ дене нунылан шке ӱдырна-влакым марлан огына пу манын товатленна».8Вара нуно йодыныт: «Израиль тукым-влак кокла гыч Господь ончыко Мицпаш толдымо-шамыч улыт мо?» Пален налыныт: Галаадысе Иавис гыч Господь ончыко станыш погынымашыш нигӧ толын огыл.9Калыкым ончен лектыныт. Чынжымак, тушто Галаадысе Иависыште илыше ик еҥат лийын огыл.10Калык тушко виян латкок тӱжем сарзым колтен, нунылан тыге кӱштен каласен: «Кайыза да Галаадысе Иависыште илыше-влакым – ӱдырамашымат, йоча-влакымат – керде дене пытарыза.11Теве мом ыштыза: чыла пӧръеҥым, тыгак пӧръеҥым пален налше чыла ӱдырамашым, Господьлан надыр шотеш пӧлеклен, пӱтынек пытарыза, [а ӱдыръеҥ-влакым илышым кодыза». Тыгак ыштеныт].12Галаадысе Иависыште илыше-влак коклаште нуно пӧръеҥым палыдыме нылшӱдӧ ӱдыръеҥым муыныт да нуным шке станышкышт, Ханаан мландысе Силомыш, конденыт.13Калык Риммон кӱ курыкышто улшо Вениамин эрге-влак деке келшымаш ойпидышым темлаш уверзе-шамычым колтен.14Тунам Вениамин эрге-влак [израильтян-шамыч] деке пӧртылыныт. [Израильтян-влак] нунылан Галаадысе Иависыште илыше кодымо ӱдыр-шамычым ватылыкеш пуэныт. Но нуно чылаштлан ситен огытыл.15Калык Вениамин тукым шотышто ойгырен, вет Господь Израиль тукым-влак кокла гыч иктыжым пӱчкын кудалтен.16Калык кугурак-влак каласеныт: «Вениамин тукымысо ӱдырамаш-шамычым пытарыме. Кодшо пӧръеҥ-влаклан вате-шамычым кушто муаш?»17Вара каласеныт: «Израильын ик тукымжо ынже йом манын, Вениамин тукымын мланде ужашыже нунын утаралт кодшо еҥыштынак лийшаш.18Но ме нунылан ӱдырна-влакым марлан пуэн огына керт». Вет израильтян-шамыч тыге товатлен ойленыт: «Кӧ Вениамин тукым эргылан шке ӱдыржым марлан пуа, тудо каргыме лиеш».19Тунам нуно шарналтеныт: «Колыштса, Силомышто кажне ийын пайремым ыштатыс! Силомжо – Вефиль деч йӱдвелне, Вефиль гыч Сихемыш наҥгайыше корно деч эрвелне да Левона деч кечывалвелне».20Нуно Вениамин эрге-влаклан тыге кӱштен каласеныт: «Кайыза, виноград аҥалаште шылын шичса21да эскерыза. Кунам Силомысо ӱдыр-влак пӧрдын кушташ лектыт, виноград аҥа гыч куржын лекса. Кажныже шкаланда Силом ӱдыр-влак кокла гыч ватым руалтен кучыза да Вениамин мландыш наҥгайыза.22Кунам нунын ачашт але изашт мемнан деке вуйым шияш толыт, ме каласена: ”Нунын верч мыланна нелеш ида нал, вет ме сар годым нунылан кажныжлан ватым налын кертын огынал. Теат нунылан шке ӱдырдам пуэн кертын огыдал: тыге ыштеда гын, сулыкыш пуреда ыле”».23Вениамин эрге-влак тыгак ыштеныт: кажныже кушташ лекше ӱдыр-влак кокла гыч иктыжым шкаланже ватылыкеш шолыштын. Вара нуно шке мландышкышт пӧртылыныт, угыч ола-влакым чоҥеныт да тушто илаш тӱҥалыныт.24Моло израиль эргат шке тукым ден урлыкышт еда каеныт, кажныже шке мландышкыже пӧртылын.25Тиде жапыште Израильын кугыжаже лийын огыл, да кажныже мом чынлан шотлен, тудым ыштен.
Institute for Bible Translation, Finland